1 मिश्रर म्ल्ह-नारिमैं मुँ बिब् सेसि याकूबइ ह्रोंसए च्हमैंने बिइ, “क्हेमैं तले घ्रिइ घ्रिए लिर ङ्ह्‍योसि टिरिमुँ? 2 मिश्रर म्ल्ह-नारिमैं मुँ रो बिब ङइ थेइमुँ। ङ्यो सोब् गो बिस्याँ चर ह्‍यासि ङ्योए ल्हागिर म्‍ल्ह-नारिमैं किंइ पखो।”✡42:2 चिब्मैं ७:१२ 3 आबाइ छबिमा योसेफए आघेंमैं च्युउँलो मिश्रर म्‍ल्ह-नारिमैं किंबर ह्‍याइ। 4 दिलेया याकूबइ योसेफए अलि बेन्यामीन आघेंमैंने बालु आकुल। तलेबिस्याँ चलाइ तोइ तयाम् उ ङ्हाँसि याकूब ङ्हिंल।

5 छले याकूबए च्हमैं अरू म्हिमैंने बालु म्‍ल्ह-नारिमैं किंबर ह्‍याइ। तलेबिस्याँ कनान ह्‍युलरै या अँङ्गल् तल। 6 च त्हेर योसेफ मिश्रर्बै क्रथे मुँल। ह्‍युलर्बै ताँन् म्हिमैंने म्‍ल्ह नारिमैं चुँब या चन् मुँल। छतसि योसेफए आघेंमैं खसि क्र कुरदै चलाइ फ्योइ। 7 योसेफइ ह्रोंसए आघेंमैं म्रोंसि ङो सेइ। दिलेया चइ चमैंने बालु ङो आसेब् धोंले “क्हेमैं खनिउँइँले खल?” बिसि थेबै कैले ङ्योएइ।

चमैंइ बिइ, “ङि कनान ह्‍युलउँइँले म्‍ल्ह-नारिमैं किंबर खब् ग।”

8 योसेफइ ह्रोंसए आघेंमैं ङो सेलेया चमैंइ बिस्याँ चलाइ ङो आसेल। 9 छतमा चमैंए बारेर ओंसोंन् चइ म्रोंबै म्होंड मैंसि योसेफइ चमैंने बिइ, “क्हेमैं छैं लबर खब्मैं ग। चु ह्‍युलर तो-तो मुँगे बिसि क्होबर क्हेमैं खब् ग।”✡42:9 उत ३७:५-१०

10 चमैंइ योसेफने बिइ, “ओ चिब, छ आङिं। ङि क्हिए केब्छैंमैं म्‍ल्ह-नारिमैं किंबर खब् ग। ङि ताँन् म्हि घ्रिए च्हमैं ग। 11 ङि सोजो म्हिमैं ग, ङि क्हिए केब्छैंमैं ग, छैं लबर खब्मैं आङिं।”

12 चइ चमैंने बिइ, “आङिं, क्हेमैं चु ह्‍युलर तो-तो तरिगे बिसि क्होबर खब् ग।”

13 छबिमा चमैंइ बिइ, “क्हिए केब्छैंल ङि च्युसे ङ्हिं आघें-अलिमैं मुँल। ङि कनान ह्‍युलर्बै म्हि घ्रिए च्हमैं ग। च्योंब तोगो आबाने मुँ। अलि घ्रि बिस्याँ ङिने आरे।”

