Ⅰ Omonene ochorire Koresi,

omobwatire okoboko kwaye gw’okorio,

amobuere ebisaku na aure abarwoti okobua kwabo.

Amoigorere ebisieri, na ebiita tibisiekwa.

Bono aya nar’Omonene akomoteebia:

Ⅱ “Inche nintang’ane bosio bwao,

ninyaranie ebitunwa na ebigoro,

nimbuna‐bune ebiita bie chitaai,

nimbutorane emekorogoto y’ebioma.

Ⅲ Ninkoe chinibo chibisire ase omosunte,

na obotenenku bore aase abobisi,

erinde onyare komanya ng’a inche ninche Omonene, Nyasae bw’Abaisraeli,

ngokorangeria ase erieta riao.

Ⅳ Nigo ngokorangeria ase erieta riao

ase engencho ya Yakobo, omosomba one,

ee, ase engencho ya Israeli, omochore one.

Nakoeire erieta ri’amasikani, nonya aye tomanyeti inche.

Ⅴ “Inche ninche Omonene, onde tari;

Nyasae onde tari otatiga inche bweka.

Nigo nakoboyirie chinguru nonya aye tomanyeti inche.

Ⅵ Nigo ngokora ayio, erinde abanto bamenyete moocha na bosongo

banyare komanya ng’a onde tari otatiga inche bweka.

Inche ninche Omonene, na onde tari.

Ⅶ Ninche Omotongi bw’oborabu na omosunte,

nigo nkorenta omorembe, narenta na amabe;

Inche ninche Omonene, ngokora ayio onsi.

Ⅷ Inwe igoro chionsi, tonyia amatoima,

oboronge tiga borwe igoro, botwe buna amare agotwa embura;

ense tiga emaanoke, eichorwe nogotooreka na oboronge.

Ninche Omonene natongire ayio.”

Ⅸ 45:9: Isaya 29:16; Abar 9:20“Obobe nobw’oyio okoamererania n’Omotongi oye,

oyio ore ekegonkorio ase egati y’ebinde.

Inee! Esike neborie omooroisia iga:

Ninki eke okoroisia?

Gose ekeroisirie ngetebie omooroisia iga:

Aye tobwati amaboko?

Ⅹ Obobe nobw’oyio okoboria ise:

Inki aye okoibora?

Gose koboria ng’ina:

Inki eke obogoretie inda yao ogochia koibora?”

Ⅺ Aya nar’Omonene, oyore Omochenu bw’Abaisraeli na Omotongi obo, agoteeba:

“Mborie inche igoro y’amang’ana agochia koba;

ntige inyechandere abana baane,

ekiagera abwo nemeremo y’amaboko aane.

Ⅻ Ninche natongete ense,

ngatonga na abanto, nkababeeka aroro;

amaboko aane naro aramborete igoro,

erio ngachiika erioba, na omotienyi,

ne ching’enang’eni, kera ekemo kebeere aase aye.

ⅩⅢ Inche Omonene naimokirie Koresi ase oboronge,

nindongeyie chinchera chiaye chionsi;

ere naagache omochie one,

nasibore abanto baane boosetwe barue ase obosomba,

tagoakanwa kende, gose koegwa ng’eria ende.”

Omonene bw’Emeganda nere oteebire ayio.

ⅩⅣ Aya nar’Omonene agoteeba;

“Abamisiri ne chinibo chiabo bechanderete,

na Abaetiopia na oboonchoreria bwabo,

na abanto ba Seba bare abatambe,

bonsi mbache asore, babe abao amo ne chinibo chiabo.

Barabwo mbagotunyane basibire chingataare,

batung’ame asore, bagosabe, bateebe:

Ekeene, Nyasae nigo are ime yao, onde tari,

Nyasae onde tari otatiga ere bweka.”

ⅩⅤ Aye Nyasae bw’Abaisraeli, aye Omotooria,

ekeene, aye naye Nyasae ore bobisi.

ⅩⅥ Abanto bonsi bakoroisia emegwekano egosasimwa,

mbasookigwe na gotantanigwa,

ee, bonsi pi mbasookigwe na goichana mono.

ⅩⅦ Abaisraeli mbatoorigwe n’Omonene ase ogotoorigwa gwa kare na kare,

inwe Abaisraeli timogosookigwa, gose gotantanigwa kare na kare.

ⅩⅧ Omonene oyio otongete igoro chionsi, nere Nyasae,

nere otongete ense akayebeeka oboroso obokong’u.

Tayetongete ng’a ebe bosa,

nigo ayetongete emenywe.

Aya nar’Omonene agoteeba:

“Inche ninche Omonene, nyasae ende teiyo.

ⅩⅨ Inche Omonene tinakwanete aase abobisi,

gose ase ense y’omosunte;

tinatebeetie abanto b’ororeeria rwa Yakobo

ng’a bandigie bosa.

Inche Omonene nigo ngokwana ayare ay’ekeene,

na koraria ayare ay’oboronge.”

ⅩⅩ “Inwe abamore abatigari korwa ase ebisaku,

sangererekana amo mosuke gocha ang’e!

Abanto abwo bakobogoria emegwekano egosasimwa eroisirie korwa ase emete,

abwo bagendererete gosaba chinyasae chitanyare kobatooria,

tibari nokomanya.

ⅩⅪ Raria na morente amang’ana aino!

Tiga bagambere amang’ana abo amo.

Ning’o oyakwanete agwo kare?

Ning’o oyaraaretie kare?

Inee! Tari inche Omonene nayakwanete?

Inche nigo inde Nyasae omonyene oboronge na Omotooria.

Nyasae onde tari otatiga inche bweka.

ⅩⅫ “Inwe abe chinsinyo chi’ense,

ng’onchokere mbatoorie,

ekiagera inche ninche Nyasae, onde tari otatiga inche bweka.

ⅩⅩⅢ 45:23: Abar 14:11; Abafl 2:10,11Netianirie inche omonyene;

ring’ana riarure ase omonwa one ase oboronge, tirikoonchoka.

Kera riru naribekwe inse ase obosio bwane,

na kera oromeme ndotiane ase ’nde.

ⅩⅩⅣ “Kera omonto nakwane igoro yane na goteeba:

Oboronge ne chinguru nigo bire ase Omonene bweka;

bonsi abamogechete mbache asare basookigwe.

ⅩⅩⅤ Abanto bonsi b’ororeeria rwa Israeli

mbanyore oboronge na gwetogia ase Omonene.”