2
पबित्र ह्रें
1 छतसि क्हेमैंइ ताँन् खालर्बै स्योलिबै छलु-म्हिलुए ताँमैं, ह्रिस लब, आगु स्यारब नेरो आछ्याँबै केमैं लब पिवाद्। 2 बरु भर्खर फिबै कोलोमैंइ ङ्हे म्हैब् धोंले सैं भोंब् लमिंबै परमेश्वरए ताँ म्हैद्। छ लस्याँ परमेश्वरए फिर लबै क्हेमैंए बिश्वास बडिदै ह्याल् खाँब्मुँ। 3 तलेबिस्याँ परमेश्वरजी बेल्ले म्हाँया लम् बिसि क्हेमैंइ सेल् खाँइमुँ।✡2:3 भज ३४:८
4 छतसि प्रभु येशू ङाँर ह्याद्। खी खोंयोंइ तरिबै पारा धों तब् ग, म्हिमैंइ खीलाइ आक्वेंसि तो धोंइ आङ्हाँलैया खी परमेश्वरजीन् त्हाँब नेरो योंसे योंल् आखाँब मुँ। 5 छतसि क्हेमैं या येशू ख्रीष्टउँइँले परमेश्वरजी खोबै सैंर्बै ख्रो पिंबै ल्हागिर पबित्र खेगिमैं तसि खोंयोंइ तरिबै पारा धोंले पबित्र प्ल्ह टिबै धिं बनेदै ह्याद्। 6 तलेबिस्याँ छ्वेर छले प्ह्रिइमुँ:
“सियोन बिबै मन्दिरए तेंर
ङजीन् त्हाँबै सै लसे लल् आखाँब थेबै क्र युमाँ घ्रि ङइ थेंइमुँ।
छतसि खीए फिर बिश्वास लब्मैं खोंयोंइ या फापिल् त्हुरिब् आरे।”✡2:6 यशै २८:१६
7 छतसि क्हेमैं बिश्वास लब्मैंए ल्हागिर च युमाँ*2:7 च युमाँ अर्थ, येशू ख्रीष्ट बेल्ले थेब सै लसे लल् आखाँब मुँ, दिलेया बिश्वास आलब्मैंए ल्हागिर बिस्याँ,
“धिं बनेब्मैंइ केर आफे बिसि भ्योंवाबै युँमान्
तेंर्बै क्र युँमा तइ।”✡2:7 भज ११८:२२
8 अर्को क्ल्ह्योरै या छ बिइमुँ,
“च युमाँ खीए फिर बिश्वास आलब्मैंलाइ थुरल् लबै युँमा
धै प्हलेर्न कुरल् लबै युँमा ग।”✡2:8 यशै ८:१४-१५
तलेबिस्याँ चमैंइ परमेश्वरए छ्वेर्बै ताँमैं आक्वें। छतसि चमैं थुरम् धै नास तयाम्। चमैंए ल्हागिरि छान् तबर तोक्दिल।
9 दिलेया क्हेमैं छ आत, तलेबिस्याँ क्हेमैं परमेश्वरजी त्हाँबै कुल✡2:9 प्रस १९:५-६; व्य ४:२०; ७:६; १४:२; तीत २:१४; यशै ४३:२०-२१; ९:२ ग, परमेश्वर म्रुँए ख्रो पिंबै खेगिमैं, पबित्र ह्रें नेरो परमेश्वरए म्हिमैं ग। तलेबिस्याँ क्हेमैंइ “परमेश्वरए शक्ति ताँन् भन्दा थेब मुँ” बिसि उँइँमिंरिगे बिसि खीजी क्हेमैंलाइ मिछु खैबउँइँले तेसि खीए थेबै ह्वेर पखइ। 10 ओंसों क्हेमैं परमेश्वरए म्हिमैं आतल, दिलेया तिंजोरो क्हेमैं खीए म्हिमैं तइमुँ। ओंसों क्हेमैंइ परमेश्वरए म्हाँया आयोंल, दिलेया तिंजोरो क्हेमैंइ परमेश्वरए म्हाँया योंइमुँ।✡2:10 होशे २:२३
येशूए फिर बिश्वास लब्मैंइ लल् त्हुबै केमैं
क. येशूए फिर बिश्वास आलब्मैंलाइ
11 ओ ङए खोबै थुमैं, ङ क्हेमैंने यो छ्युँ लमुँ, क्हेमैंइ चु ह्युलर ङम् तिस्याबै प्ह्रें धों तब् मत्त्रे ग बिब् सेसि आछ्याँबै इच्छाउँइँले स्यो तद्, तलेबिस्याँ छाबै इच्छाजगोइ क्हेमैंए सैंलाइ न्होंवाम्। 12 बरु क्हेमैं येशूए फिर बिश्वास आलब्मैंए उँइँर छ्याँबै छ्ह थोद्। म्हिमैंइ क्हेमैंलाइ आछ्याँबै के लब्मैं बिसि क्हेमैंए बिरोधर पोंलेया क्हेमैंए छ्याँबै के चमैंइ म्रोंरिगे धै प्रभु येशू युबै त्हिंइर चमैंइ परमेश्वरए मिं क्वेरिगे।✡2:12 मत्ती ५:१६
