1 झाइले ङि इटालिया ह्‍युलर ह्‍याल् त्हुम् बिसि क्रथे फेस्‍तसइ निर्नय लइ। छतमा चमैंइ पावल नेरो अरू कैदिमैं युलियस मिं मुँबै कप्‍तानए जिम्मार पिंइ। च “आगस्ट थेबै म्रुँ” बिबै फौजर्बै कप्‍तान घ्रि मुँल। 2 ङि एड्रामिटेनोस सहरउँइँले एशिया ह्‍युलए रे-रेबै क्ल्ह्‍यो ततै ह्‍याबै क्यु झाजर क्रेइ। छले ह्‍यामा माकेडोनिया ह्‍युलर्बै थेसलोनिकाथें अरिस्‍तार्खस बिबै म्हि घ्रि या ङिने बालु मुँल। 3 प्‍हँन्हाँग्धों ङि सिदोन बिबै सहरर फेनेइ। चर कप्‍तान युलियसइ पावलए फिर ल्हयो खसि चने “क्हिलाइ तोइ सैमैं खाँचो तस्याँ क्हिए थुमैं ङाँर ह्‍यासि चैदिबै सैमैं किंल् खाँम्,” बिइ। 4 च क्ल्ह्‍योउँइँले ङि क्रेबै क्यु झाज धबै मा ङ्युँइउँइ ह्‍यारिमा मा ङ्युँइर थेबै खैं खबइले ङि खैंउँइँले जोगेरिगे बिसि साइप्रस बिबै टापू लिउँइ ततै ह्‍याइ। 5 झाइले किलिकिया नेरो पामफिलियाए क्योंजउँइँबै मा ङ्युँइर फेसि ङि लुकिया ह्‍युलर्बै माइरा बिबै सहरर फेखइ। 6 चर इटालिया ह्‍युलर ह्‍याबै अलेक्‍जेन्ड्रिया सहरर्बै क्यु झाज घ्रि स्यासि कप्‍तानइ ङि चर क्रेमिंइ। 7 खैंइ लमा क्यु झाज क्हैनाँले प्रबइले ल्हें त्हिंइ छ्युसि गार्ले ङि क्‍निडस बिबै क्ल्ह्‍योर फेखइ। खैंइ क्यु झाज ओंसों ह्‍याल् आपिंबइले ङि क्रेट बिबै टापूए पूर्व नेरो दक्षिण हारउँइ ह्‍याइ, तलेबिस्‍याँ चर खैं ल्‍हें आचल्‍दिमल। चर ह्यामा सालोमोन बिबै क्‍ल्‍हो म्रोंइ। 8 बेल्‍ले गार्ले टापूए रे-रे ततै ङि “क्यु झाज न्हबर छ्याँब” बिबै क्ल्ह्‍योर फेखइ। च क्ल्ह्‍योउँइँले लासिया बिबै सहर चेंदोन् मुँल।

9 ङि चर फेबर ल्हें त्हे ह्‍याल् खाँल, धै पछुत लसि बर्त टिबै चाड*27:9 बर्त टिबै चाड च चाड आसोज ह्रोंसे म्हाँदिमल (लेबी १६:२९-३१)। या ह्‍‍याल् खाँल। धै मा ङ्युँइर ह्‍याबै या ङ्हिंन् ङ्हाँन् तल। छतसि पावलइ म्हिमैंने छले बिइ, 10 “ओ थुमैं, ङए सैंर छुइले ङ्यो ह्‍याइ बिस्याँ क्यु झाज नेरो समनए नोक्सन् मत्‍त्रे आङिं, ङ्योए ज्यु या ह्‍यालै ङ्हाँइमुँ।” 11 दिलेया कप्‍तानइ पावलए ताँ आथेल्‍ले क्यु झाज ओलेबै म्हि नेरो क्यु झाजए क्ल्हेए ताँ क्वेंइ। 12 च क्यु झाज न्हबै क्ल्ह्‍योर सर्ख थोब गारो तबइले खैलसे या फोनिक्‍सर्न फेनेसि सर्ख थोल् त्हुम् बिसि चर मुँबै ल्हें म्हिइ क्यु झाज ओलेद् बिइ। फोनिक्‍स क्रेट ह्‍युलर्बै क्यु झाज न्हबै क्ल्ह्‍यो घ्रि ग, च ल्हुउँइ न्हुउँइ (दक्षिण-पश्चिमउँइ) नेरो ताइ न्हुउँइ (उतर-पश्चिमउँइ) ह्‍वेंब मुँ।

