16
येशू सिबउँइँले सोगों तब
(मत्ती २८:१-८; लूका २४:१-१२; यूहन्ना २०:१-१०)
1 प्रिबै त्हिंइ लिउँइ मग्दालाथेंस्यो मरियम, याकूबए आमा मरियम नेरो सलोमि बिबै च्हमिरिमैंइ येशूए सिनुर फोब् बिसि लिंबै थाँ खबै छ्युगु किंइ। 2 आइतबार न्हाँगर्न त्हिंयाँ प्योमा चमैं येशू थेंबै छगोंर ह्याइ। 3 छले ह्यारिमा चमैंइ “ङ्योए ल्हागिर खाबइ च उए सुँर्बै युँमा प्लिंमिंम् ङ्हे?” बिरिल। 4 तलेबिस्याँ च युँमा बेल्ले थेब मुँल। दिलेया छगोंर फेनेमा च्हौ थेबै युँमा या स्योथेंब च च्हमिरिमैंइ म्रोंइ। 5 झाइले उ न्होंर होंमा चमैंइ फोस्रे ब्योंबै क्वें खिबै फ्रेंसि घ्रि उए क्योलोउँइ टिरिब् म्रोंइ। छाब् म्रोंसि चमैं ङ्हिंयाँइ।
6 दिलेया च फ्रेंसिइ चमैंने बिइ, “आङ्हिंन्! क्हेमैंइ क्रूसर सैवाबै नासरतर्बै येशू म्हैरिल् वा? येशू धबै सोगों तसि रेल् खाँइ। खी चुर आरे। ङ्ह्योत्ति येशूलाइ थेंबै क्ल्ह्यो चुन् ग। 7 तारे पत्रुस नेरो येशूए अरू चेलामैं ङाँर ह्यासि ‘येशू गालीलर क्हेमैं भन्दा ओंसोंन् ह्यासिन् मुँ। खीजी ओंसोंन् क्हेमैंने बिब् धोंले क्हेमैंइ खीलाइ चर म्रोंब्मुँ,’ बिसि बिद्।”✡16:7 मत्ती २६:३२; मर्क १४:२८
8 छबिमा च च्हमिरिमैं अचम्म ङ्हाँसि त्हारदै छगोंउँइँले त्होंसि न्हेह्याइ। चमैंइ खाबने या तोइ आबि, तलेबिस्याँ चमैंए सैं ङ्हिंरिल।
येशू चेलामैं ङाँर म्रोंखबा*16:9 धाँसे ओंसोंबै योइ प्ह्रिबै कितबमैंरि पद ९-२० आप्ह्रिल।
(मत्ती २८:९-१०; यूहन्ना २०:११-१८)
9 येशू आइतबार न्हाँगर्न सिबउँइँले धबै सोगों तबै लिउँइ मग्दालाथेंस्यो मरियम ङाँर म्रोंखइ। येशूजी ओंसों च च्हमिरिउँइँले मों ङि ल्हामिंल। 10 मरियम ह्यासि येशूए चेलामैंने “येशू धबै सोगों तसि खइमुँ” बिइ, च त्हेर चमैं बेल्ले शोक लसि क्रोब-म्होब लरिल। 11 येशू धबै सोगों तसि मरियम ङाँर म्रोंखइ बिबै बिलेया, चमैंइ चए ताँ आक्वें।
येशू चेलामैं ङाँर म्रोंखब
(लूका २४:१३-३५)
12 च लिउँइ चेलामैं ङ्हिं यरूशलेमउँइँले नाँसउँइ ह्यारिमा येशू चमैं ङाँर म्रोंखइ। च त्हेर येशूए रुप स्योन् ब्योंब् म्रोंइ। 13 चमैं यरूशलेम एह्यासि चु ताँ अरूमैंने या बिइ, दिलेया खाबज्यै या येशू सिबउँइँले धबै सोगों तखइ बिबै ताँ आक्वें।
येशूजी च्युसे घ्रि चेलामैं ङाँर म्रोंखब
(मत्ती २८:१६-२०; लूका २४:३६-४९; यूहन्ना २०:१९-२३; चेला चिब्मैंए केमैं १:६-८)
14 च लिउँइ खीए च्युसे घ्रि चेलामैं चब् चरिमा खी म्रोंखइ। चमैंइ बिश्वास आलब नेरो सारो सैं म्रोंसि खीजी चमैंलाइ बेल्ले हौदिइ। तलेबिस्याँ खी धबै सोगों तखइमुँ बिब्मैंए ताँ चमैंइ आक्वेंमल।
15 झाइले येशूजी चमैंने बिइ, “ह्युल तिगोंन् ह्यासि ताँन् म्हिमैंने परमेश्वरउँइँले खबै सैं तोंबै ताँ बिमिंन्।✡16:15 चिब्मैं १:८ 16 ङए फिर बिश्वास लसि बप्तिस्मा किंब्मैंइ मुक्ति योंब्मुँ, दिलेया बिश्वास आलब्मैं परमेश्वरए उँइँर छ्याब् मुँबन् ठर्दिब्मुँ। 17 बिश्वास लब्मैंइ ङए शक्ति योंसि छाबै औदिबै चिनुमैं लल् खाँब्मुँ: चमैंइ ङए मिं किंसि मोंमैं ल्हाब्मुँ, छारा क्युइमैं पोंब्मुँ। 18 चमैंइ प्हुरिमैं क्हाल् खाँब्मुँ, बिष थुँलेया तोइ न्होह्रों तरिब् आरे, चमैंइ नबै म्हिमैंए फिर यो थेंमा च म्हिमैं सब्मुँ।”
येशूलाइ स्वर्गउँइ बोब
(लूका २४:५०-५३; चेला चिब्मैंए केमैं १:९-११)
19 येशू छले चेलामैंने पोंल् खाँबै लिउँइ परमेश्वरजी खीलाइ स्वर्गउँइ बोयाइ, धै परमेश्वरए क्योलोउँइ टिइ।✡16:19 चिब्मैं १:९-११ 20 झाइले च चेलामैं खन्तोदोंन् ह्यासि खीए ताँ बिप्रइ। प्रभु चमैंने बालु तसि औदिबै चिनुमैं लसि चमैंइ बिबै ताँमैं क्ह्रोंसेंन् ग बिसि उँइँमिंइ।