1 च लिउँइ अग्रिपासइ पावलने बिइ, “तारे क्‍हिइ ह्रोंसए ताँ बिद्।”

छबिमा पावलइ यो स्‍योंसि ह्रोंसलाइ जोगेबै ताँ छले बिबर होंइ, 2 “ओ अग्रिपास म्रुँ! यहूदीमैंइ ङए फिर ल्हैदिबै ताँन् छ्याबए बारेर्बै ताँमैंउँइँले ह्रोंसलाइ जोगेबर तिंयाँ ङइ क्हिए उँइँर बिल् योंमा ङ बेल्‍ले ङ्‍हो सब् मुँना ङ्हाइमुँ! 3 यहूदीमैंए ताँन् रोसमैं नेरो छलफल लबै ताँमैं क्हिइ छेनाले सेइमुँ। छतसि गार आम्हाँदिल्‍ले ङए ताँ थेमिंन् बिसि ङ यो छ्युँ लमुँ।

4 “ङए ह्‍युलर नेरो यरूशलेमर ङ फ्रेंसि तब् ओंनोंन् ङइ खैले छ्ह थोइ, तो-तो लइ, बिबै ताँमैं ताँन् यहूदीमैंइ सेइमुँ। 5 ङ्योए यहूदीमैंए धर्म न्होंरि फरिसीमैं ताँन् भन्दा कट्टर टोलि मुँ। ङै या फरिसी तसि छ्ह थोमल बिसि ओंसों ओनोंन् चमैंइ सेइमुँ। चमैंइ बिदा ङ्हाँस्याँ चु ग्वाइ पिंल् खाँम्।✡26:5 चिब्मैं २३:६; फिलि ३:५ 6 परमेश्‍वरजी ङ्योए स्योंम्बै खेमैंने फैबै बाछार ङइ आशा थेंबइले तिंयाँ ङ क्हेमैंए उँइँर राल् त्हुइमुँ। 7 परमेश्‍वरजी फैबै बाछा योंबर ङ्योए च्युसे ङ्हिं कुलमैंइ त्हिंयाँ, म्हुँइँस सैं घ्रिले खीए मिं क्वेरिम्। ओ म्रुँ, छले ङज्यै या चु आशा थेंबइले ङए फिर यहूदीमैंइ छ्याब् ल्हैदिइमुँ। 8 परमेश्‍वरजी सियाब्मैं धबै सोगों लमिंब्मुँ बिबै ताँ क्हेमैं तले क्वेंल् आखाँ?

9 “ओंसों ङज्यै या नासरतर्बै येशूए मिंर खाँन् समा या बिरोध लल् त्हुम् बिसि मैंमल। 10 ङइ यरूशलेमर छान् लइ। ख्रो पिंबै खेगि चिब्मैंउँइँले हग योंसि प्रभुए म्हिमैं झेलर झोंब् मत्‍त्रे आङिं, चमैं सैवामा ङै या चमैंने त्हुँल। 11 ल्हें खे ङइ चमैंने ‘तारेसेरो नासरतर्बै येशूए फिर बिश्‍वास आलद्’ बिसि च्हों धिंजरे सजैं पिंबर ल्हैदिइ, धै चमैं म्रोंसि ङ बेल्‍ले ह्रिस खसि अरू ह्‍युलर्बै सहरजरे या ह्‍यासि चमैंलाइ ह्रुगुदिइ।✡26:9-11 चिब्मैं ८:३; २२:४,५

12 “प्रभु येशूए फिर बिश्‍वास लबै म्हिमैं ह्रुगुदिबर ख्रो पिंबै खेगि चिब्मैंउँइँले हग योंसि ङ दमस्कस शहारउँइ ह्‍याइ। 13 ओ अग्रिपास म्रुँ, च त्हिंइ आधार ङि घ्याँर ह्‍यारिमा त्हिंयाँ भन्दा चारबै ह्‍वे ङइ स्वर्गउँइले युब म्रोंइ। च ह्‍वे ङ नेरो ङने ह्‍याब्मैंए कारग्युले चाररिल। 14 च ह्‍वेइ लमा ङि ताँन् सर क्हुरियाइ। धै हिब्रू क्युइर ङने, ‘ओ शाऊल, शाऊल, क्हिइ तले ङ छले ह्रुगुदिरिल? क्हिए प्‍हलेइ म्ह्रु छु तबै प्हरेर ल्हिमा क्‍हिलाइन नब्मुँ,’ छ बिरिबै कै ङइ थेइ। 15 झाइले ङइ ‘ओ प्रभु क्‍हि खाब् जा?’ बिसि ङ्योएमा प्रभुजी बिइ, ‘ङ क्हिइ ह्रुगुदिरिबै येशू ग। 16 तारे रेद्। क्‍हि ङए सेवा लबर नेरो ङए ग्वाइ पिंबर त्हाँइमुँ। छतइरि ङ क्‍हि ङाँर म्रोंयुइमुँ। तिंयाँ क्हिइ ङ म्रोंबै ताँ नेरो तारे पिरु ङइ क्‍हिने उँइँमिंबै ताँमैं या क्‍हिइ ग्वाइ पिंल् त्हुम्। 17 क्हिए ह्रेंमैं नेरो अरू ह्रेंमैं ङाँर ङइ क्हिलाइ कुल्मिंब्मुँ। चमैंउँइँले ङइ क्‍हिलाइ जोगेमिंब्मुँ। 18 चमैं मिछु खैबाउँइँले चारबै व्हेर खरिगे धै दुष्‍टए शक्‍तिउँइँले फ्रेसि परमेश्‍वरउँइ एरिगे बिसि क्हिइ चमैंए मि थोंमिंन्। छले चमैंइ पापए क्षमा योंब्मुँ धै ङए फिर बिश्‍वास लसि पबित्र तबै म्हिमैं टिबै क्ल्ह्‍योर चमैं टिल् योंब्मुँ।’