13 च त्हेर ल्हुँउँइँले (दक्षिणउँइँले) खैं च्युगु च्युगु खबर होंमा चमैंइ सैंर मैंब् धोंन् तइ ङ्हाँसि क्यु झाज फैथेंबै अँगुसि†27:13 अँगुसि क्यु झाज ह्‍याल् आपिंबै सै - नेपालि: लङ्गर तेवासि चमैं क्रेट बिबै टापूए रे-रे ततै ह्‍याबर होंइ। 14 छले ह्‍यारिबै तिस्या दे लिउँइ च टापू पट्टिउँइँले बेल्‍ले थेबै उत्तर-पूर्व बिबै खैं खइ। 15 छले थेबै खैं खमा ङिइ क्यु झाज ओलेल् आखाँसि क्यु झाज खनि ह्‍यालै ह्‍यारिगे बिसि पिवाइ। 16 छले क्यु झाज ह्‍यामा क्‍लौडा बिबै च्युथिरि टापू ङाँर फेनेबै लिउँइ ङिइ बेल्‍ले गार्ले क्यु झाजर्बै डुँङ्गा जोगेल् खाँइ। 17 च डुङ्गा कैंडो क्वेबै लिउँइ क्यु झाज ओलेब्मैंइ क्यु झाज तोइ आतरिगे बिसि क्यु झाज छोमैंइ भोंन्ले फैइ। धै सिरटिस् बिबै क्यु न्होंर्बै बालुवाए खादर क्होयाम् उ बिब् ङ्हिंसि चमैंइ पालमैं खारवाइ। छतमा क्यु झाज क्युए फिर्न ल्हाइ टिइ। 18 थेबै नाँ-खैंइ लमा क्यु झाजर ङि छाइ खैने माइ खै तबर होंइ, छतमा प्हँन्हाँग्धों चमैंइ क्यु झाज योंरिगे बिसि क्यु झाजर्बै समनमैं भ्योंबर होंइ। 19 झाइले सोंरोर चमैंइ खेंमैंए योइन झाज ओलेबर चैदिबै सैमैं नेरो छोमैं या भ्योंवाइ। 20 ल्‍हें त्हिंइ समा ङिइ त्हिंया नेरो मुसारामैं तोइ म्रोंल् आयों। नाँ-खैं खबै-खब् तरिमा सोबै आशा या ङिला म्हयाल।

21 ल्हें त्हिंइ समा म्हिमैंइ तोइ चल् आयोंल। छतमा पावलइ चमैं ङाँर खसि बिइ, “ओ थुमैं, क्हेमैंइ ङए ताँ ङिंसि क्रेटउँइँले क्यु झाज आओलेल् त्हुमल, धै छाबै दुःख नेरो नोक्सान् क्हमैंइ आयोंमल। 22 दिलेया क्हेमैं आङ्हिंन्। क्हेमैं खाबै या सिरिब् आरे, क्यु झाज बिस्याँ नास तयाब्मुँ। 23 तलेबिस्याँ ङ परमेश्‍वरए म्हि ग, ङ खीए सेवा लमुँ, धै खीए स्वर्गदूत घ्रि तिंयाँ म्हुँइँसर ङ ङाँर रायुइ। 24 च स्वर्गदूतइ ङने बिइ, ‘ओ पावल, आङ्हिंन्! क्हि कैसर म्रुँए उँइँर खैलसे या राल् त्हुम्। धै क्हिने क्यु झाजर क्रेब्मैं ताँनए ज्यु परमेश्‍वरजी क्हिए योर पिंइमुँ।’ 25 छतसि, ओ थुमैं, आङ्हिंन्! परमेश्‍वरजी ङने खै बिइमुँ, छान् तब्मुँ बिसि ङ खीए फिर बिश्‍वास लम्। 26 दिलेया ङ्यो टापू घ्रिर थुरल् त्हुब्मुँ।”

