Ⅰ Aye Nyasae, tegerera oigwe ogosaba kwane,

tobaisa kwebisa toigwa ogosaba kw’ogosorora kwane.

Ⅱ Inyigwe na ong’iranerie;

inche nigo nkona‐korera na kweumia inde nobororo.

Ⅲ Ninde nobwoba ase engencho y’amariogi ’ababisa baane,

na ase engencho y’obobe bw’abakori amabe.

Abanto abwo nigo bakondetera amaakwa,

bakongecha bare nendamwamu.

Ⅳ Enkoro yane nigo ere nomoichano,

nasoirwe nokogoswa kw’amakweri.

Ⅴ Nasoirwe nobwoba na okoiguswa,

nabuirwe nomoichano omonene.

Ⅵ Bono nigo ngoteeba: “Onye ndiria nabwate chimbaaba buna riruma,

nanga nigo nare koiruruka ngende gotimoka.

Ⅶ Ee, nigo nanga nare kogenda aare, imbe ntoorete ase erooro.

Ⅷ Nigo nare kominyoka chimbero, erinde inyenyorere aase nkwebisa,

korwa ase omwaga omotindi na ekembugu‐mbugu.”

Ⅸ Aye Omonene, saria emeroberio y’abanto abwo,

otantanie chimeme chiabo tibaigwana.

Narorire obotindi na amariomana bire agwo ase omochie,

Ⅹ bikoyoetanana igoro ase chindwaki omobaso na obotuko;

amabe a mobosokano na emechando bire ase omochie oyio.

Ⅺ Obosareku nigo boichire ime yaye,

obong’ainereria na ogokorera abande bobe tibikorua ase chinchera chiaye.

Ⅻ Onye nomobisa ore gonchecheria,

nanga nigo nare koremereria;

naende onye nomobisa ore gonkorera bobe ase oboenenu,

nanga nigo nare kwebisa.

ⅩⅢ Korende bono naye ogonkorera bobe,

aye oyo kwarenge obomo nainche, omosani tomanyaine.

ⅩⅣ Nigo tware koba tokogamba amo amang’ana amaya ay’ogosemania,

naende nigo tware koba togosasiima amo ase enyomba ya Nyasae.

ⅩⅤ Tiga amakweri abachere ababisa baane mobosokano,

bagende gochia aase abakuure bare moyo;

obobe nigo bore ase obomenyo bwabo, na ase chinkoro chiabo.

ⅩⅥ Korende inche nigo nkomorangeria Nyasae,

nere Omonene nantoorie.

ⅩⅦ Kera omogoroba, na emambia, na mobaso gati,

nigo nkwereera ase engencho y’emechando yane,

n’Omonene naigwe eriogi riane.

ⅩⅧ Ere nantoorie, andende buya

korwa ase esegi eyio nkorwana,

ekiagera ababisa abange banyimokeire.

ⅩⅨ Nyasae oyio obeire okogamba korwa kare,

nanyigwe inche, erio abue abanto

abwo, ekiagera abwo tibari koonchoka na komoiroka Nyasae.

ⅩⅩ Oyorenge omosani one nigo aramborete okoboko kwaye,

akore bobe ase abakorete omorembe nere,

osaririe okobwatana kwaye kw’ogotianania.

ⅩⅪ Chinkwana chiaye nigo chiarenge chinyororo kobua amaguta atundire,

korende ebirengererio biaye nebi’esegi;

amang’ana aye nigo arenge amororo kobua amaguta,

nonya naboigo nigo akonachanacha buna emioro.

ⅩⅫ Motweke Omonene chigurube chiao,

nere nakobwate nokoboko kwaye akorende;

ere tagotiga omonyaboronge abugwe namabe.

ⅩⅩⅢ Korende abanto abaiti na abang’ainereria

aye Nyasae nobaturunkanie gochia ase eoromomo,

ekero bataraika ase ekeng’ese ki’obogima bwabo,

korende inche nimbe nkwegenete aye Omonene.