101
भर लल् खाँबै खोंउँइले ङ छ्याँबै छ्ह थोब्मुँ।
दाऊदए भजन घ्रि।
1 क्हिजी लबै खोंयों आनुबै म्हाँया नेरो ठिक निसाफए बारेर ङ क्वे प्रिंब्मुँ;
ओ याहवेह, क्हिए मिंर ङ क्वे प्रिंब्मुँ।
2 न्ह क्रों मि क्रोंले ङ छ्याब् आरेबै छ्ह थोब्मुँ।
ङ ङाँर क्हि खोंयों युमुँ?
भर लल् खाँबै खोंउँइले
ङ ह्रोंसए धिंर छ्याँबै छ्ह थोब्मुँ।
3 केर आफेबै सैमैं ङए उँइँर थेंरिब् आरे।
दुष्ट के लब्मैंलाइ ङ आखो;
छाबै म्हिमैंने ङ प्ररिब् आरे।
4 आछ्याँबै सैं प्ह्याब्मैंने ङ ह्रेंगोन् टिब्मुँ;
दुष्ट केमैं ङ खोंयोंइ लरिब् आरे।
5 न्होंन्हों ह्रोंसए ङ्हेब्मैंए ताँ लबै म्हिलाइ ङइ नास लब्मुँ।
ह्रोंसन् ह्रब् सेब् प्हैंसि
थेब् प्हैंबै म्हिलाइ ङ सैदिरिब् आरे।
6 भर लल् खाँबै म्हिमैं ङने बालु टिल् योंरिगे बिसि
चमैंए फिर ङए मि छरिमुँ;
ठिक घ्याँर प्रबै म्हिइ
ङए सेवा लब्मुँ।
7 छलु म्हिलु लबै म्हि
ङए धिंर टिल् योंरिब् आरे;
स्योलिबै ताँ पोंबै म्हि
ङए उँइँर टिल् योंरिब् आरे।
8 ह्युलर्बै ताँन् दुष्ट म्हिमैं
ङइ न्हाँग ह्रोंसे नास लवाब्मुँ,
दुष्ट के लब्मैं ताँनलाइ
याहवेहए सहरउँइँले ङइ ल्हावाब्मुँ।