19 “छतसि, ओ अग्रिपास म्रुँ, स्‍वर्गउँइँले बिबै ताँ ङइ ङिंइ। 20 ङ ओंसों डमस्‍कस नेरो यरूशलेम सहरजरे, यहूदीमैंए ताँन् ह्‍युलरि, झाइले अरू ह्रेंमैंए ह्‍युलरै या ह्‍यासि पाप केमैं पिसि परमेश्‍वरउँइ सैं एद् धै ह्रोंसइ सैं एइ बिब उँइँबर छ्याँबै केमैं लल् त्‍हुम् बिसि लोमिंइ।✡26:20 चिब्मैं ९:२०,२८,२९ 21 छबिमा यहूदीमैंइ मन्दिरर ङलाइ क्हासि सैल् म्हैइ। 22 दिलेया तिंयाँबै त्हिंइ समा परमेश्‍वरजी ङलाइ जोगेमिंइमुँ। छतसि तिंयाँ चुर मुँबै थेब, च्योंब, ताँनए उँइँर चु ताँमैंए ग्वाइ पिंदै ङ चुर राल् योंइमुँ। अगमबक्‍तामैं नेरो मोशाइ लिउँइ तखब्मुँ बिबै ताँमैं बाहेक अरू ङइ तोइ आबिइमुँ। 23 तो ताँमैं जा बिस्याँ, परमेश्‍वरजी कुल्मिंबै म्रुँ ख्रीष्‍टजी दुःख योंसि सिल् त्हुब्मुँ, धै सिसि धबै सोगों तब्मैंए न्होंर ताँन् भन्दा ओंसों खी सोगों तसि ह्रोंसए यहूदी ह्रें नेरो अरू ह्रेंमैंने या परमेश्‍वरए ह्‍वे सेल् पिंब्मुँ बिसि चमैंइ बिल।”✡26:23 १ कोर 15:20; यशै 42:6; 49:6

24 पावलइ बिबै चु ताँ थेसि फेस्‍तसइ थेबै कै तेसि बिइ, “ओ पावल, क्‍हि सोबाल् तयाना! ल्हें ह्रब् सेबइ क्हि सोबाल् लवाना!”

25 दिलेया पावलइ बिइ, “ओ चिब फेस्‍तस, ङ सोबाल् तब् आङिं। ङइ क्ह्रोंसेंन्बै नेरो च्हैंसि मैंसि ताँमैं पोंमुँ। 26 अग्रिपास म्रुँइ चु ताँए बारेर सेइमुँ। छतसि चए उँइँर ङ आङ्हिंन्ले पोंइँनमुँ। खिइ चु तोन्दोंरि ताँ सेइमुँ, तलेबिस्याँ चु ताँ खाबज्यै आसेल्‍ले लबै ताँ आङिं। 27 ओ अग्रिपास म्रुँ, क्‍हिइ अगमबक्‍तामैंइ प्ह्रिबै ताँ क्वेंम्मा? क्हिइ क्वेंम् बिब ङइ सेइमुँ।”

28 अग्रिपासइ पावलने बिइ, “तिस्यार्न क्हिइ ङ ख्रीष्‍टियान लल् म्हैल् वा?”

29 पावलइ बिइ, “तिस्यार्न मुरिद् उ ल्हें त्हेर्न मुरिद्, चु सँउँलिमैं पिसि, क्हि मत्‍त्रे आङिं, तिंयाँ ङए ताँ थेब्मैं ताँन् ङ धोंबन् तरिगे बिसि ङ परमेश्‍वरने प्राथना लम्।”

30 पावलइ चु ताँ बिमा चर्बै अग्रिपास म्रुँ, क्रथे फेसतुस, बरनिकि, नेरो चर टिब्मैं ताँन् रेयाइ। 31 झाइले चमैं त्होंह्‍याबै लिउँइ, “चु म्हिइ झेलर च्युल् त्हुब नेरो सैल् त्हुबै के तोइ आलइमुँ,” बिसि खें-खेंमैंए न्होंर्न ताँ लइ। 32 धबै अग्रिपास म्रुँइ फेस्तसने बिइ, “चइ कैसर म्रुँ ङाँर चए मुद्दा फैसला लरिगे बिसि यो छ्युँ आलस्याँ पिवालै खाँमल।”