Ⅰ “Beli yaguure inse, na Nebo yekumbire;

emegwekano ye chinyasae chiria eberekire ne ching’iti ne chiombe;

ebinto ebio bibogoirie nigo bire chigurube chindito

ase ching’iti echio chiarosire.

Ⅱ Chinyasae echio nigo chiekumbete gochia inse amo,

tichikonyara gotooria chigurube chiria,

echio chinyene nigo chigwoswa chiairwa ase obosomba.

Ⅲ “Inwe ab’ororeeria rwa Yakobo,

inwe abatigari bonsi b’Abaisraeli,

inwe aba nabeire mbabogoretie korwa ekero mwarenge ase chinda chi’abanyoko,

na korwa ekero mwaagatire ase amaboko ’abanyoko,

inyigwere!

Ⅳ Ninche ndabe amo nainwe nonya ngoika engaki y’obogotu bwaino,

ekero morabe mwagotire kegima ne chimbuche chiarabire se,

nimbe nkobabogoria.

Ninche nabatongete, nimbarende,

nimbabogorie na kobatooria.

Ⅴ “Ning’o moranyare kondeng’ania ng’a imbe buna oyio?

Ning’o moranyare kongwekania ng’a togwekane nere?

Ⅵ Abanto nigo bakoumora chitaabu korwa emebuko yabo

na korenga chifeta nekerengero,

erio baakanera omoturi bw’etaabu,

nere oyeroisia yaba enyasae,

na abanto abwo batungama bosio bw’enyasae eyio bayesasiima.

Ⅶ Erio bayeimokia bayebeeka ase amareko abo, bayebogoria,

bayetereka aase aye, yabeera aroro;

tekonyara gotigera korwa aase agwo. Omonto naisa korera ase enyasae eria,

ero tekonyara komoigwa gose komotooria korwa ase emechando yaye.

Ⅷ “Inwe abasaria, inyora amang’ana ayio,

moyarengererie mono.

Ⅸ Inyora amang’ana abeete kare;

inche ninche Nyasae, onde tari;

ninche Nyasae, onde tari onga buna inche.

Ⅹ Korwa omochakano nigo naraaretie aya agochia koba;

agwo kare nigo nabaanete aya ataraba,

ngateeba: Emeroberio yane goika eikerane,

onsi aya nganetie ninyakore.

Ⅺ Nindangerie ensoti eche korwa moocha,

na omonto okorwa ense y’aare nache akore aya naroberetie.

Aya nakwanire, goika nyaikeranie,

na aya narobeirie, goika nyakore.

Ⅻ “Inwe abamore abanyabigoti bikong’u,

inwe abamore aare korwa ase oboronge,

inyigwera!

ⅩⅢ Narentire oboronge bwane ang’e, tibori aare,

na ogotooreka kwane tikogoteebana;

nimbeeke ogotooreka ase Sayoni;

ning’ee Abaisraeli obonene bwane.”