5
1 “परमेश्वरजी कुल्मिंबै म्रुँ ख्रीष्ट येशू ग” बिसि बिश्वास लबै म्हि परमेश्वरए प्हसे ग, आबालाइ म्हाँया लबै म्हिइ च्हलाज्यै सैं न्होंउँइँलेन् म्हाँया लम्। 2 छतसि ङ्योइ परमेश्वरलाइ म्हाँया लसि खीजी बिबै ताँमैं ङिंस्याँ ङ्योइ खीए प्हसेमैंलाज्यै या सैं न्होंउँइँलेन् म्हाँया लल् त्हुम्। 3 ङ्योइ क्ह्रोसेंन्लेन् परमेश्वरलाइ म्हाँया लम् बिस्याँ खीजी बिबै ताँमैं ङ्योइ ङिंम्। धै खीए ताँ म्हाँदिबर ङ्योलाइ ल्हें गारो आरे।✡ 5:3 यूह १४:१५ 4 तलेबिस्याँ परमेश्वरए ताँन् प्हसेमैंइ चु ह्युलउँइँले खबै पापलाइ ट्होल् खाँम्। खैले ट्होम् बिस्याँ ङ्योइ परमेश्वरए फिर बिश्वास लसि ट्होब् ग। 5 “येशू ख्रीष्ट परमेश्वरए च्ह ग” बिसि बिश्वास लबै म्हिन् चु ह्युलउँइँले खबै पापलाइ ट्होल् खाँबै म्हि ग।
येशू ख्रीष्टए बारेर्बै ग्वाइ पिंब्मैं
6 येशू ख्रीष्टजी क्युर प्ल्हुँसि बप्तिस्मा किंइ, धै क्रूसर सिमिंसि ह्रोंसए को पिंइ। छतसि खी म्हि तसि ह्युलर युइ बिबै ग्वाइ पिंब्मैं क्यु नेरो को ग। क्युउँइँले मत्त्रे आङिं, क्यु नेरो कोउँइँले युइ।* 5:6 क्यु नेरो कोउँइँले युइ को-कोइ स्योर ताँ लोमिंब्मैंइ “येशू म्हि तसि बप्तिस्मा किंइ, दिलेया क्रूसर आसि,” बिल। यूहन्नाइ चु ताँ थोसि, “क्यु नेरो कोइ ग्वाइ पिंम्। येशू म्हि तसि क्युर बप्तिस्मा किंइ, झाइले क्रूसरै या च्योसि को बगेइ,” बिम्। खीए ग्वाइ पबित्र प्ल्हज्यै या ग्वाइ पिंइमुँ, तलेबिस्याँ पबित्र प्ल्हजी स्योर आते। 7 ग्वाइ पिंब्मैं सों मुँ: 8 पबित्र प्ल्ह, क्यु नेरो को, चुमैं सोंइ ताँ घ्रिलेन् खीए ग्वाइ पिंम्।† 5:8 चुमैं सोंइ ताँ घ्रिलेन् खीए ग्वाइ पिंम् तले सों चैदिम बिस्याँ, मोशाइ प्ह्रिबै ठिमर बिब् धोंले म्हि ङ्हिं सोंए ग्वाइ क्ह्रिइबिस्याँ च ताँ क्ह्रोंसेंन्बै तमुँ (व्य १७:६)। 9 म्हिमैंइ पिंबै ग्वाइ ङ्योइ क्वेंम्। परमेश्वरजी पिंबै ग्वाइमि झन् थेब मुँ, धै परमेश्वरजीन् खीए च्हए बारेर ग्वाइ पिंइमुँ। 10 छतसि परमेश्वरए च्हए फिर बिश्वास लबै म्हिए सैंर चु ग्वाइ तम्, दिलेया परमेश्वरए फिर बिश्वास आलबै म्हिमैंइ परमेश्वरलाइ स्योर्गु ठर्दिम्, तलेबिस्याँ परमेश्वरजी खीए च्हए बारेर पिंबै ग्वाइ चमैंइ आक्वें। 11 परमेश्वरजी पिंबै ग्वाइ चुन् ग: खीजी ङ्योलाइ खोंयोंइ आखाँबै छ्ह पिंइमुँ, धै च छ्ह खीए च्हउँइँले ङ्योइ योंम्।✡ 5:11 यूह ३:३६ 12 खाब्ने परमेश्वरए च्ह टिमुँ, चइ च छ्ह योंइमुँ, दिलेया खाब्ने परमेश्वरए च्ह आटि, चइ खोंयोंइ आखाँबै छ्ह आयों।
खोंयोंइ आखाँबै छ्ह
