4
1 ओ क्ल्हेमैं, क्हेमैंलै या स्वर्गर क्ल्हे मुँ बिब् सेसि क्हेमैंइ ठिकले नेरो छेनाले केब्छैंमैं के ल्हैदिद्।✡4:1 एफि ६:९
अरू अर्तिजगो
2 परमेश्वरलाइ धन्यवाद पिंसि आनारल्ले न्ह क्रो मि क्रोंले खोंयोंइ या प्राथना लरिद्। 3 ख्रीष्टए बारेर्बै ओंसों था आसेबै छ्याँबै ताँ*4:3 ओंसों था आसेबै छ्याँबै ताँ च ताँ तो जा बिस्याँ, “यहूदीमैं धोंले अरू ह्रेंमैं या ख्रीष्टने प्रि घ्रिन् तसि परमेश्वरए उँइँर ठिक ठर्दिल् खाँम्।” बिप्रबइले ङ चुर झेलर टिल् त्हुइ। छतसि परमेश्वरजी ङिलाइ च ताँ बिप्रबै छ्याँबै मौका पिंरिगे बिसि ङिए ल्हागिरै या प्राथना लद्। 4 ङइ सैं तोंबै ताँ पोंमा म्हिमैंलाइ छेनाले क्होमिंल् खाँरिगे बिसि ङए ल्हागिर प्राथना लमिंन्।
5 येशू ख्रीष्टए फिर बिश्वास आलब्मैंने न्ह क्रों मि क्रोंले प्रद्। धै क्हेमैंइ मौका योंमा प्रभुए सैं तोंन् लबै केमैं लद्।✡4:5 एफि ५:१६ 6 क्हेमैंइ अरूलाइ खोंयोंइ सैं नल् आलल्ले छ्याँबै सैं मैंसि ताँ पोंल् त्हुम्। धै ताँन् म्हिमैंने खैले जवाफ पिंल् त्हुम् बिसि क्हेमैंइ सेल् खाँम्।
आखिरि ताँमैं
7 ङ्योए खोबै अलि तुखिकसइ ङए बारेर्बै ताँन् ताँ क्हेमैंने बिमिंब्मुँ। च प्रभुए केर ङ्योने बा-बालुन् प्रबै बिश्वास मुँबै म्हि ग।✡4:7 चिब्मैं २०:४; २ तिमो ४:१२ 8 छलेन चइ ङिए बारेर्बै सौंसर क्हेमैंलाइ था सेल् पिंसि सैं क्होल् लमिंरिगे बिसि ङइ चलाइ क्हेमैं ङाँर कुल्मिंब् ग।✡4:7-8 एफि ६:२१-२२ 9 चने बालु क्हेमैंए नाँसर्बै ओनेसिमस बिबै म्हि या ङइ कुल्मिंइमुँ। च येशू ख्रीष्टर बिश्वास लबै खोबै अलि ग। चुर तरिबै ताँन् ताँमैं चमैंइ क्हेमैंने बिमिंब्मुँ।✡4:9 फिले १०-१२
10 ङने बालु झेलर च्युथेंबै थु अरिस्तार्खसइ क्हेमैंने जय मसीह बिमिंइमुँ।✡4:10 चिब्मैं १९:२९; २७:२; फिले २४; चिब्मैं १२:१२,२५; १३:१३; १५:३७-३९ छलेन बर्णाबासए अलि†4:10 अलि युनानि क्युइर्बै चु ताँफुँए अर्थ “अलि” नेरो “ङोंलो” ङ्हिंना-ङ्हिंन् मुँ। फेबै मर्कूसज्यै या क्हेमैंने जय मसीह बिमिंइमुँ। (च मर्कूसए बारेर ङइ क्हेमैंलाइ ओंसों ताँ पिंइ: च क्हेमैं ङाँर खइबिस्याँ चए मान लद्।)✡4:10 चिब्मैं १२:१२,१५; १३:१३; १५:३७-३९ 11 झाइले युस्तस बिबै येशूज्यै या क्हेमैंने जय मसीह बिमिंइमुँ। प्रभुए फिर बिश्वास लबै यहूदीमैं न्होंर चुमैं सों मत्त्रेइ परमेश्वरए ग्याल्सर्बै ताँ बिप्रबै के ङने बालुन् लसेन्मुँ। चुमैंइ ङए सैं बेल्ले क्होल् लमिंइमुँ।
