Ⅰ Aye Omonene, naye ngotamera,

tobaisa gontiga nsookigwe;

ntoorie goetera ase oboronge bwao!

Ⅱ Tegerera oigwe amang’ana aane, obe omwango gontooria.

Kabe egetare kiane ngotamera,

na eburi yane enkong’u, na ontoorie!

Ⅲ Aye naye egetare kiane na eburi yane;

ase engencho y’erieta riao ondaae na kondenda.

Ⅳ Indusie korwa ase oboreba bobisire bombwate,

aye naye egekengero kiane.

Ⅴ 31:5: Luk 23:46Aye Omonene, Nyasae omwegenwa,

naye kwambooririe.

Ⅵ Nigo ngechete abanto bagosasiima emegwekano ere bosa,

korende nigo ngosemeretie aye Omonene.

Ⅶ Ningoke na gochenga ase engencho y’obwanchani bwao botari koera;

aye igo ogwechandera emechando yane,

na kondengereria mono ase ogochandwa kwane.

Ⅷ Tombegeti ase amaboko ’omobisa one;

korende gwatenenirie amagoro aane aase are aagare.

Ⅸ Aye Omonene, ndorere amaabera, ekiagera nigo mbwate emechando;

amaiso aane arimeire ime ase engencho y’obororo,

omoyo one ogoyire, naboigo nomobere one.

Ⅹ Ase obogima bwane bwonsi nabeire inde nemechando;

na ase emiaka yane yonsi nabeire inde nomoichano;

chinguru chiane chiaerire ase engencho y’ogosaria kwane;

amauga yomobere one omire pa.

Ⅺ Ababisa baane bonsi nigo bagonchecheria,

na abasani baane boigo.

Abanto baamanyete banyoboire;

bonsi abakondora ase enchera nigo bagontama.

Ⅻ Abanto banyebire buna bakweba omonto okuure;

nabeire buna enyongo yatekire.

ⅩⅢ Nigo nkoigwa ababisa baane bakomonyererana;

okogosa nigo kong’etanaine.

Abwo nigo bagosangererekana amo kogamba,

bagokora omooroberio bw’okong’ita.

ⅩⅣ Korende inche nigo ngosemeretie aye Omonene.

Nigo ngoteeba: “Aye naye Nyasae one.”

ⅩⅤ Obogima bwane nigo bore ase amaboko ao;

ntoorie korwa ase amaboko ’ababisa baane na ay’abachandi baane.

ⅩⅥ Ing’onchorere obosio bwao, inche omosomba oo,

ontoorie ase engencho y’obwanchani bwao bogendererete botambe.

ⅩⅦ Aye Omonene, tontiga nsookigwe,

ekiagera nigo ngokorangeria.

Tiga abakori amabe basookigwe,

bagende aase abakuure babe amamama.

ⅩⅧ Kiria emenwa yabwo bagokwana amang’ana ’oborimo,

abwo bagokwana amang’ana amabe igoro y’oyore omooronge,

na gokwana amang’ana yoboenenu na ay’ogochaaya.

ⅩⅨ Naki obuya bwao bore obonge na obw’ogokumigwa,

obwo kwagacheire abanto abakoirogete,

ase amasio a Mwanyabaanto

nigo okoboorokia ase abakogotamera.

ⅩⅩ Nigo okobabisa agwo asore,

ase okobarenda korwa ase emeroberio emebe y’abanto;

nigo okobarenda ase ekiriri kiao korwa ase abanto abang’achi.

ⅩⅪ Omonene atogigwe!

Nigo anyorogetie obwanchani bwaye bw’ogokumia;

akandenda ase omochie omokong’u.

ⅩⅫ Ekero narenge nobwoba nigo narengereretie, ngateeba;

“Bono naserigwe gochia aare korwa ase obosio bwao!”

Korende nigo kwaigwete okoboria kwane kw’oboitongo,

ekero narerete asore ng’a onkonye.

ⅩⅩⅢ Mwanche Omonene, inwe abachenu baye mwensi!

Omonene nigo akobarenda buya abanto bare abegenwa,

korende nigo akorua egesusuro ase oyore omomwenu.

ⅩⅩⅣ Inwe mwensi aba momosemeretie Omonene,

kabe ne chinguru, mobe abaremu!