ख. सरकारलाइ
13 छतसि प्रभुए मिं आह्यारिगे बिसि म्हिमैंइ थेंबै शासकमैं नेरो म्रुँए न्होंर टिद्। 14 दुष्ट के लब्मैंलाइ दण्ड पिंबर नेरो छ्याँबै के लब्मैंलाइ मान पिंबर परमेश्वरजी चमैंलाइ खटिदिइमुँ। 15 तलेबिस्याँ क्हेमैंइ दुष्ट म्हिमैंए उँइँर छ्याँबे के लसि आमादुमैंए सुँ म्रुँल् त्हुम् बिब परमेश्वरए सैं मुँ। 16 क्हेमैं आछ्याँबै सैउँइँले फ्रेमिंबै म्हिमैं धोंले छ्ह थोद्। दिलेया आछ्याँबै सैउँइँले फ्रेमिंबै म्हिमैं ग बिसि ठिमए बिरोधर्बै केमैं आलद्। बरु परमेश्वरए के लबै म्हिमैं धोंले छ्ह थोद्। 17 ताँन् म्हिमैंलाइ मान लद्। येशूए फिर बिश्वास लबै अलि अङाँमैंलाइ म्हाँया लद्, परमेश्वरने ङ्हिंन्, धै म्रुँलाइ मान लद्।
ग. क्ल्हेए न्होंर टिद्
18 ओ केब्छैंमैं, ह्रोंसए क्ल्हेए न्होंर टिसि मान लद्। क्हेमैंए फिर ल्हयो खबै क्ल्हेए न्होंर मत्त्रे टिब आङिं, ह्रोंसए फिर ल्हयो आखबै क्ल्हेए न्होंरै या टिद्। 19 परमेश्वरलाइ मैंसि अनिय नेरो दुःख सैदिब्मैं म्रोंसि खी सैं तोंम्। 20 तलेबिस्याँ क्हेमैंइ आछ्याँबै के लसि आगुइ धोंवासि सैदिस्याँ चुर थेबै ताँ तो तइ रो? आछ्याँबै के लसेरो आगुइ धोंबन् तइगोंन् आङिं वा। दिलेया क्हेमैंइ छ्याँबै के लसेया दुःख भुँदिल् त्हुमा तोइ आङ्हाँनले सैदिस्याँ क्हेमैं म्रोंसि परमेश्वर सैं तोंम्। 21 छाबै खालर्बै दुःख सैदिबै ल्हागिर्न खीजी क्हेमैंलाइ त्हाँब् ग। ख्रीष्टजी क्हेमैंए ल्हागिरि नमुना तसि थेबै दुःख सैदिइ, क्हेमैं खीए म्हैर्न प्रल् त्हुम्। 22 खीजी तोइ पाप आल, खीजी खोंयोंइ या स्योर आते।✡2:22 यशै ५३:९ 23 खीए फिर म्हिमैंइ तब आतब बिसि खीए आब्रु वासेया खीजी चमैंने खि आकिं। खीए फिर दुःख पिंब्मैंलाज्यै या खीजी धम्कि आपिं। बरु छेनाले निसाफ लबै परमेश्वरए फिर खीजी भर थेंइ।✡2:23 यशै ५३:७ 24 ङ्यो पापए ल्हागिर सिसि आछ्याँबै के लब् पिसि छ्याँबै के लदै छ्ह थोरिगे बिसि ङ्योइ लबै पापए सजैं खीए ज्युर नोसि ख्रीष्ट क्रूसर सिमिंइ†2:24 क्रूसर सिमिंइ म्हिजगइ खीए यो प्हलिर काँटि क्योसि क्रूसर टाँइदिसि सैबाल।। खीजी चबै चोटउँइँलेन् क्हेमैं सयाइमुँ।✡2:24 यशै ५३:५ 25 क्हेमैं क्युमैं धोंले घ्याँ फ्ल्येसि प्ररिल। दिलेया तारेम् क्हेमैंलाइ जोगेमिंबै प्ह्रोंछैं ङाँर क्हेमैं एखइमुँ।✡2:25 यशै ५३:६
✡2:3 2:3 भज ३४:८
✡2:6 2:6 यशै २८:१६
*2:7 2:7 च युमाँ अर्थ, येशू ख्रीष्ट
✡2:7 2:7 भज ११८:२२
✡2:8 2:8 यशै ८:१४-१५
✡2:9 2:9 प्रस १९:५-६; व्य ४:२०; ७:६; १४:२; तीत २:१४; यशै ४३:२०-२१; ९:२
✡2:10 2:10 होशे २:२३
✡2:12 2:12 मत्ती ५:१६
✡2:22 2:22 यशै ५३:९
✡2:23 2:23 यशै ५३:७
†2:24 2:24 क्रूसर सिमिंइ म्हिजगइ खीए यो प्हलिर काँटि क्योसि क्रूसर टाँइदिसि सैबाल।
✡2:24 2:24 यशै ५३:५
✡2:25 2:25 यशै ५३:६