1 एन्‍टिओखियार्बै चर्चर अगमबक्‍तामैं नेरो लोमिंबै म्हिमैं मुँल। चमैं बारनाबास बिब, काला बिबै शिमियोन, कुरेनीथें लुकियस, धै हेरोद*13:1 हेरोद चु हेरोद आन्तिपस बिब गालील बिबै ह्‍युलरि म्रुँ मुँल। म्रुँने बालु फारबै मनेन बिब नेरो शाऊलै या मुँल। 2 चमैं बर्त टिसि प्राथना लसि परमेश्‍वरए मिं क्वेरिबै त्हेर पबित्र प्ल्हजी चमैंने बिइ, “ङए ल्हागिरि बारनाबास नेरो शाऊल ङइ खाब् केए ल्हागिरि त्हाँइमुँ च केए ल्हागिर्न स्यो लद्।” 3 चमैं बर्त टिसि प्राथना लइ, धै चमैंए फिरि यो थेंसि चमैं कुल्मिंइ।

4 पबित्र प्ल्हजी कुल्मिंबइले चमैं सिलुकिया नाँसर ह्‍याइ, छाइले झाजर क्रेसि साइप्रस बिबै टापुएउँइ ह्‍याइ। 5 चर्बै सलामिस नाँसर फेनेसि चमैंइ येहूदिमैंए च्हों धिंजरे परमेश्‍वरए सैं तोंबै ताँ बिमिंइ। चमैंलाइ ल्होमिंबर यूहन्‍ना मार्कुसै या चमैंने बालु ह्‍याल। 6 चमैं साइप्रसर मुँबै ताँन् क्ल्ह्‍योजरे स्युरदै पाफोस नाँसर फेखमा चर चमैंइ बार-येशू बिबै जादु लबै म्हि घ्रि त्होइ। चइ अगमबक्‍ता ग बिसि स्योर तेमल। 7 च जादु लबै म्हि साइप्रस टापूर्बै क्रथे सर्गियस पौलुस बिबै म्हिने टिमल। सर्गियस पौलुस बुद्धि मुँबै म्हि मुँल। चइ शाऊल नेरो बारनाबास हुइसि परमेश्‍वरए ताँ थेबै सैं लइ। 8 दिलेया सर्गियस पौलुसइ परमेश्‍वरए ताँ आक्वेंरिगे बिसि एलुमास बिबै जादु लबै म्हिइ शाऊल नेरो बारनाबासए बिरोध लइ। (ग्रिक क्युइर एलुमासए अर्थ जादु लबै म्हि ग।) 9 दिलेया शाऊललाइ पबित्र प्ल्हजी प्लिंसि च ङाँइ ङ्‍ह्‍योबै-ङ्‍ह्‍योबन् लसि एलुमासने बिइ (शाऊललाइ पावलै या बिमुँ): 10 “ओ दियाबलसए च्ह! क्हि ताँन् छ्याँबै केमैंए शत्तुर, ताँन् दुष्‍ट सैमैंइ प्लिंब नेरो स्योर तेब! क्हि प्रभुए सोजो घ्याँ खेदा-ख्योदे लब खोंयोंन् बिलै आपि वा? 11 तारे ङ्‍ह्‍योद्, प्रभुए यो क्हिए फिर फेइमुँ! तारे क्हि तिस्याँदे समा त्हिंयाँए ह्‍वे म्रोंल् आखाँसि कन तयाब्मुँ।” छबिबै तोंदोंन् म्हस्यो नेरो मिछु खैबइ चए मि हुवाइ। छतमा खाबज्यै चए यो क्हासि डोरेमिंम् उ ङ्हाँसि च छाम-छुम् लबर होंइ। 12 चु ताँ म्रोंसि चर्बै क्रथेइ प्रभुए फिर बिश्‍वास लइ, तलेबिस्याँ प्रभुए बारेर्बै ताँ थेसि च छक्‍कन् तयाइ।

13 पावल नेरो चए थुमैं पाफोसउँइँले क्‍यु झाजर क्रेसि पामफिलिया ह्‍युलर्बै पर्गार फेनेइ। दिलेया मर्कूस बिबै यूहन्‍ना बिस्याँ चमैंने फ्रेसि च क्ल्ह्‍योउँइँले यरूशलेमर एह्‍याइ। 14 पावल नेरो बारनाबास पर्गाउँइँले त्होंसि पिसिदिया बिबै ह्‍युलर्बै एन्‍टिओखिया सहरर फेनेइ, धै प्रिबै त्हिंइर यहूदीमैंए च्हों धिंर ह्‍यासि टिइ। 15 झाइले म्हिमैंइ मोशाइ पिंबै ठिम नेरो अगमबक्‍तामैंए कितब खेबै लिउँइ च्हों धिंर्बै चिब्मैंइ, “ओ अलि-अङाँमैं, क्हेमैंने म्हिमैंए ल्हागिरि अर्तिए ताँमैं तोइ मुँस्याँ बिमिंन्,” बिसि पावल नेरो चए थुमैं ङाँर सँउँसर पिमिंइ।

