1 कनान ह्‍युलर ङ्हिंन् ङ्हाँबै अँङ्गल् तल। 2 मिश्रउँइँले पखबै म्‍ल्ह-नारिमैं चमैंइ चल् खाँल छतमा चमैंए आबाइ चमैंने “ङ्योए ल्हागिरि च्हौदे म्‍ल्ह-नारिमैं किंबर धबै ह्‍याद्,” बिइ।

3 आबाइ छबिमा योसेफए आघें यहूदाइ चने बिइ, “ ‘क्हेमैंए अलि क्हेमैंने बालु आपखस्याँ ङए उँइँर खल् योंरिब् आरे!’ बिसि च म्हिइ ङिने बिइमुँ। 4 छतसि ङिए अलि ङिने बालु क्हिइ कुलस्याँ ङि ह्‍यासि क्हिए ल्हागिर म्‍ल्ह-नारिमैं किंसि पखब्मुँ। 5 चलाइ आकुलस्याँ ङि या आह्‍या। तलेबिस्याँ ‘क्हेमैंए अलि क्हेमैंने बालु आपखस्याँ क्हेमैं ङए ङाँर खल् योंरिब् आरे,’ बिसि च म्हिइ बिइमुँ।”

6 छबिमा याकूबइ (इस्राएलइ) बिइ, “क्हेमैंल अर्को अलि या मुँ बिसि च म्हिने बिइरि ङए फिर क्हेमैंइ तले छाबै न्हुँ तल् पिंल?”

7 चमैंइ बिइ, “च म्हिइ ङ्योए परवाए बारेर ङ्योएब्-च्वेब् लसि ‘क्हेमैंए आबा सोगोंन् मुँ वा? क्हेमैंल अरू अलि या मुँ वा?’ बिसि ङ्योएइ। छले ङ्योएमा ‘अँ, ङिल अलि घ्रि मुँ,’ बिसि ङिइ बिल् त्हुइ। चइ ‘क्हेमैंए अलि चुर पखो’ बिब्मुँ बिसि ङिइ खैले सेब्दि?”

8 झाइले यहूदाइ आबाने बिइ, “बेन्यामीन ङने बालु कुलमिंन् क्हिइ च ङिने बालु कुलस्याँ ङि ह्‍याब्मुँ। धै ङ्यो नेरो ङ्योए प्हसेमैं चल् आयोंसि सिल् त्हुरिब् आरे। 9 चुए जिम्मा ङ तइ। ङइ च खैले बिलै क्हि ङाँर एपखस्यो। ङइ चु एसि क्हिए ओंसों आथेंस्याँ ङ खोंयोंन् बिलै या क्हिए उँइँर छ्याब् मुँबन् ठर्दिब्मुँ। 10 ङ्योइ क्हैल् आलस्याँ ङ्यो ङ्हिखे समा ह्‍याब-खब लल् खाँमल।”

11 झाइले चमैंए आबाइ चमैंने बिइ, “छ आलै आत बिस्याँ छ लद्: चु ह्‍युलर्बै छ्याँ-छ्याँबै सैमैं, लिंबै थाँ खबै फोबै छ्युगु, च्हौदे, क्वे खुदु, छ्याँबै मसला, मुर्रा, पेस्ता नेरो बदाम च म्हिए ल्हागिरि क्हेमैंए नेंदोंर झोंसि बोमिंन्। 12 क्हेमैंइ चाँदिए मुइ या दोब्बर बोसि ह्‍याद्। तलेबिस्याँ ओंसोंबै मुइ या क्हेमैंए नेंदोंए सुँर फेखल। म्‍लेयासि क्हेमैंए नेंदोंर फेखलै। च मुइ एवाल् त्हुम्। 13 ह्रोंसए अलि या किंसि धबै च म्हि ङाँर ह्‍याद्। 14 क्हेमैंए अर्को अलि नेरो बेन्यामीन फ्रेपखबै ल्हागिर च म्हिए उँइँरि तोन्दोंरि सै लल् खाँबै परमेश्‍वरजी क्हेमैंए फिर ल्हयो खरिगे। ङ प्हसे आरेब् तयाम् बिलेन तरिगे।”

15 झाइले चमैंइ ह्रोंमैं-क्होल्सै, दोब्बर चाँदिए मुइ नेरो बेन्यामीन किंसि मिश्रउँइ ह्‍याइ, धै योसेफए ओंसों राइ। 16 योसेफइ चमैंने बालु बेन्यामीन म्रोंसि ह्रोंसए धिंर्बै के लब्मैंए चिबने बिइ, “चु म्हिमैं ङए धिंर बोदु, धै क्यु साँडे घ्रि सैसि कैं-ट्हा ह्‍योद्। चु म्हिमैं तिंयाँ त्हिंयाँर ङने बालुन् चब् चब्मुँ।” 17 योसेफइ लद् बिब् धोंलेन् च चिबइ लइ। धै च म्हिमैं योसेफए धिंर पखइ। 18 छले योसेफए धिंर पखमा योसेफए आघेंमैं ङ्हिंसि खें-खेंमैंन् बिइ, “ओंसोंबै लार ङ्योए नेंदोंर एमिंबै चाँदिए मुइइ लमा ङ्यो चुर खल् त्हुब् ग। तारे चइ ङ्योने निउँ म्हैसि ङ्यो ह्रोंसए केब्छैं लवाब्मुँ। धै ङ्योए गधामैं या प्हेंसि किंवाब्मुँ।”

