2
1 क्हेमैं कलस्सिथेंमैं, लाउडिकियाथेंमैं नेरो ङ खोंयोंइ या आम्रोंब्मैं ताँनए ल्हागिरै या ङइ बेल्ले दुःखले के लइमुँ बिबै ताँ क्हेमैंइ सेरिगे बिब ङए सैं मुँ। 2 क्हेमैं ह्रों-ह्रोंसए न्होंर म्हाँयार सैं घ्रि तसि क्हेमैंए सैं भोंब् तरिगे, धै परमेश्वरउँइँले खबै क्ह्रोंसेंन्बै बुद्धिइ प्लिंसि परमेश्वरइ लोथेंबै ताँ क्हेमैंइ सेरिगे। च ताँ तो जा बिस्याँ, येशू ख्रीष्ट ङो सेल् योंब् ग। 3 तलेबिस्याँ ताँन् ज्ञान बुद्धिमैं ख्रीष्टनेन् मुँ। 4 स्योलिबै ताँमैं पोंसि खाबज्यै क्हेमैं लुल् आखाँरिगे बिसि ङ क्हेमैंने बिइमुँ। 5 तलेबिस्याँ ङ क्हेमैंउँइँले ह्रेंगो मुँलेया ङ खोंयोंन् बिलै क्हेमैंलाइ मैंरिम्। क्हेमैं ख्रीष्टए फिर बिश्वास लबर भोंब् तसि बालुले टिरिब् म्रोंसि ङए सैं तोंइमुँ।
येशू ख्रीष्टउँइँले खाँसों ङ्हाँन् तब
6 छतसि क्हेमैंइ ख्रीष्ट येशूलाइ प्रभु बिसि म्हाँदिब् धोंले खीनेन् घ्रि तसि छ्ह थोद्। 7 खैले सिं धुँए जरा सरि न्होंन्हों च्योंमु, छलेन क्हेमैं छ्ह थोमा ख्रीष्टलाइ सैं पिंसि भोंब् तद्। इपाफ्रासइ क्हेमैंलाइ लोमिंब् धोंलेन् ख्रीष्टए फिर अझै बिश्वास भोंब् लद्। धै खोंयोंन् बिलै धन्यबाद पिंबै सैं प्ह्याद्।
8 छतसि न्ह क्रों मि क्रोंले टिद्! म्हिउँइँले खबै केर आफेबै स्योलिबै ताँइ क्हेमैं परमेश्वरए क्ह्रोंसेंन्बै घ्याँउँइँले फ्रेल् आखाँरिगे। छाबै स्योलिबै ताँमैं ख्रीष्टउँइँले खब आङिं, ह्युल ग्याल्स ओलेबै मोंमैंउँइँले नेरो म्हिमैंइ लबै रोसमैंउँइँले खब् ग। 9 छतसि छाबै स्योर ताँ आक्वेंन्, तलेबिस्याँ परमेश्वरने मुँबै ताँन् गुनमैं येशू ख्रीष्टने मुँ। 10 क्हेमैं ख्रीष्ट येशूने घ्रिन् तबइले छ्हर योंल् त्हुबै ताँन् सैमै योंबै क्ल्ह्योर क्हेमैं फेखइमुँ। ताँन् शक्तिमैं नेरो ग्याल्समैंए फिर्बै थेब खीन् ग।
11 ख्रीष्टए फिर बिश्वास लसि क्हेमैं ज्युर चिनु लब् धोंन् तइ। दिलेया च ज्युर चिनु लब म्हिमैंइ लब आङिं, ख्रीष्टजी लबै सैंर्बै चिनु ग। ख्रीष्टजी च सैंर्बै चिनु लमा क्हेमैंए सैंर्बै आछ्याँबै सिमैं थोवाइ। 12 छलेन क्हेमैं क्युर प्ल्हुँसि बप्तिस्मा किंमा क्हेमैं ख्रीष्टनेन् बालु सिसि पाब् ग। परमेश्वरजी ख्रीष्टलाइ सिबइले धबै सोगों लमिंल, धै क्हेमैंइ खीए शक्तिए फिर बिश्वास लबइले खीजी क्हेमैंलाज्यै या ख्रीष्टनेन् बालु सोगों लमिंइमुँ।