2 Timoti
Timoti ana leta aiyuwoina
Livala Aba Vaita
Leta ame Timoti ana leta aiyuwoina Paulo igini. Pauloyana deri sinaena Roma goi ikaaiyaka tutayana leta ame igini. Go kina Timotiyana Epeso goi ikaaiyaka, Yeisu ana totugugunayao ivatuulukoidi. Moe nakona tala 65 ina tala 66 go, nauyayanaidi goi letayana igini. Ame nakona ina leta vaamliyaina igini.
Boi Paulo ivaníbita Vala Dedevina itaalavaite ina asa Lustira goi, e Timoti ivalobode Valayana ivatuluko inumise. Amo tetalayana buki Guinuwa 16:1-3 goi ikaaiyaka.
Leta ame goi Paulo latuwona Timoti ina numisa ikitogage. Aiyuwoina ilatuwoko tovatulukwana polapola manudi bego isanabodedi. Aitonina Timoti itoboine gedageda goi imeesayágana go, Yaubada ina yabobona goi iitáoya.
Leta Luluna
1. Leta ana togínina be ana tokatuyaivayao 1:1-2
2. Paulo ina kauyagu Timoti manuna 1:3-14
3. Timoti itoboine itogaga be tomota aba numisa ivatulukoidi 1:15—2:2
4. Timoti itoboine gedageda goi itogaga 2:3-13
5. Timoti itoboine senao yaidi ivilivili Paulo ina vatulúkwana manuna 2:14-26
6. Tomota idi sinapu tuta ana kaba lukavava goi 3:1-9
7. Timoti Paulo ina vatulúkwana ikaisakiyedi 3:10-17
8. Timoti itoboine Yaubada ina vala italavaite 4:1-8
9. Paulo latuwona Timoti woilina ina tauyana yaina 4:9-15
10. Tomoya ina vaita Paulo ina kotu goi 4:16-18
11. Paulo ina vaduduwo 4:19-22
1
Leta ana togínina be ana tokatuyaivayao
Yau Paulo Guyau Yeisu ina vamoléyana tayamo Yaubada ina nuwonúwana goi. Moe bego Yaubada ina katótula yawoida vau manuna atalavaite, yawoidayadi moe ida spwagógana Guyau Yeisu taiyao pasina tababane. Leta ame agini iwo kom natugu guna kalo nakae yaim.
Yaubada Tamada be ida Tomoya Guyau Yeisu idi kanuwóiya be idi nuwokapisi nakae idi tuboina bei sivinim.
Paulo ina kauyagu Timoti manuna
3 Nuwogu geya isabutukoeta tutayana ataaimámina Yaubada yaina nakae boi nimatu tubugowo sitaaimámina. Ame Yaubadayana yaina akaauyagu tutayana sabamgo be maliyalina guna kawanoi goi anuwokaavatem. 4 Im táiya boi tutayana akalavem anuwookavate, tauna akatukuuwonem agitemneim bego uyáwana ivakayaodeigu. 5 Guna kauyaguyana unana im numisa mooitamoina anuwokavate. Numisayana moe nakae boi mainao tubum Loisi sowona, niga sinam Yunisi nakae sowona.†Gui 16:1. Ayagoi bego numisayana kom nakae sowom.
6 Im numisayana pasina akavilevilem am kaiguyau manuna. Boi dabam abisikone namliyeta Yaubada ina kaiguyau ivinim. Aiguyauyana kuepaaisēwe nakae yeu neta kukiyamoi, e inínima ivaiteda. 7 Moe itoboine. Yaubada Balomaina ivinida go, Balomayana geya matoita unana geya, go sem Baloma ina kaiguyau pasina itoboineda tatogaga, tamatakoi be toinida takabikunuida.
8 E tauna taabu om imaayamāya ida Tomoya Yeisu valena kutaalavaite. Aiyuwoina ida Tomoyayana valena ana talavaita pasina yau deri ana tokaiyaka go, tuwo taabu kuomaeemāegu, go sem Yaubada ina togaga goi guna mou Vala Dedevina ana talavaita manuna kusīuko. 9 Yaubadayana iyaveda be nakae ivayokoida kita kimaasabaida Tauyana umana. Go geya kada ida guinuwa pasidi geya, go sem toinina ina nuwonúwana pasina be ina kanuwóiya pasina. Anuwoiyayana ivinida ida spwagógana Guyau Yeisu taiyao pasina nakae boi nimatu tuta ana kaba vatowo goi bogina igimilosinapuye. 10 E ame tuta bogina ivagitakoe kita yaida ada Toyava Guyau Yeisu ina sowóduwo goi. Guyauyana ámasa ana togaga itauwe go, Vala Dedevina ana talavaita goi yawana vata toina ikaiwoduwe yaida. 11 Valayana manuna Yaubada ikawoigu bego yau valayana ana totalavaita, Yeisu ina vamoléyana be nakae valayana ana tovatulúkwana.†Gui 9:1; 1Ti 2:7. 12 Guna paisewayana pasina tauna ame guna mou ababanedi go, mouyadi pasidi ogu geya imaemaeta. Moitamo. Guyau Yeisu aanumise; Tauyana bogina aayagoi. Go ayagoidoko Tauyana itoboine Vala Dedevina boi inuumisegu bego aruugwausi bei iiyause ana kadókana maliyalina gagaina ima.
13 Vatulúkwana mooitamoidi bogina yau yaigu goi kuunovedi mam numisa be mam matakoi kuyoisikaavatēdi. Go imi yoitakavatayana goi mam numisa be mam matakoi ida spwagógana Guyau Yeisu taiyao pasina. 14 Vatulukwanayadi dedevidi boi Yaubada iivinida, e Baloma Kimaasabaina yaida ikaaiyaka ina togaga goi kuyaausēdi tosobala yaidi goi.
Timoti itoboine itogaga
be tomota aba numisa ivatulukoidi
be tomota aba numisa ivatulukoidi
15 Bogina kuyagoi bego tonumisa badabadaidi Esiya goi situgavilegu nakae sikalavegu. Yaidi goi adi taiyuwo moe Pugelo be Eramogene. 16 Ago Onesiporo geya iomaemaeta yau guna kaiyaka deri goi pasina, go sem tuta liliuna yawoigu ilisilisi. Tauna guna kawanoi ida Tomoya yaina bego Onesiporoyana mana bodayauwo inuwokapisiyedi. 17 Moitamo ona geya imaemaeta, go sem tutayana Roma goi ikaaiyaka, mana poisógana iluusalegu, e ibabanegu. 18 Ina vaita gagaina yaigu Epeso goi bogina kuyagoidoko. Guna kawanoi ida Tomoya yaina bego itagona takínona ana maliyalina goi Onesiporoyana nuwokapisi ibabane Yauwe yaina.