19 छतसि चमैंइ योसेफए धिंर्बै के लबै चिबने म्रार ह्‍यासि बिइ, 20 “ओ चिब, ओंसों या ङि म्‍ल्ह-नारिमैं किंबर खल। 21 धिंर एह्‍यामा बास टिबै क्ल्ह्‍योर फेसि ङिए नेंदों प्ल्हमा ङिइ नेंदोंमैंए सुँर ङिए चाँदिए मुइ म्रोंइ। दिलेया ङिइ चु मुइ एपखइमुँ। 22 ङिए नेंदोंर ङिए चाँदिए मुइ खाबइ झोंमिंइ च ङिइ आसे। तोगो म्‍ल्ह-नारिमैं किंबर अर्को मुइ या ङिइ पखइमुँ।”

23 चिबइ बिइ, “क्हेमैं न्हुँ आलद्, आङ्हिंन्। क्हेमैंए परमेश्‍वर, क्हेमैंए आबाए परमेश्‍वरजीन् च मुइ क्हेमैंए नेंदोंर थेंमिंलै। क्हेमैंइ बोबै म्‍ल्ह-नारिए सैम् ङइ योंल।” च्हौ बिसि चइ शिमियोन झेलउँइँले चमैं ङाँर पखइ।

24 च म्हिइ चमैं योसेफए धिं न्होंर बोसि खेंमैंए प्हले ख्रुबर क्यु पिंइ, धै चमैंए गधामैं या चबै सैमैं नेरो क्यु पिंइ। 25 झाइले त्हिंइ आधार योसेफने त्होनेब् बिसि खेंमैंइ पखबै क्होल्सैमैं छेइ, तलेबिस्याँ चिबइ कैं चर्न चब्मुँ बिसि चमैंने बिल। 26 योसेफ धिंर खबै लिउँइ चमैंइ खेंमैंइ पखबै क्होल्सैमैं योसेफलाइ पिंसि यो छ्युँ लसि फ्योइ। 27 योसेफइ चमैंने ताँमैं ङ्योलु-च्युलु लदै “क्हेमैंए खेब् तयाबै आबा सबन् मुँ वा? च तोगो सोगोंन् मुँ वा?” बिसि ङ्योएमा

28 चमैंइ बिइ, “क्हिए केब्छैं, ङिए आबा सबन् मुँ, तिंयाँ समा सोरिइमुँ,” बिदै कुरसि चलाइ फ्योइ।

29 योसेफइ ङ्ह्‍योमा ह्रोंसए अलि ह्रोंसए आमाइ फिबै च्ह बेन्यामीन म्रोंसि बिइ, “क्हेमैंइ ङने बालु ताँ लबै क्हेमैंए च्योंबै अलि चुन् वा?” धै योसेफइ चने बिइ, “ओ आच्यों, परमेश्‍वरए दयाम्हाँया क्हिए फिर तरिगे।” 30 ह्रोंसए अलि म्रोंमा चए सैंर बेल्‍ले म्हाँया खसि क्रोदा ङ्हाँसि योसेफइ युन्ले क्रोबै क्ल्ह्‍यो म्हैइ। धै च रोबै क्ल्ह्‍योर ह्‍यासि क्रोइ।

31 तिस्याँदे लिउँइ लि ख्रुसि आक्रोब्धों ब्योंन्ले बैरु युसि चब् लब्मैंने बिइ, “तारे चब् पखो।”

32 झाइले चब् लब्मैंइ योसेफए ल्हागिर स्योले, आघें-अलिमैंए ल्हागिर स्योले धै चने बालु चबै अरू मिश्रीमैंए ल्हागिर स्योले कैं थेंइ, तलेबिस्याँ मिश्रीमैंइ हिब्रूमैंने बालु क्हुँसि चब् चब आतमल। छ लस्याँ मिश्रीमैंल मिं ह्‍यामल। 33 थेबउँइँले च्योंब समा ह्रों-ह्रोंसए उमेर अनुसार योसेफइ चमैं क्हुँल् पिंल। छले क्हुँमिंब् म्रोंसि चमैं प्लेटोयासि घ्रिइ घ्रिलाइ ङ्ह्‍योबर होंइ। 34 चमैंए भाउ योसेफए टेबलउँइँले ट्हुइसि बोल। दिलेया बेन्यामीनए भाउ चमैं ताँनल् भन्दा ङ्‍हबाँ ल्हें मुँल। छले चमैंइ योसेफने बालु चब् थुँब् लसि सैं तोंइ।