14 योसेफइ चमैंने बिइ, “ङइ बिब् धोंलेन् क्हेमैं क्ह्रोंसेंन्ले छैं लबर खब्मैंन् मुँना। 15 तारे ङइ क्हेमैंए जाँच छले लब्मुँ। फारो म्रुँए मिंर कसम चसि ङ बिमुँ, क्हेमैंए च्योंब अलि आखन् समा चु क्ल्ह्‍योउँइँले क्हेमैं ह्‍याल् योंरिब् आरे। 16 छतसि क्हेमैंए न्होंर घ्रि क्हेमैंए अलि किंबर कुलद्। च आखन् समा क्हेमैं झेलर टिल् त्हुम्। छले क्हेमैंए ताँ क्ह्रोंसेंन्बै ङिंब उ आङिं बिसि ङइ ङ्ह्‍योब्मुँ। क्ह्रोंसेंन्बै आङिंस्याँ फारो म्रुँए मिंर कसम चसि ङ बिमुँ क्हेमैं छैं लब्मैंन् ग।” 17 झाइले योसेफइ चमैं ताँन् सोंरो समा झेल घ्रिर्न च्युथेंइ।

18 सोंरो लिउँइ योसेफइ चमैंने बिइ, “ङ परमेश्‍वरने ङ्हिंबै म्हि ग। छतसि क्हेमैंइ चु के लस्याँ क्हेमैं सोब्मुँ। 19 क्ह्रोंसेंन्लेन् क्हेमैं सोजो म्हिमैं ग बिस्याँ क्हेमैंए न्होंर घ्रि चु झेलर्न टिद्। धै अरूमैं क्हेमैंए फोदें परवामैं चल् पिंबै ल्हागिर म्‍ल्ह-नारिमैं बोसि ह्‍याद्। 20 धै क्हेमैंए च्योंबै अलि ङ ङाँर पइ खो। छ लस्याँ मत्‍त्रे ङइ क्हेमैंए ताँ क्ह्रोंसेंन्बै मुँना बिसि सेब्मुँ। धै क्हेमैं सिरिब् आरे। छबिमा चमैंइ छान् लइ।”

21 चमैंइ खें-खेंमैंए न्होंर बिइ, “क्ह्रोंसेंन ङ्योइ ह्रोंसए अलिलाइ दुःख पिंबइले तोगो ङ्योइ चु नों योंइमुँ। तलेबिस्याँ चइ ङ्योने यो छ्युँ लसि क्रोसेया ङ्योइ चए ताँ आथे। छतसि चु छाबै दुःख ङ्योए फिर खब् ग।”

22 रूबेनइ चमैंने बिइ, “ङइ च कोलो तोइ आलद् बिसि क्हेमैंने बिब् आङिं वा? क्हेमैंइ थेबै न्ह आल। तारे चलाइ सैवाबै नों ङ्योइ नोल् त्हुम्।”✡42:22 उत ३७:२१-२२ 23 योसेफ नेरो ह्रोंसए आघेंमैं स्यो-स्योबै क्युइ पोंमल। छतसि चमैंइ पोंबै ताँमैं योसेफइ क्होम् उ बिसि चमैंइ आसेल। 24 योसेफ चमैंउँइँले तिराइ तोसि क्रोइ। तिस्यादे लिउँइ चमैं ङाँइ तोसि चमैंने ताँ सेइ। च लिउँइ चइ चमैंउँइँले शिमियोन किंसि चमैंए मिए ओंसोंन् चलाइ फैइ।

25 योसेफइ के लब्मैंने बिइ, “चमैंए नेंदोंजरे म्‍ल्ह-नारिमैं झोंमिंन्, धै चमैंइ पखबै चाँदिए मुइ या चमैंए नेंदोंर्न झोंमिंन्। धै चमैंए ल्हागिर घ्याँर चबै सैमैं या पिंन्।” बिमा चमैंइ छान् लइ। 26 झाइले ह्रोंसए गधामैं फिर म्‍ल्ह-नारिमैं थेंसि चमैं छाइले प्रइ। 27 घ्याँर बास टिबै क्ल्ह्‍योर चमैं न्होंर्बै म्हि घ्रिइ ह्रोंसए गधा दाना पिंब् बिसि नेंदों फैमा नेंदोंए सुँर खेंमैंए चाँदिए मुइ या म्रोंइ। 28 चइ आघें-अलिमैंने बिइ, “ङए चाँदिए मुइम् एमिंन उ तो जा? ङ्ह्‍योत्ति, चुर ङए नेंदोंए सुँर्न मुँ।” छ बिब् थेमा चमैंए सैंइ क्ल्ह्‍यो पिवाइ। चमैं ङ्हिंसि त्हारदै खें-खेंमैं न्होंर “परमेश्‍वरजी ङ्योने चु तो लगे?” बिबर होंइ।