12 क्हेमैं न्होंर्बै अर्को येशू ख्रीष्टए के लबै म्हि इपाफ्रासज्यै या क्हेमैंने जय मसीह बिमिंइमुँ। क्हेमैंए सैं भोंब् तरिगे, ताँन् सैरि पक्का तरिगे, झाइले परमेश्वरजी बिब् धोंले क्हेमैंइ ताँन् लरिगे बिसि चइ खोंयोंइन क्हेमैंए ल्हागिर बेल्ले प्राथना लसेन्मुँ।✡4:12 कल १:७; फिले २३ 13 क्हेमैं कलस्सीथेंमैं, झाइले लाउडिकियाथेंमैं नेरो हिरापोलिसथेंमैंए ल्हागिर चइ गारो के लइमुँ बिसि ङ ह्रोंसन साक्षि पिंल् खाँम्। 14 झाइले खोबै वैद्य लूकाइ नेरो डेमासइ क्हेमैंने जय मसीह बिमिंइमुँ।✡4:14 २ तिमो ४:११; फिले २४; २ तिमो ४:१०; फिले 24
15 लाउडिकिया नाँसर्बै बिश्वासीमैं नेरो ङ्योए अङाँ नुम्फा, झाइले चए धिंर खागु तबै बिश्वासीमैंने ङिए जय मसीह बिमिंन्। 16 क्हेमैंइ चु प्ह्रिछ्या खेल् खाँबै लिउँइ लाउडिकिया नाँसर्बै बिश्वासीमैंने या खैलसे खेल् पिंन्। झाइले ङइ लाउडिकियालाइ पिमिंबै प्ह्रिछ्या क्हेमैंज्यै या खेद्। 17 झाइले अर्खिप्पसने ङउँइँले “क्हिइ प्रभुए सेवा खैले लल् त्हुम् बिसि जिम्मा योंइमुँ, च के पूरा लद्,” बिसि बिमिंन्।✡4:17 फिले २
18 ङए योउँइँले ङइ चु ताँ प्ह्रिइमुँ: ङ पावलउँइँले जय मसीह मुँ। ङ झेलर च्युइमुँ आम्लेल्ले ङए ल्हागिर प्राथना लमिंन्।
परमेश्वरए दयाम्हाँया क्हेमैंने तरिगे।
✡4:1 4:1 एफि ६:९
*4:3 4:3 ओंसों था आसेबै छ्याँबै ताँ च ताँ तो जा बिस्याँ, “यहूदीमैं धोंले अरू ह्रेंमैं या ख्रीष्टने प्रि घ्रिन् तसि परमेश्वरए उँइँर ठिक ठर्दिल् खाँम्।”
✡4:5 4:5 एफि ५:१६
✡4:7 4:7 चिब्मैं २०:४; २ तिमो ४:१२
✡4:8 4:7-8 एफि ६:२१-२२
✡4:9 4:9 फिले १०-१२
✡4:10 4:10 चिब्मैं १९:२९; २७:२; फिले २४; चिब्मैं १२:१२,२५; १३:१३; १५:३७-३९
†4:10 4:10 अलि युनानि क्युइर्बै चु ताँफुँए अर्थ “अलि” नेरो “ङोंलो” ङ्हिंना-ङ्हिंन् मुँ।
✡4:10 4:10 चिब्मैं १२:१२,१५; १३:१३; १५:३७-३९
✡4:12 4:12 कल १:७; फिले २३
✡4:14 4:14 २ तिमो ४:११; फिले २४; २ तिमो ४:१०; फिले 24
✡4:17 4:17 फिले २