Ⅰ Aye Nyasae, indorere amaabera,

ekiagera abanto nigo baganetie ng’a bang’ite bansirie kegima;

omobaso boira ababisa baane nigo bakondwania esegi.

Ⅱ Omobaso boira ababisa baane nigo bakondigia baamere,

ee, mbare abange mono bakondwania ase oboenenu.

Ⅲ Ekero inde nobwoba, nigo ngosemeretie.

Ⅳ Ase okobua kwa Nyasae nintogie ring’ana riaye,

ninsemeretie Nyasae ntari nobwoba.

Inee! Mwanyabaanto inki baranyare gonkorera?

Ⅴ Omobaso boira ababisa baane nigo bakoonchorana amang’ana aane;

ebirengererio biabo bionsi nigo bire ebibe igoro yane.

Ⅵ Nigo bagosangererekana amo baroberia komboera,

barigererie kera egento ngokora;

naboigo bagendererete korigia obogima bwane babosirie.

Ⅶ Inee! Nabatooreke korwa ase obobe buna obwo?

Taibo. Aye Nyasae, basirie abanto abwo kegima nendamwamu yao entindi.

Ⅷ Omonene, aye nomanyete okoong’anya kwane,

nigo osangereretie amariga aane okayabeka ase egetono kiao.

Inee! Ayio onsi tarikiri ase egetabu yao?

Ⅸ Ekero ndarangerie Omonene, ababisa baane mbairanigwe gochia magega.

Nimanyete kegima ng’a Nyasae nigo are ase ensemo yane.

Ⅹ Ase okobua kwa Nyasae nintogie ring’ana riaye;

ee, ase okobua kw’Omonene nintogie ring’ana riaye.

Ⅺ Nigo nsemeretie Nyasae ntari nobwoba.

Inee! Mwanyabaanto inki aranyare gonkorera?

Ⅻ Aye Nyasae, goika ng’ikeranie chiira nakorierete;

naende ninkoruere ebing’wanso bi’okoiraneria ng’a mbuya mono.

ⅩⅢ Aye gwatooririe omoyo one korwa ase amakweri,

ee, gwatangire amagoro aane tagwa,

erinde inyare gotaara ase obosio bwao, aye Nyasae,

ase oborabu bw’abwo bare moyo.