1-2  Benebokenh Eron nuye bebeywurd bu korroko bedda benewokweng Yahwey Kaworhnan nuye kunwok, benewam darnki kunwarre dorrengh kure Yahwey Kaworhnan wanjh benedoweng.

Wanjh nawu Yahwey Kaworhnan bimarneyimeng Modji, “Modji, ngudda yimarneyimen Eron mane kunwok”.

“Ngayi Yahwey Ngaworhnan marnebebme kurruk kure kungol kaddum kure dangno manekke karrangbarrhmikendi kaddum kure Budmanda nakimuk nadjamun, kure kurrurrk kurrurrkdjamun dabbulin kure kubodme kurrurrk kawelhwelhme manburrba. Bengdayhke minj yire kure kurrurrkdjamun dabbulin, wardi yiman yire wanjh yirrowen bu yingimen kure kundjamun dabbulin kahdi. Minj yirrowen ngudda kunkudji yire kumekke bu ngayi marneyime mandjad.

3-10 Eron, yimre kure kurrurrkdjamun dabbulin yibenka mayh kunbid kunkudji. Ngudda yidjirridjburren. Wanjh ba yidjongburren madjbele kunmadj nawu linen, yiman kayime kandjiken mak kunmadj nakuyeng.

Eron, ngudda yiwon kunmakmak narangem bulikki, yibun ngudda kenh kabularrbun kunwarre ngudda Eron mak ke namud.

Eron, ngudda yiwon kunmakmak narangem djib ngudda Eron mak ke namud, bu yibun ba kanmarnbun nganjilngmakmen.

Wanjh bininj Yidjrayelbeh kabirrimkan benebokenh narahrangem nanikud, bu kunwarre bedberre bininj Yidjrayelbeh. Ngudda yibenka namekke bokenh narahrangem nanikud kanbukka kure ngayi ngardduk kuberrk kure ngahdi kurrurrkdjamun dabbulin kahdi.

Eron yiburriwe bokenh kunwardde, ba manekke bokenh kunwardde yinan yibengkan baleh kabenere narahrangem nanikud. Nakudji narangem nanikud ngudda yiwon kunmakmak ngardduk, yibun bu kunwarre bedberre bininj Yidjrayelbeh, mak nabuyika narangem nanikud yimka karrarrkid kure ngayi. Yimunkewen kare kure manberrkombuk kure wayarra Nadjadjel. Nungka nane nanikud kakan kunwarre bedberre bininj birridjalwern.

Wanjh bininj Yidjrayelbeh kabirrimkan narangem djib. Wanjh ngudda yiwon kunmakmak namekke narangem djib bu yibun ba yimarnbun kannjilmakmen.

Mane kunwok marneyimeng ngudda mandjad ba yire ngudda yingimen kure kurrurrkdjamun dabbulin kahdi.