27 छले ङि क्रेबै क्यु झाज नाँ-खैंए न्होंर एड्रियास बिबै मा ङ्युँर छाइ खैने माइ खै तरिब च्युसे प्लि त्हिंइ तल् खाँल। च्हमरे म्‍हुँइँस आ‍धाजरे क्यु झाज ओलेब्मैंइ स मुँबै क्ल्ह्‍योर फेखब्धों ङ्हाँइ। 28 झाइले चमैंइ मा ङ्युँइ कति गैरु मुँना बिसि छोइ च्हैंमा सोंच्यु से ङि मिटर मुँना बिसि सेइ, धबै दे क्याइ ह्‍यासि गैरु च्हैमा चमैंइ ङ्हिस्युसे ट्हु मिटर मुँना बिसि सेइ। 29 झाइले क्यु च्युगुदे ततै ह्‍यामा खनिज्यै क्यु झाज युँमार थुरयाम् उ बिसि ङ्हिंसि चमैंइ क्यु झाजए लिउँइँले अँगुसि मुँबै सँउँलिमैं प्लिउँलो खारवाइ, धै युनन् नाँ न्होंरिगे बिसि प्राथना लबर होंइ। 30 छले प्राथना लरिमा क्यु झाज ओलेब्मैंइ क्यु झाजए ओंसोंबै सँउँलि खारबै निउ लसि डुँङ्गा मा ङ्युँइर तवासि खेंमैं भौदिल् म्हैरिल। 31 छतमा पावलइ कप्‍तान नेरो सिपाइमैंने बिइ, “चु म्हिमैं क्यु झाजर आटिइ बिस्याँ क्हेमैं सोल् खाँरिब् आरे।” 32 चु ताँ थेसि सिपाइमैंइ डुँङ्गा फैबै छोमैं क्ह्‍याँसि डुँङ्गा क्युर भ्योंवाइ।

33 मि म्रोंबि छेमा पावलइ चमैंने बिइ, “क्हेमैं न्हुँ लसि तोइ आचल्‍ले टिब तिंयाँ च्युसे प्लि त्हिंइ तल् खाँइ। 34 छतसि ङ क्हेमैंने बिमुँ, चबै सै चद्। चब् चस्याँ क्हेमैंइ भों योंब्मुँ, धै क्हेमैं खाबलै या क्रप्हो घ्रि या खाररिब् आरे।” 35 छबिसि पावलइ क्हें किंसि ताँनए उँइँर परमेश्‍वरलाइ धन्यबाद पिंइ, धै क्हें लुँसि चबर होंइ। 36 चमैं सैं भोंल् योंसि सैं तोंदै चब् चइ। 37 (क्यु झाजर ङि ताँन् लसि ङ्हिंब्ब्रासे ङिच्युसे ट्हु म्हिमैं मुँल।) 38 धै म्रेंनाले चब् चबै लिउँइ, चमैंइ क्यु झाज योंरिगे बिसि गहुँए बोरामैं मा ङ्युँइर भ्योंवाइ।

39 मि म्रोंयाबै लिउँइ क्यु झाज ओलेब्मैंइ माँ ङ्युँइँए छेउ म्रोंइ, दिलेया खनर फेखइ बिब आसे। दिलेया चमैंइ क्यु झाज टिल् खाँब् धों ब्योंब बलुवा मुँबै क्ल्ह्‍यो घ्रि म्रोंइ। धै खाँन् समा क्यु झाज चए रेर बोबै सैं लइ। 40 छतसि चमैंइ क्यु झाज फैबै सँउँलिमैं खारवासि क्युर पिवाइ। धै क्यु झाज ओलेबै सैमैं फैथेंबै छोमैं प्ल्हवासि ओंसोंबै पाल क्वेसि खैं खबै हाराइ तोमिंमा क्यु झाज माँ ङ्युँइँए छेउउँइ चैं बोइ। 41 क्यु झाज छले ह्‍यारिमा क्यु न्होंर्बै बालुवाए रासर थुरसि चर्न क्होयाइ, धै क्यु झाजए ओंसोंबै भाग क्होयासि ओलेल् आखाँ। छतमा लिउँइँबै भाग क्युए भेल्गइ चोवाबर होंइ। 42 च त्हेर कैदिमैं क्युर क्योवालसि न्हेह्‍याम् उ बिब् मैंसि सिपाइमैंइ चमैं सैबै सैं लइ। 43 दिलेया कप्‍तानइ पावल जोगेबै सैं लसि चमैंलाइ छ लल् आपिं। बरु “क्योवालल् खाँम्मैं ताँन् क्यु झाजउँइँले ओंसों फाल् न्हेसि छेउउँइ त्होंन्। 44 धै अरू चर मुँब्मैं फालेजरे नेरो क्यु झाजए टुक्‍क्रजरे क्हासि क्योंजा ह्‍याद्,” कप्‍तानइ बिइ। छले ङि ताँन् छेनाले नें आम्योंल्‍ले मा ङ्युँइए छेउर फेइ।