Ⅰ 47:1: Isaya 13:1—14:23; Yer 50:1—51:64“Aye Babiloni onga buna omoi seke omwekuungi,

aye omochie bw’Abakalidayo, ika korwa agwo,

ikaransa ase amaroba otari nekerogo ki’obonene!

Bono tokorokwa omwororo na omwereria nonya ng’ake.

Ⅱ Bono bogoria ensio osere obosie!

Rusia egietubo otubete obosio bwao,

ringa eganchwa yao eike ase amariagati,

erio oete ase amaache ime.

Ⅲ Obogetirianda bwao tibogotubwa,

na obosooku bwao mbororekane.

Nindusie egesiomba na tinkororera nonya noyomo amaabera.”

Ⅳ Omochenu bw’Abaisraeli nere Omobooria oito;

Omonene bw’Emeganda nario erieta riaye.

Ⅴ “Aye Babiloni, omochie bw’Abakalidayo,

ikaransa ase omosunte okire‐kiri,

tokorokwa eting’ana y’amarwoti naende.

Ⅵ Inche nigo nabeete nendamwamu ase abanto baane,

ngakora omwando one okaba oyo otachenegeti.

Nkababeeka ase okoboko kwao,

aye tikwabeete namaabera ase bare,

korende nigo gwakorerete abanto abagotu bobe,

okabaa chigurube chindito mono.

Ⅶ Aye nigo gwateebete ng’a nobe eting’ana kare na kare.

Tikwarengereretie amang’ana ayio.

Gose tikwainyorete buna omoerio bw’amang’ana ayio arabe.

Ⅷ 47:8: Okom 18:7,8“Ase ayio, aye bwanchete kwegokia, igwa amang’ana aya!

Aye oikaransete na kwegaara, gwateeba ase enkoro yao;

Inche ninche, onde tari otatiga inche bweka,

tingotigwa imbe omoboraka, gose tingokwerwa abana.”

Ⅸ Amang’ana aya abere nagochere mobosokano ase rituko erimo;

abana bao mbakwe, na omosacha oo akwe, obe omoboraka;

ayio onsi nagochere,

nonya oborogi bwao, na oboringoria bwao,

bire ebinge mono.

Ⅹ “Nigo kwabeete noboremu ase ogokora kwao okobe,

ogateeba: ‘Onde tandochi.’

Obong’aini bwao, ne chisemi chiao, nigo biagosiretie,

ogateeba ase enkoro yao ime: ‘Inche ninche, onde tari otatiga inche bweka.’

Ⅺ Amabe nakonyore, ayio oborogi botanyare koyatanga,

amaakwa nakonyore, ayio otanyore embooria ende ekoyarusiao.

Ogosirigwa nkogochere mobosokano,

amang’ana ayio otamanyete ng’a nabe bo.

Ⅻ Bwata bokong’u oboringoria bwao obonge na oborogi bwao,

ebinto ebio gwechanderete korwa obwana bwao;

ande nabo birabaise kogokonya,

ande nabo birabaise goseria emechando yao.

ⅩⅢ Aye kwabeire gokwerosia ase okorigia abasemia abange,

abwo bakoringoria ayare igoro, tiga bache kogotooria,

na abakomongera ching’enang’eni chia igoro,

abwo bagokobaanera aya agochia gokonyora ekero omotienyi oorokire,

bateeba ng’a mang’ana gete nabe asore.

ⅩⅣ “Rora, abanto abwo nigo banga amasakwe,

omorero nigo okoyasamba ayia aera,

tari konyara gwetooria korwa ase chinguru chi’omorero.

Amasakwe ayio takoyia abe omorero bw’amakara,

omonto araikaranseo aywote.

ⅩⅤ Abanto abwo kwabeire kogokora emeremo nabarabwo, naboigo bare,

abwo kwabeire kogokora oboonchoreria nabarabwo korwa obwana bwao.

Kera oyomo nabwatie enchera yaye,

onde tari oragotoorie.”