16 छबिमा पावल रासि योइ हस्त लसि बिइ:

“ओ इस्राएलर्बै म्हिमैं नेरो परमेश्‍वर म्हाँदिबै अरू ह्रेंर्बै म्हिमैं, थेद्। 17 इस्राएली ह्रेंर्बै परमेश्‍वरजी ङ्योए खेमैं त्हाँइ। चमैं मिश्र ह्‍युलर टिमा खीजी चमैंलाइ थेबै ह्रें लमिंइ, धै खीए शक्‍ति मुँबै योजी चमैं च ह्‍युलउँइँले तेसि पखमिंइ।✡13:17 प्रस 1:7; प्रस 12:51 18 प्लिच्यु बर्ष समा क्यु आयोंबै क्ल्ह्‍योर खीजी चमैं छेनाले ङ्‍ह्‍योमिंइ।✡13:18 गन्ती १४:३४; व्य १:३१ 19 झाइले खीजी कनान ह्‍युलर्बै ङिउँलो ह्रेंमैंलाइ नास लसि च ह्‍युलर्बै हग ङ्योए खेमैंलाइ पिंइ।✡13:19 व्य 7:1; यहो 14:1 20 च के लमा प्लिब्ब्रासे ङ्‍हच्यु बर्ष तल।

“च लिउँइ परमेश्‍वरजी ङ्योए खेमैंलाइ जोगेमिंबै ल्हागिर खीए ताँ बिमिंबै शामूएलए पलो समा चमैंए ल्हागिर निसाफ लबै म्हिमैं पिंइ।✡13:20 न्याय 2:16; १ शमू 3:20 21 च लिउँइ ङ्योए खेमैंइ म्रुँ ह्रिइ, धै परमेश्‍वरजी बेन्यामीन कुलर्बै किशाए च्ह शाऊल प्लिच्यु बर्ष समा चमैंए म्रुँ तल् पिंइ।✡13:21 १ शमू 8:5; १ शमू 10:21 22 झाइले परमेश्‍वरजी शाऊल स्योवासि दाऊदलाइ चमैंए म्रुँ तल् पिंइ। दाऊदए बारेर परमेश्‍वरजी ग्वाइ पिंसि बिइ, ‘ङए खों न्होंर मैंब् धोंबै म्हि ङइ यिशैए च्ह दाऊद योंइ। ङए सैंर मैंबै ताँन् के चइ लब्मुँ।’✡13:22 १ शमू 13:14; १ शमू 16:12; भज 89:20 23 परमेश्‍वरजी बाछा लब् धोंले दाऊदए सन्तानउँइँले इस्राएलीमैं जोगेमिंबै ल्हागिर खीजी येशूलाइ कुल्मिंइ। 24 खी युब् भन्दा ओंसों यूहन्‍नाइ इस्राएलर्बै ताँन् म्हिमैं परमेश्‍वरउँइ सैं एसि बप्‍तिस्मा किंन् बिदै खन्तोंदोंन् बिप्रल। 25 यूहन्‍नाइ ह्रोंसए केमैं खाँबि छेमा छ बिल, ‘क्हेमैंइ ङ खाब् जा बिसि मैंल? जोगेमिंबै म्रुँ ख्रीष्‍ट ङ आङिं। दिलेया ङए लिउँइ म्हि घ्रि युसिन् मुँ, खीए प्हलेर्बै जुत्ताए तनि प्‍ल्हबर ङ्हेंब ङ आरे।’✡13:25 यूह 1:20; मत्ती 3:11; मर्क 1:7; लूक 3:16; यूह 1:27

26 “ओ आघें-अलिमैं, अब्राहामए सन्तान्मैं, नेरो परमेश्‍वर म्हाँदिबै अरू ह्रेंर्बै म्हिमैं! परमेश्‍वरजी ङ्योए ङाँर्न चु जोगेमिंबै ताँ कुल्मिंइँमुँ। 27 दिलेया यरूशलेमथेंमैं नेरो चमैंए क्रथे मिंथेमैंइ येशू खाब् जा बिसि ङो आसेल, धै प्रिबै त्हिंइ ह्रोंसे अगमवक्‍तए ताँ खेलेया, चमैंइ च ताँ तो जा बिसि आक्होल। छतसि चमैंइ येशूलाइ सजैं पिंसि अगमबक्‍तामैंइ खीए बारेर ओंसोंन् पोंब् धोंले पूरा लइ। 28 खीलाइ सिल् त्हुबै छ्याब् तोइ आयोंलेया चमैंइ खीलाइ सैल् त्हुम् बिसि च ह्‍युलर्बै रोमी क्र थे पिलातस ङाँर ह्‍यासि यो छ्युँ लइ। 29 खीए बारेर स्योंमन् प्ह्रिबै ताँन् ताँमैं लल् खाँबै लिउँइ चमैंइ खीलाइ क्रूसउँइँले तवासि उर मुँबै छगोंर थेंइ। 30 दिलेया परमेश्‍वरजी खी सिबइले धबै सोगों लमिंइ। 31 झाइले ल्हें त्हिंइ समन् ह्रोंसने बालु गालीलउँइँले यरूशलेमर खब्मैंने खी सोगों तसि त्होब्रें लइ। तोगो च म्हिमैं इस्राएलीमैंए उँइँर खीलाइ म्रोंइ बिसि ग्वाइ पिंब्मैं ग।

