5
परमेश्वरए बगाल
1 ङ बिश्वासी न्होंर्बै एल्डर पत्रुसउँइँले क्हेमैंए एल्डरमैंने यो छ्युँ लमुँ। ख्रीष्टजी खैले दुःख सैदिल बिबै साक्षि ङ मुँ। धै लिउँइ खीए थेबै मान तमैंया ङ खीने बालुन् तब्मुँ। 2 परमेश्वरजी क्हेमैंए जिम्मार थेंबै बगालए छैं छेनाले लद्। करइ आङिं, ह्रोंसए सैंइन म्रोंसि लद्। मुइए लोबै आङिं, चु ङइ लल् त्हुबै ङए जिम्मार्बै के ग बिब् मैंसि लद्।✡ 5:2 यूह २१:१५-१७ 3 क्हेमैंए जिम्मार मुँब्मैंए फिर कल्हे प्हैंसि हौदिसि ह्रोंसए न्होंर थेंसि आङिं, बगालमैंए ल्हागिर क्हेमैंन् नमुना तसि छ्याँबै के लसि उँइँन्। 4 छलस्याँ ताँन् भन्दा मूलि प्ह्रोंछैं* 5:4 ताँन् भन्दा मूलि प्ह्रोंछैं अर्थ, प्रभु येशू युबै त्हेर क्हेमैंइ खोंयोंइ आङ्योंलोंब नास आतबै छ्याँबै मुकुट योंब्मुँ।
5 छलेन ओ फ्रेंसि छमिमैं, क्हेमैंए चिब्मैंइ बिब् ङिंन्। क्हेमैं ताँन् ह्रोंस ह्रोंसए न्होंर थेब् आप्हैंन्ले घ्रिइ घ्रिए सेवा लद्, तलेबिस्याँ परमेश्वरए छ्वेर छले प्ह्रिइमुँ:
“परमेश्वरजी थेब् प्हैंब्मैंए बिरोध लम्,
दिलेया थेब् आप्हैंब्मैंए फिर आशिक पिंम्।”✡ 5:5 हितो ३:३४
6 छतसि ह्रोंसन् च्योंने तसि थेबै शक्ति मुँबै परमेश्वरए यो न्होंर टिद्, धै खीजी ठिक त्हेर क्हेमैंलाइ थेब् लमिंब्मुँ।✡ 5:6 मत्ती २३:१२; लूक १४:११; १८:१४ 7 क्हेमैंए ताँन् न्हुँ परमेश्वरए प्हलेर थेंन्, तलेबिस्याँ खीजी क्हेमैंए वास्ता लम्।
8 बरु न्ह क्रों मि क्रोंले टिद्, तलेबिस्याँ क्हेमैंए शत्तुर दियाबलस बिबै दुष्ट खाबलाइ सैसि चब् ङ्हे बिसि सिंह धोंले बेल्ले थेबै कै तेदै स्युर प्रम्। 9 छतसि क्हेमैं परमेश्वरए फिर भोंन्ले बिश्वास लसि च दुष्टए बिरोध लद्, तलेबिस्याँ ह्युलर्बै ताँन् बिश्वासी अलि अङाँमैंज्यै छाबन् दुःख योंरिइमुँ बिसि क्हेमैंइ सेइमुँ। 10 दयाम्हाँया मुँबै परमेश्वरजी क्हेमैंलाइ येशू ख्रीष्टने घ्रिन् लमिंइमुँ, धै खीजी योंब् धों तबै खोंयोंइ आनुबै मान ङ्योज्यै या योंरिगे बिसि खीजी ङ्योलाइ त्हाँइमुँ। क्हेमैंइ तिस्याँदे दुःख योंबै लिउँइ खीजीन् क्हेमैंलाइ धबै छारा लमिंसि, भोंसि लमिंब्मुँ धै बेल्ले शक्ति मुँब लमिंब्मुँ। 11 खीलाइन भों नेरो शक्ति खोंयोंन् बिलै तरिगे। आमेन, छाबन् तरिगे।
आखिरि ताँमैं
12 सिलास बिब भर लल् खाँबै अलि ग। चए योउँइँले ङइ चु च्युरिन्ठि प्ह्रिछ्या क्हेमैंए ल्हागिर प्ह्रिल् पिंइमुँ। परमेश्वरए क्ह्रोंसेंन्बै दयाम्हाँया चु प्ह्रिछ्यार ङइ ग्वाइ पिंदा ङ्हाँइमुँ। खीए दयाम्हाँयार्न क्हेमैं भोंसि तद् बिसि ङइ अर्थि पिंम्।✡ 5:12 चिब्मैं १५:२२,४०
13 चु बेबिलोन† 5:13 बेबिलोन पत्रुसइ बेबिलोन प्ह्रिमा चए मतलब रोम सहर। बेबिलोन स्योंम्बै परमेश्वरए म्हिमैंलाइ बिरोध लबै सहर मुँल, झाइले पत्रुसए पालोरि च धोंले रोम छाबै बिरोधी सहर मुँल। सहरर्बै बिश्वासीमैं नेरो ङए च्ह मर्कूसज्यै क्हेमैंने जय मसीह बिमिंइमुँ। क्हेमैंलाइ धोंले चमैंलाज्यै या परमेश्वरजी त्हाँब् ग।✡ 5:13 चिब्मैं १२:१२,२५; १३:१३; १५:३७-३९; कल ४:१०; फिले २४ 14 क्हेमैं घ्रिइ घ्रिलाइ ख्रीष्टजी पिंबै म्हाँयाउँइँले अँखलो ख्वेसि जय मसीह लद्।
ख्रीष्टए फिर बिश्वास लबै क्हेमैं ताँनए फिर खोंयोंन् बिलै शान्ति तरिगे।
✡5:2 5:2 यूह २१:१५-१७
*5:4 5:4 ताँन् भन्दा मूलि प्ह्रोंछैं अर्थ, प्रभु येशू
✡5:5 5:5 हितो ३:३४
✡5:6 5:6 मत्ती २३:१२; लूक १४:११; १८:१४
✡5:12 5:12 चिब्मैं १५:२२,४०
†5:13 5:13 बेबिलोन पत्रुसइ बेबिलोन प्ह्रिमा चए मतलब रोम सहर। बेबिलोन स्योंम्बै परमेश्वरए म्हिमैंलाइ बिरोध लबै सहर मुँल, झाइले पत्रुसए पालोरि च धोंले रोम छाबै बिरोधी सहर मुँल।
✡5:13 5:13 चिब्मैं १२:१२,२५; १३:१३; १५:३७-३९; कल ४:१०; फिले २४