1 च त्हेजरे हेरोद म्रुँइ को-कोइ बिश्‍वासीमैं क्हासि चमैंए फिर बेल्‍ले दुःख पिंबर होंइ। 2 चइ यूहन्‍नाए आघें याकूबलाइ सेलाँइ (तरवारइ) सैवाल् पिंइ। 3 छलमा यहूदीमैं सैं तोंब् म्रोंसि चइ पत्रुसलाज्यै या क्हाइ। (चु ताँमैं प्लेढा आझोंबै क्हें चबै चाडर तल।) 4 हेरोदइ पत्रुस क्हासि झेलर च्युवाइ, धै दुःखने फ्रेबै चाडए लिउँइ पत्रुसलाइ म्हिमैंए उँइँर पखबै सैं लसि चलाइ रुँबै ल्हागिर सिपाइमैंए टोलि प्लिए जिम्मार पिंइ।✡12:4 प्रस १२:१-२७ 5 छले पत्रुस झेलर च्युवामा चए ल्हागिर बिश्‍वासीमैंइ बेल्‍ले भों खसि परमेश्‍वरने प्राथना लरिल।

6 हेरोदइ पत्रुस बैरु तेसि म्हिमैंए उँइँर पखल् म्हैबै म्हुँइँसर पत्रुस सँउँलि ङ्हिंइ फैसि सिपाइ ङ्हिंए म्हाँजोर रोरिल। धै अरू सिपाइमैं या झेलए म्राए ओंसों रूँरिल। 7 च त्हेर्न प्रभुए स्‍वर्गदूत घ्रि चर म्रोंयुमा च कोठर व्हे-व्हे तयाइ। स्‍वर्गदूतइ पत्रुस छोरबर कोखर कैसि “युनन् रेद्!” बिमा पत्रुसए योमैंउँइँले सँउँलि प्ल्हयाइ। 8 धै स्‍वर्गदूतजी चने “क्वें खिद्, जुत्ता खिद्!” बिइ। चइ छान् लमा स्‍वर्गदूतइ “ह्रडि कुसि ङए लिलि खो!” बिइ। 9 छबिमा पत्रुस स्‍वर्गदूतए लिलि ह्‍याइ। स्वर्गदूतइ लबै के क्ह्रोंसेंन् ग बिब चइ आसेल। दर्शन म्रोंरिब् बिसि चइ मैंरिल। 10 झाइले चमैं ओंसोंबै ने अर्को रुँबर टिबै म्हिमैं वाथेंसि ह्‍याइ। धै चमैं सहरर होंबै पैए म्रार फेनेमा च म्रा खीन् थोंयाँइ। छतमा चमैं बैरु त्होंसि घ्याँ घ्रिर फेनेमा स्वर्गदूत पत्रुस पिथेंसि ह्‍याइ।

11 च त्हेर्न पत्रुसइ सैं चिसि बिइ, “तोगो ङइ क्ह्रोंसेंन्‍ले सेइ, प्रभुजी खीए स्‍वर्गदूत कुल्मिंसि हेरोद म्रुँए योउँइँले नेरो यहूदीमैंइ लल् म्हैबै ताँन् सैउँइँले ङ फ्रेमिंइ।”

12 चु ताँ था सेसि पत्रुस मर्कूस बिबै यूहन्‍नाए आमा मरियमए धिंर ह्‍याइ। चर ह्‍यामा ल्हें म्हि खागु तसि प्राथना लरिल। 13 पत्रुसइ म्रा ह्रामा रोदा मिं मुँबै केब्स्यो म्रा थोंबर खइ। 14 चइ पत्रुसए कै ङो सेसि सैं तोंदै म्रा आथोंल्‍ले न्होंर न्हेह्‍यासि बिइ, “पत्रुस म्राए बैरु रारिइमुँ!”

15 छबिमा चमैंइ चने “क्‍हि सोबल तइमुँ वा!” बिइ।

दिलेया चइ ढिपि लसि बिइ, “क्ह्रोंसेंन पत्रुसन् ग।”

छतमा चमैंइ “च पत्रुसए स्वर्गदूत मुँलै,” बिइ।

16 पत्रुस बिस्याँ म्रान् ह्रारिइ। चमैंइ म्रा थोंमा पत्रुस म्रोंसि चमैं प्लेटोयाइ। 17 पत्रुसइ तोइ आबिद् बिसि योइ हस्त लइ, झाइले प्रभुजी च झेलउँइँले खैले बैरु तेमिंइ बिबै ताँ चमैंने बिइ। धै “चु ताँ याकूब नेरो अरू आघें-अलिमैंने या बिद् ओ,” बिसि च छाइले अर्को क्ल्ह्‍योर छ्युडिह्‍याइ।

18 मि म्रोंबै लिउँइ पत्रुसलाइ तो तगे बिसि रुँबै सिपाइमैं न्होंरि बेल्‍ले खैला-बैला लइ। 19 हेरोदइ चलाइ म्हैबर हुकुम पिंइ। दिलेया खनरै म्हैसे आयोंमा सिपाइमैंलाइ केर्दिसि चमैंलाइ सैबर ल्हैदिइ।

हेरोद बिस्याँ यहूदीयाउँइँले कैसरिया सहरर ह्‍यासि चर्न टिइ। 20 हेरोद टुरोसथेंमैं नेरो सिदोनथेंमैने बेल्‍ले ह्रिस खल। चमैंए ह्‍युलर्बै म्हिमैंइ चबै सैए ल्हागिर म्रुँए ह्‍युलने आड किंल् त्हुमल। छतसि चमैं ताँन् खागु तसि म्रुँ ङाँर खइ, धै चमैंइ म्रुँए दरबारर्बै के लब्मैंए चिब बलस्तसने न्हों-न्हों सुँने सुँ क्ह्रिबै ल्हागिरि यो छ्युँ लइ।

21 म्रुँइ त्हाँबै त्हिंइर म्रुँमैंइ खिबै क्वें खिसि हेरोद चए राजगद्दिर क्हुँसि चमैंए उँइँर भाषण लइ। 22 छतमा म्‍हिमैंइ “चुम् म्हिए ताँ आङिं! देवताए ताँ ग!” बिसि हेरोदए मिं थेब् लसि ओरइ। 23 दिलेया चइ परमेश्‍वरए मान आलबइले च त्हेर्न प्रभुए स्वर्गदूतइ चम्हिमैंए उँइँरलाइ ल्हिवाइ धै चए ज्युर प्हुँलुँ उजी उजी तसि च म्रुँ सियाइ।

24 दिलेया परमेश्‍वरए ताँ बडिदै खन्‍तोंदोंन् फेनेइ।

25 झाइले बारनाबास नेरो शाऊल ह्रोंसइ लल् त्हुबै के खाँसि यरूशलेमउँइँले एह्‍यामा मर्कूस बिबै यूहन्‍ना या चमैंने ह्‍याइ।