1 याहवेहजी मोशाने बिइ, 2 “ओंसोंबै म्हैंनर्बै ओंसोंबै त्हिंइर याहवेहए पबित्र तम्बु क्योद्। 3 ठिम थेंबै मुदुस चर थेंन्, धै चए ओंसों पर्दा च्योद्। 4 टेबलै या न्होंर थेंसि चए फिर सजेबै सैमैं थेंन्, धै पानस न्होंर पखसि चर पलमैं थेंन्। 5 ठिम थेंबै मुदुसए ओंसों धुप म्रोबै ख्रो पिंबै क्ल्ह्‍यो थेंन्, झाइले पबित्र तम्बुए म्रार पर्दा झोंन्। 6 पबित्र तम्बुए म्रार्बै ओंसों मिर ख्रोंसि ख्रो पिंबै क्ल्ह्‍यो थेंन्। 7 च लिउँइ पबित्र तम्बु नेरो मिइ ख्रोंबै ख्रोमैं पिंबै क्ल्ह्‍योए म्हाँजोर बाटा थेंसि क्यु झोंन्। 8 ह्‍युर कारग्युले बार थोसि ह्‍युर्बै म्रार पर्दा झोंन्।

9 “झाइले अभिषेक लबै छ्युगुइ पबित्र तम्बु नेरो चर मुँबै तोन्दोंरि सैर फोसि पबित्र तम्बु नेरो चर मुबै सैमैं चोखो लद्। छ लस्याँ च ताँन् पबित्र तब्मुँ। 10 छलेन मिर ख्रोंसि ख्रो पिंबै क्ल्ह्‍यो नेरो चर्बै तोन्दोंरि सैमैं या छ्युगु फोसि पबित्र लद्। छलमा च ताँन् पबित्र तब्मुँ। 11 झाइले क्यु झोंबै बाटा नेरो बाटाए प्हले या छ्युगु फोसि पबित्र लद्।

12 “च लिउँइ हारून नेरो चए च्हमैं पबित्र तम्बुए म्रार पखसि ख्रुबर ल्हैदिद्। 13 हारूनलाइ पबित्र क्वें खिमिंसि अभिषेक लद्, झाइले च खेगि तसि ङए सेवा लरिगे बिसि चलाइ पबित्र लद्। 14 हारूनए च्हमैं पसि लबेदा खिमिंन्। 15 चमैंए आबालाइ अभिषेक लब् धोंले हारूनए च्हमैंइ खेगि तसि ङए सेवा लरिगे बिसि चमैंलाज्यै या अभिषेक लद्। छले अभिषेक लमा चमैंए पुस्ता-पुस्ता समा खोंयोंन् बिलै चमैं खेगिन् तरिब्मुँ।”

16 याहवेहजी ल्हैदिबै तोन्दोंरि के मोशाइ लइ। 17 छले चमैंइ मिश्र ह्‍युल पिथेंबै ङ्हिदिंर्बै ओंसोंबै म्हैंनर्बै ओंसोंबै त्हिंइर याहवेहए पबित्र तम्बु क्योइ। 18 मोशाइ पबित्र तम्बु क्योइ, धै चए क्योबै क्ल्ह्‍योमैं तिसि फ्ल्याकमैंइ बार थोसि त्होमैं क्योइ। 19 याहवेहजी बिब् धोंले पबित्र तम्बुए फिर पाल टौंदिसि पालए फिर सिंइ नोंमिंइ।

20 झाइले लद् बिबै च्युउलो ताँ प्ह्रिबै युँमाए प्लना ङ्हिं बाछाए मुदुसर झोंसि चइ चए क्हा मुदुसए फिर थेंइ। 21 याहवेहजी बिब् धोंलेन् मोशाइ ठिम थेंबै मुदुस पबित्र तम्बु न्होंर थेंइ, झाइले च मुदुस म्हिमैंइ आम्रोंरिगे बिसि पर्दा झोंइ।

22 झाइले पबित्र तम्बुए ताइ हार पर्दाए बैरु टेबल थेंइ। 23 याहवेहजी मोशाने बिब् धोंलेन् टेबलए फिर याहवेह फुलबै क्हें थेंइ। 24 छलेन पबित्र तम्बुर्बै टेबलए ओंसों दक्षिण हारै पानस थेंइ। 25 याहवेहजी बिब् धोंलेन् खीए ओंसों पानसर बत्ति म्रोइ। 26 पर्दाए ओंसों मोशाइ माराल धुप म्रोबै क्ल्ह्‍यो थेंइ। 27 याहवेहजी बिब् धोंलेन् लिंबै थाँ खबै धुप म्रोइ। 28 झाइले पबित्र तम्बुए म्रार पर्दा झोंइ। 29 झाइले याहवेहजी बिब् धोंले पबित्र तम्बुए म्रा ओंसों चइ मिइ ख्रोंबै ख्रो पिंबै क्ल्ह्‍यो थेंइ धै मिइ ख्रोंबै ख्रो नेरो रा-रोमैं फुलइ। 30 पबित्र तम्बु नेरो ख्रो पिंबै क्ल्ह्‍योए म्हाँजोर चइ बाटा थेंसि क्यु झोंइ। 31 याहवेहजी बिब् धोंलेन् मोशा, हारून नेरो हारूनए च्हमैंइ च बाटार्बै क्युइ यो प्हलेमैं ख्रुइ, 32 पबित्र तम्बु न्होंर अथवा ख्रो पिंबै क्ल्ह्‍योर ह्‍यामा चमैंइ यो प्हले ख्रुब्रें लमल। 33 मोशाइ पबित्र तम्बु नेरो ख्रो पिंबै क्ल्ह्‍योए कारग्युले गेरा झोंसि ह्‍युए धेरा बनेइ, धै ह्‍युर्बै म्रार पर्दा झोंइ। छले मोशाइ ताँन् केमैं खाँइ।

34 च लिउँइ न्हाँम्स्योइ पबित्र तम्बु हुवामा याहवेहए चारबै ह्‍वेइ पबित्र तम्बु चारइ।✡40:34 १ म्रुँ ८:१०-११; यशै ६:४; इज ४३:४-५; दर्शन १५:८ 35 छतमा मोशा पबित्र तम्बु न्होंर होंल् आखाँल।

36 पबित्र तम्बुउँइँले न्हाँम्स्यो स्योयामा इस्राएलीमैं अरू क्ल्ह्‍योर ह्‍यामल। 37 पबित्र तम्बुउँइँले न्हाँम्स्यो आस्योन् समा चमैं खनिरै आह्‍यामल। 38 छतमा इस्राएलीमैं खनिर प्रलैया त्हिंयाँर पबित्र तम्बुए फिर याहवेह युइमुँ बिसि उँइँबै न्हाँम्स्यो तमल, म्हुँइँसर बिस्याँ न्हाँम्स्योर मि लुँब् म्रोंमल।