✡2:12 रोम ६:४ 13 ओंसों क्हेमैं ह्रोंसए पाप नेरो ज्युर चिनु आलबइले सिरिल, दिलेया परमेश्वरजी ङ्योए ताँन् पाप क्षमा लमिंसि ख्रीष्टने बालुन् सोगों लमिंइ।✡2:13 एफि २:१-५ 14 ङ्योए पापइ लमा ङ्योइ योंल् त्हुबै सजैं प्ह्रिथेंबै तमसुक नेरो ङ्योए फिर छ्याब् ल्हैदिबै कानुनमैं परमेश्वरजी क्रूसर च्योमिंसि मेटिदिवाइ।✡2:14 एफि २:१५ 15 येशू ख्रीष्ट क्रूसर सिमिंसि खीजी च ताँन् दुष्टए शक्ति मुँबै सैमैं केर आफेब् लवासि ट्होवाइमुँ। धै “चमैं ताँन् ङए न्होंर मुँ” बिसि खीजी ताँन् म्हिमैंए उँइँरि चमैं फाफेल् लवाइ।
16 छतसि चब-थुँब, चाड म्हाँदिब, औंसि नेरो प्रिबै त्हिंइ म्हाँदिबै बारेर क्हेमैंलाइ खाबज्यै छ्याब् आल्हैदिरिगे।✡2:16 रोम १४:१-६ 17 चु ठिममैं पक्का ताँ आङिं, छरि मत्त्रे ग, दिलेया ख्रीष्ट युसेरो खी मत्त्रे क्ह्रोंसेंन्बै म्हाँदिल् त्हुबै परमेश्वर ग। 18 को-कोइइ “ह्रोंसन् च्योंब् तसि स्वर्गदूतमैंलाइ म्हाँदिल् त्हुम्,” बिम्। “ङिइ थेबै दर्शन म्रोंइ” बिसि प्हैंम्, चमैंइ खेंमैंए आछ्याँबै सैंइ तोन-तोर्न थेब् प्हैंम्। छतसि चमैंइ क्हेमैंइ योंल् त्हुबै इनाम योंल् आखाँन् आलरिगे। 19 छाबै म्हिमैं ख्रीष्टए लिलि आप्र। ख्रीष्ट क्र ग, झाइले बिश्वासीमैं ताँन् खीए ज्यु ग, धै ख्रीष्टउँइँलेन् ताँन् ज्युइ भों योंम्। छले मत्त्रे अँख्ला बाख्लमैं त्हुँसि ज्यु तम्। छतसि परमेश्वरए सैंर मैंब् धोंलेन् ज्यु बडिदै ह्याम्।✡2:19 एफि ४:१६
ख्रीष्टने सिसि धबै सोब
20 छतसि ख्रीष्टने बालुन् क्हेमैं सिसि चु ह्युल ग्याल्स ओलेबै मोंमैंउँइँले फ्रेइ। छतमा चु ह्युलर्बै म्हिमैंइ धोंले “चु लल् तम्, च लल् आत” बिसि क्हेमैंइ तले छ्ह थोरिमुँ? 21 “चु सै छेल् आत,” “फलना सै चल् आत,” “चने छुइल् आत,” बिबै ताँमैंए लिलि तले प्ररिमुँ? 22 (च ताँन् सै चसि थुँसि म्हयाब् ग।) तलेबिस्याँ च म्हिमैंइ लबै छ्यामैं नेरो चमैंइ लोमिंबै ताँ मत्त्रे ग। 23 चु छ्यामैंइ बिब् धोंले “छले म्हाँदिल् त्हुम्, छुले म्हाँदिल् त्हुम्!” धै “ह्रोंसए ज्युलाइन बेल्ले दुःख पिंसि ह्रोंस च्योंब् लल् त्हुम्!” च ताँमैं बुद्धि मुँब् धों ग बिलेया चमैंल क्ह्रोंसेंन्बै बुद्धि आरे। च छ्यामैंइ ङ्योए ज्युर्बै आछ्याँबै इच्छामैं म्हल् लल् आखाँ।