29 झाइले चमैं कनान ह्‍युलर ह्रोंसए आबा याकूब ङाँर फेनेसि खेंमैंए फिर तबै ताँमैं ताँन् आबाने बिइ। 30 “च ह्‍युलर्बै क्ल्हेइ ङिने थेबै कैले पोंइ। चइ ङिने च ह्‍युलर्बै छैं लबर खब्मैं बिइ। 31 दिलेया ‘ङिम् सोजो म्हिमैं ग। ङि छैं लबर खब्मैं आङिं,’ बिसि ङिइ बिइ। 32 ‘ङि ताँन् आबा घ्रिए च्हमैं ग। ङिए त्येमैं च्युसे ङ्हिं मुँल, च्योंब तोगो कनान ह्‍युलर आबाने बालु मुँ, अलि घ्रि आरे।’

33 “छबिमा च ह्‍युलर्बै क्ल्हेइ ङिने बिइ, ‘चु ताँउँइँले क्हेमैं सोजो म्हिमैं मुँना बिसि ङइ सेब्मुँ। क्हेमैंए आघें-अलिमैं न्होंर घ्रि चुर ङने वाथेंन्। अरू अंङ्गलर क्हेमैंए परवा फोदें आतरिगे बिसि म्‍ल्ह-नारिमैं किंसि ह्‍याद्। 34 धै क्हेमैंए च्योंबै अलि चुर ङ ङाँर पखो। छ लस्याँ क्हेमैं छैं लबर खब्मैं आङिंन, सोजो म्हिमैं मुँना बिसि ङइ सेब्मुँ। धै ङइ क्हेमैंए अलि क्हेमैंए योर पिंस्यो। झाइले क्हेमैं चु ह्‍युलर छों लल् योंब्मुँ।’ ”

35 छबिसि चमैंइ खेंमैंए नेंदोंमैं स्वालमा नेंदोंए सुँर चमैं ताँनए चाँदिए मुइ मुँना! छले नेंदोंर चाँदिए मुइ म्रोंसि चमैं नेरो चमैंए आबा ङ्हिंयाँइ। 36 चमैंए आबा याकूबइ चमैंने बिइ, “क्हेमैंइ ङए च्हमैं ङ ङाँइले प्हेंसि ङ बेल्‍ले न्हुँ खन् लइमुँ। योसेफ आरे, शिमियोन चर वाथेंइ तारे बेन्यामीन या बोल् म्हैइमुँ। छले ताँन् दुःखमैं ङए फिर्न तखइमुँ!”

37 दिलेया रूबेनइ ह्रोंसए आबाने बिइ, “बेन्यामीन ङए जिम्मार पिंन् ङइ च क्हि ङाँर्न एपखब्मुँ। बेन्यामीन क्हि ङाँर आपखस्याँ ङए च्ह ङ्हिं क्हिइ सैवाद्।”

38 दिलेया याकूबइ बिइ, “ङए च्ह क्हेमैंने ह्‍यारिब् आरे! तलेबिस्याँ चए आघें सियाइ तारे चु घ्रि चैमुँ।*42:38 चु घ्रि चैमुँ याकूबए अरू च्हमैं मुँल, दिलेया योसेफ आरेबइले राहेलउँइँले योंबै च्ह बेन्यामीन घ्रि मत्‍त्रे चैल। छतसि क्हेमैंइ बोम् बिबै क्ल्ह्‍योर चए फिर तोइ आछ्याँब तखइ बिस्याँ ङ खेब् तसि क्र सारयाबै त्हेर शोकने बालु क्रोंर सथेंनेब्मुँ।”