हिब्रूमैंए ल्हागिर
प्ह्रिबै प्ह्रिछ्या
प्ह्रिबै म्हि: छेनाले था आसे। कोइ सिलासइ, कोइ लूकाइ, कोइ अपोल्लसइ, कोइ बर्णाबासइ प्ह्रिलै बिम्, दिलेया परमेश्वरजी बाहेक् खाबज्यै आसे।
चु प्ह्रिछ्या खाबै ल्हागिर प्ह्रिइ: चु प्ह्रिछ्या इटालि ह्युलर्बै राजधानी रोम बिबै सहरर्बै ख्रीष्टए फिर बिश्वास लबै यहूदीमैंए ल्हागिर (अथवा हिब्रूमैंए ल्हागिर) प्ह्रिइ।
प्ह्रिबै त्हे: ई. सं. ६४ सालर, अथवा बि. सं. १२१ साल जरे प्ह्रिलै।
प्ह्रिबै ताँ: यहूदी बिश्वासीमैंइ अरू यहूदीमैंउँइँले बेल्ले दुःख योंबइले चमैंइ प्रभुए फिर लबै बिश्वास पिसि धबै यहूदी धर्म म्हाँदिबै सैं लल। छतसि येशूए फिर्बै बिश्वासर चमैंए सैं भोंब् लमिंबर चु प्ह्रिछ्या प्ह्रिब् ग। प्ह्रिबै म्हिइ “येशू ख्रीष्टउँइँले परमेश्वरजी लिउँइँ लबै केमैंए ताँ ह्युलर्बै म्हिमैंने बिल् खाँइ,” बिइमुँ। चु प्ह्रिछ्यार थेबै ताँ सों मुँ:
क. येशून् परमेश्वरए ओंसों ओंनोंन् मुँबै च्ह ग। खीजी म्हिमैंए पाप क्रूसर नोमिंइ परमेश्वरजी म्हिमैं फिर कति थेबै म्हाँया लमना खीलाइ म्हिमैंइ खैले म्हाँदिल् त्हुमन बिबै ताँमैं चु प्ह्रिछ्यार प्ह्रिइमुँ। स्योंम्बै मोशा, अगमबक्तामैं नेरो स्वर्गदूतमैं भन्दा येशून् थेब् ग बिबै ताँ चु प्ह्रिछ्यार मुँ।
ख. येशून् खोंयोंन् बिलै तरिबै ख्रो पिंबै खेगि क्रथे ग बिसि परमेश्वरजी म्हिमैंलाइ सेल् पिंइमुँ। स्योंम्बै यहूदी ख्रो पिंबै खेगिमैं भन्दा येशू थेब् ग।
ग. येशूजी खीए फिर बिश्वास लबै म्हिमैंलाइ पापए सजैंउँइँले, दुष्टए भोंउँइँले, ङ्हिंब नेरो कालउँइँले जोगेमिंम्। येशू ङ्योए खेगि क्रथे ग। खीजी आछ्याँबै सैमैंउँइँले ङ्योलाइ जोगेमिंम्। यहूदी धर्मए रोस नेरो खेदो ख्रो पिंबै छ्या नमुना मत्त्रे ग बिबै ताँ या चु प्ह्रिछ्यार मुँ।
११ अध्याय सेरो स्योंम्बै बिश्वासीमैं खैले बिश्वासर भोंब् तल छलेन क्हेमैं या “येशूलाइ ङ्ह्योसि आसिन् समा खैबै दुःख तलेया बिश्वासर भोंब् तरिद्,” बिसेया चु प्ह्रिछ्यार प्ह्रिइमुँ।
चु प्ह्रिछ्यार मुँबै ताँमैं
परमेश्वरए च्हउँइँले खीए ताँ पूरा लब १:१-३
परमेश्वरए च्ह स्वर्गदूतमैं भन्दा थेब १:४—२:१८
ख्रीष्ट मोशा नेरो यहोशू भन्दा थेब ३:१—४:१३
ख्रीष्ट स्योंम्बै ख्रो पिंबै खेगिमैं भन्दा थेब ४:१४—७:२८
ख्रीष्टजी छाप झोंबै बाछा ताँन् भन्दा थेब ८:१—९:१८
ख्रीष्टजी पिंबै ख्रो अरू सैए ख्रो भन्दा थेब १०:१-३९
ताँन् भन्दा थेबै ताँ बिश्वास ग ११:१—१२:२९
आखिरि अर्थिमैं १३:१-२५
1
परमेश्वरजी खीए च्हउँइँले पोंब