32 “परमेश्‍वरजी येशू सिबइले धबै सोगों लमिंसि खीजी ङ्योए खेमैंने फैबै बाछा ङ्योए ल्हागिर्न पूरा लमिंइ। चु सैं तोंबै ताँ ङि क्हेमैंए ङाँर पखइमुँ। 33 छाबन् भजनसंग्रह ङ्हिंरै या प्ह्रिइमुँ,

38 “छतसि, ओ आघें-अलिमैं, चु येशूउँइँलेन् पापए क्षमा तम् बिसि क्हेमैंइ सेल् त्हुम्। 39 मोशाइ पिंबै ठिमउँइँले क्हेमैं पापमैंउँइँले फ्रेयाल् आखाँमल, दिलेया येशूए फिर बिश्‍वास लब्मैंइ खीउँइँलेन् च ताँन् पापमैंउँइँले फ्रेयाइमुँ। 40 छतसि न्ह क्रों मि क्रों तद्, आस्याँ अगमबक्‍तामैंए कितबर प्ह्रिबै नास तबै ताँमैं क्हेमैंए फिर्न खब्मुँ:

42 चु ताँमैं बिबै लिउँइ पावल नेरो बारनाबास च्हों धिंउँइँले बैरु त्होंल् म्हैमा “तारे खबै प्रिबै त्हिंइरै या छाबै ताँमैं बिमिंन् ओ!” बिसि म्हिमैंइ चमैंने यो छ्युँ लइ। 43 च्हों धिंर्बै ताँमैं खाँबै लिउँइ ल्‍हें यहूदीमैं नेरो यहूदी धर्म म्‍हाँदिबै अरू ह्रेंर्बै म्‍हिमैं पावल नेरो बारनाबासए लिलि प्रइ। धै पावल नेरो बारनाबासइ चमैंए सैं भोंब लमिंसि बिइ, “परमेश्‍वरए दयाम्हाँयार खोंयोंन् बिलै तरिद् ओ।”

44 अर्को प्रिबै त्हिंइर सहरर्बै त्हेन् म्हिमैं प्रभु येशूए बारेर्बै ताँ थेबर खइ। 45 छले च्हौ ल्हें म्हि खब् म्रोंसि बिश्‍वास आलबै यहूदीमैं बेल्‍ले ह्रिस खइ, धै पावलइ बिबै ताँ थोसि चलाइ आछ्याँन्ले स्यारइ। 46 छान् तलेया पावल नेरो बारनाबासइ आङ्हिंन्ले बिइ, “परमेश्‍वरए ताँ धाँसे ओंसों क्हेमैं यहूदीमैंनेन् बिल् त्हुमल। दिलेया क्हेमैंइ चु ताँ थेल् आङिंसि खोंयोंन् बिलै आखाँबै छ्ह योंदा आङ्हाँमा तारे ङि अरू ह्रेंमैं ङाँर ह्‍याम्। 47 तलेबिस्याँ प्रभुजी ङिने छान् लद् बिइमुँ:

48 पावलइ बिबै ताँ थेसि अरू ह्रेंमैं सैं तोंइ, धै परमेश्‍वरए ताँ बेल्‍ले छ्याँब मुँ बिसि थेब् लइ, धै खोंयोंन् बिलै आखाँबै छ्ह योंबर परमेश्‍वरजी ओंसों ओंनोंन् त्हाँब्मैंइ येशूए फिर बिश्‍वास लइ।

49 छतमा प्रभुए ताँ ताँन् ह्‍युलजरे थेनेइ। 50 दिलेया यहूदीमैंइ परमेश्‍वरलाइ म्हाँदिबै थेबै कुलर्बै च्हमिरिमैं नेरो च सहरर्बै चिब्मैं सुरिदिवामा चमैंइ पावल नेरो बारनाबासए बिरोध लसि चमैंलाइ खेंमैंए ह्‍युलउँइँले ल्हावाइ। 51 छलमा चमैंइ ह्रोंसए प्हलेर्बै त्हुला चमैंए बिरोधर खारसि आइकोनियन बिबै सहरर ह्‍याइ। 52 दिलेया एन्‍टिओखियार्बै चेलामैं पबित्र प्ल्हजी प्लिंसि सैं तोंइ।