Ⅰ Aye Omonene, ningotogie, ekiagera kwanyimokirie korwa inse,

tigwatigete ababisa baane betogie igoro yane.

Ⅱ Aye, Omonene Nyasae one, nigo narerete asore ng’a onkonye,

na bono kwangwenirie.

Ⅲ Omonene, gwatooririe omoyo one korwa aase abakuure

kwang’iraneirie obogima tingenda ase oboina ime.

Ⅳ Inwe abachenu baye, tera amatera ay’okobaka Omonene,

iraneria ng’a mbuya mono ase erieta riaye richenu.

Ⅴ Omonene nigo akoba nendamwamu ase engaki ensinini yoka,

korende obuya bwaye nigo bokoba ase obogima bw’omonto.

Ekerero nabo keranyare kobao ase omogoroba,

korende mambia omogooko na omochengo nigo bigocha.

Ⅵ Ekero amang’ana onsi arenge amaya asende,

ngateeba ng’a tinkobugwa.

Ⅶ Aye Omonene, ase engencho y’obuya bwao

ogakora egetunwa kiane kegatenena bokong’u,

korende ekero kwabisete obosio bwao nkaba nobwoba.

Ⅷ Erio nkarera asore, aye Omonene,

ngakoboria ase oboitongo:

Ⅸ Mbitoki ki aye oranyore onye ngokwa na gosoa ase oboina ime?

Inee! Orotu rw’amaroba ndonyare kogotogia?

Ndonyare koraria obwegenwa bwao?

Ⅹ Aye Omonene, inyigwe, ondorere amaabera!

Omonene, inkonye!

Ⅺ Aye kwaonchoire omoichano one okaba omochengo;

kwandusirie eanga y’emechando,

kwambekeire ey’omogooko.

Ⅻ Ase ayio, omoyo one nogenderere kogotogia, togokira.

Aye Omonene, Nyasae one,

ninkoiraneria ng’a mbuya mono kogenderera kare na kare.