13 ओ, परमेश्वरए च्हए फिर बिश्वास लब्मैं! क्हेमैंइ खोंयोंइ आखाँबै छ्ह योंइमुँ बिसि पक्का था सेरिगे बिसि ङइ चु प्ह्रिछ्या क्हेमैंलाइ प्ह्रिब् ग। 14 झाइले खीए सैंर मैंब् धोंले ङ्योइ खीने तो ह्रिलेया खीजी ङ्योए ताँ थेमिंम् बिब् सेसि ङ्यो खीए उँइँर तोइ आङ्हाँन्ले ह्याल् खाँम्। 15 ङ्योइ खीने प्राथना लसि तो सै ह्रिलेया खीजी ङ्योए ताँ थेमिंम् बिब ङ्योइ सेइमुँ। छतसि ङ्योइ खीने तो ह्रिलेया ङ्योइ योंइमुँ बिबै या सेइमुँ।
16 खाबज्यै या ह्रोंसए बिश्वासी अलि-अङाँइ पाप लरिब् म्रोंस्याँ, चइ लबै पाप केमैं नर्गर्न ह्याल् त्हुबै खालर्बै‡ 5:16 नर्गर्न ह्याल् त्हुबै खालर्बै पाप अथवा क्षमा आयोंबै पाप (मत्ती १२:३१,३२) आङिंस्याँ, च अलि-अङाँए ल्हागिर चइ प्राथना लल् त्हुम्, धै नर्गर्न ह्याल् त्हुबै खालर्बै पाप आलबै म्हिलाइ परमेश्वरजी खोंयोंइ आखाँबै छ्ह पिंब्मुँ। दिलेया नर्गर्न ह्याल् त्हुबै खालर्बै पाप या मुँ। छाबै पाप केमैं लबै म्हिए ल्हागिर बिस्याँ परमेश्वरने प्राथना लमिंरिगे बिसि ङइ आबि। 17 ताँन् आछ्याँबै केमैं पाप ग, दिलेया को-कोइ पापमैं नर्गर्न ह्याल् त्हुबै खालर्बै आत।
18 परमेश्वरए प्हसेमैं खाबज्यै खोंयोंइ पाप लरिब आरे बिसि ङ्योइ सेइमुँ, तलेबिस्याँ परमेश्वरए च्हजी चलाइ जोगेथेंम्, छतसि दुष्टइ चलाइ छुइल् आखाँ।
19 ङ्योइ चु ताँ या सेइमुँ: चु ह्युलर्बै म्हिमैं दुष्टए न्होंर मुँ, ङ्यो बिस्याँ परमेश्वरए म्हिमैं ग।
20 क्ह्रोंसेंन्बै परमेश्वरलाइ ङ्योइ ङो सेरिगे बिसि खीए च्ह युसि ङ्योइ खीलाइ ङो सेबै ज्ञान पिंब ङ्योइ सेइमुँ। झाइले ङ्यो क्ह्रोंसेंन्बै परमेश्वरए च्ह येशू ख्रीष्टने घ्रिन् तसि क्ह्रोंसेंन्बै परमेश्वरने घ्रिन् तम् बिसे या सेइमुँ। क्ह्रोंसेंन्बै परमेश्वर खीन् ग धै खीउँइँले खोंयोंइ आखाँबै छ्ह योंम्§ 5:20 खीउँइँले खोंयोंइ आखाँबै छ्ह योंम् ग्रिक क्युइरि, खी खोंयोंइ आखाँबै छ्ह ग।।
21 ओ ङए कोलोमैं, कु पूजा आलद्।
✡5:3 5:3 यूह १४:१५
*5:6 5:6 क्यु नेरो कोउँइँले युइ को-कोइ स्योर ताँ लोमिंब्मैंइ “येशू म्हि तसि बप्तिस्मा किंइ, दिलेया क्रूसर आसि,” बिल। यूहन्नाइ चु ताँ थोसि, “क्यु नेरो कोइ ग्वाइ पिंम्। येशू म्हि तसि क्युर बप्तिस्मा किंइ, झाइले क्रूसरै या च्योसि को बगेइ,” बिम्।
†5:8 5:8 चुमैं सोंइ ताँ घ्रिलेन् खीए ग्वाइ पिंम् तले सों चैदिम बिस्याँ, मोशाइ प्ह्रिबै ठिमर बिब् धोंले म्हि ङ्हिं सोंए ग्वाइ क्ह्रिइबिस्याँ च ताँ क्ह्रोंसेंन्बै तमुँ (व्य १७:६)।
✡5:11 5:11 यूह ३:३६
‡5:16 5:16 नर्गर्न ह्याल् त्हुबै खालर्बै पाप अथवा क्षमा आयोंबै पाप (मत्ती १२:३१,३२)
§5:20 5:20 खीउँइँले खोंयोंइ आखाँबै छ्ह योंम् ग्रिक क्युइरि, खी खोंयोंइ आखाँबै छ्ह ग।