1 स्योंमा परमेश्वर खीए ताँ बिमिंबै म्हिमैंउँइँले ङ्योए खेमैंने ल्हें खे, ल्हें खालर्बै चिनुमैंउँइँले पोंइ। 2 दिलेया चु नुखबै त्हिंइजरे परमेश्वर खीए च्हउँइँले ङ्योने पोंइमुँ। परमेश्वरजी खीए च्हउँइँलेन् ह्युलर्बै तोन्दोंरि सैमैं बनेइ। धै ह्युलर्बै ताँन् सैए फिर क्ल्हे तबर खीजी खीए च्हलाइन त्हाँइ। 3 परमेश्वरए ह्वे खीए च्हनेन् चारमुँ, परमेश्वर खैब मुँ खी या छाबन् मुँ। धै मु नेरो पृथ्बी खीए शक्ति मुँबै बचनइ धाँदिइमुँ। म्हिमैंए पाप त्होमिंबै के लल् खाँसि खी ताँन् भन्दा थेबै शक्ति मुँबै परमेश्वरए क्योलोउँइँ नुबै क्ल्ह्योर टिइमुँ।
स्वर्गदूतमैं भन्दा परमेश्वरए च्ह थेब ग
4 खीजी योंबै मिं स्वर्गदूतमैंल् भन्दा थेब मुँ। छलेन खी स्वर्गदूतमैं भन्दा अझै बेल्ले थेब तइमुँ। 5 “क्हि ङए च्ह ग, तिंयाँ ङ क्हिए आबा तइमुँ” बिसि परमेश्वरजी स्वर्गदूतमैंने खोंयोंइ आबि, छलेन खाब् स्वर्गदूतए बारेरै या “ङ चए आबा तब्मुँ, धै च ङए च्ह तब्मुँ,” बिसि खीजी खोंयोंइ आबि।✡1:5 भज २:७; २ शमू ७:१४; १ इति १७:१३ 6 खीए घ्रि मुँबै च्ह ह्युलर कुलमा खीजी छ बिइमुँ,
“परमेश्वरए ताँन् स्वर्गदूतमैंइ खीलाइन फ्योरिगे।”✡1:6 व्य ३२:४३
7 परमेश्वरजी स्वर्गदूतमैंए बारेर छले बिइमुँ:
“खीजी ह्रोंसए सेवा लबै स्वर्गदूतमैंलाइ खैं नेरो मिए राब लमिंम्।”✡1:7 भज १०४:४
8 दिलेया च्हए बारेर बिस्याँ खीजी छ बिइमुँ,
“ओ परमेश्वर, क्हिए ग्याल्स खोंयोंन् बिलै तरिब्मुँ।
क्हिजी छेनाले निसाफ लसि ग्याल्स लम्।
9 क्हिजी छ्याँबै के खोमुँ, धै आछ्याँबै के आखो।
छतसि ओ परमेश्वर, क्हिए परमेश्वरजी क्हिलाइ त्हाँसि क्हिए थुमैं न्होंर क्हिलाइ ताँन् भन्दा थेबै मिं पिंसि छ्युगु फोसि सैं तोंन् लमिंइ।”✡1:8-9 भज ४५:६,७
10 खीजी धबै बिइ,
“ओ याहवेह, धाँसे ओंसों क्हिजीन् पृथ्बीए जग झोंमिंइ,
धै मुर्बै सैमैं क्हिए योजीन् बनेब् ग। 11 चु सैमैं ताँन् नास तयाब्मुँ, दिलेया क्हि बिस्याँ खोंयोंइ बिलै तरिब्मुँ।
चमैं क्वें धोंले थौंनि तयाब्मुँ,
12 क्हिजी चमैं क्वें धोंलेन् फेर्दिब्मुँ,
धै स्योब क्वें भ्योंब् धोंले चमैं भ्योंवाब्मुँ।
दिलेया क्हि खोंयोंइ आफेर्दि,
क्हि खोंयोंन् बिलै तरिम्।”✡1:10-12 भज १०२:२५-२७
13 परमेश्वरजी खीए च्हने बिइ, “क्हिए शत्तुरमैं ङइ क्हिए प्हले न्होंर आथेंन् समा, क्हि ङए क्योलोउँइँ टिद्।” दिलेया स्वर्गदूतमैं खाबने या खीजी छ आबि।✡1:13 भज ११०:१
14 स्वर्गदूतमैं बिब, परमेश्वरए सेवा लबै प्ल्हमैं ग। धै परमेश्वरजी येशूए फिर बिश्वास लसि मुक्ति योंब्मैं ल्होबै ल्हागिरै या चमै कुल्मिंम्।