Tapwaroro ana lovina
2
(1 Timoti 2:1—3:13)
Vatulúkwana tapwaroro manuna
1 E tuwo dogoi tayamo gagaina akatusinapumi ame nakae: Tugúguna goi imi kawanoi liliudi tomota liliudi idi vaita manudi kotalavaaitēdi Yaubada yaina be nakae manudi kokaauyāgu Tauyana yaina. 2 Aiyuwoina tolovina be tomota madi lovina manudi kokaawanōi bego yawoida goi mada tuboina be mada sakululu takaaiyaka ame nakae: Ida sinapu nakae yábana sinapuna be nakae aba wowoina. 3 Ame dedevina Yaubada ada Toyava matana goi be nakae iuyaone. 4 Tauyana latuwona tomota liliuda iyaveda be ana Nanamsa Mooitamoina tayagoi. 5 Ame moitamo.
Yaubada tayamo toito.
Togúdala tayamo toito nakae ikaaiyaka.
Togudalayana be tomota go, nauyayanaida goi ikaaiyaka.
Tauyana moe koroto tayamo, Guyau Yeisu.
6 Toinina ámasa goi ikasale,
liliuda ada katumapu.
Moe nakae itateteda be italigeida.
Mae kiyakiyaya tayamo Yaubada ina tuta ana toboine goi
ivinida bego latuwona liliuda iyaveda.
7 Kiyakiyayayana manuna Yaubada bogina ivayokoigu yau Yeisu ina totalavaita be ina vamoléyana†Gui 9:15; Epe 3:7-8; 2Ti 1:11. moe bego yau Totuyoyowo adi tovatulúkwana. Ame abóbwara moitamo; geya apoleta. Go ida numisa ana vatulúkwana be Yaubada ana Nanamsa Mooitamoina avatulukoidi.
8 E tuwaina latuwogu komi koroto imi tugúguna liliudi goi neta nimami kokatulagasidi bego kokawanoi, e nimami maavadaidi. Nakae geya imi egamogamogumo be geya imi kaumakimakimo geya.
9 Kidi go vevina nakae; latuwogu adi kwama nakae vevina todedevidi siilosidi nakae. Adi kwamayadi aba wowoina go, idi losinayana goi idi sinapu sikabikuunuīdi. Nakae adi pasapasa geya kunudi mana goura metametaina o pasapasa esaesa o adi kwama esaesa geya, govila bei Yeisu ana totugugunayao nuwodi sikobaledi.†1Pi 3:3. 10 Go sem latuwogu idi guinuwa dedevidi goi sipasa nakae vevina itoboinedi neta Yaubada yaina sikaasaledi.
11 Vevinayadi imi tugúguna goi madi tugau be madi katetagona vatulúkwana dedevina sikabikābi. 12 E vevina geya atagonedita sivatulúkwana, e nakae geya atagonedita koroto sikabikunuidi, go sem madi tugau sikaaiyaka. 13 Guna nuwonúwana ame nakae: Moe Adama Yaubada boi igimimodugu namliyeta baige Ivi.†Abv 2:7,21-23; 1Ko 11:8. 14 Nakae Kaleya Adama geya ikatubauyeta, go sem Ivi ikatubau, tauna Iviyana ietokapipilova.†Abv 3:1-7,13; 2Ko 11:3. 15 Go ina venátuna goi Yaubada bei iyave. Moeko goi vevina liliudi itoboinedi adi yava sibabane neta madi numisa be madi matakoi be kimaasabaidi Yaubada umana go, idi sinapu sikabikunuidi.‡Ame tomwanayana geya imavadeta da Giriki niyadi. Tauyadi niyadi kadi, ‘Ego ina venátuna goi ana yava bei ibabane neta madi numisa be madi matakoi be madi sinapu dedevina.’ Itoboineda ame tataligei ame nakae: (1) Paulo nava Ivi idigedige. Tauyana igimigoyo go, venátuna goi Yaubada bei iyave. Venátuna ana yagoina ameko moe Yeisu ina bíbina. (2) Ame tomwanayana ivatulúkwana bego vevina itoboinedi idi paisewa siuyaone unana moe Yaubada ivinidi. Venátuna ana yagoina moe aba gita idi paisewa liliuna manuna.
†2:7 Gui 9:15; Epe 3:7-8; 2Ti 1:11.
†2:13 Abv 2:7,21-23; 1Ko 11:8.
‡2:15 Ame tomwanayana geya imavadeta da Giriki niyadi. Tauyadi niyadi kadi, ‘Ego ina venátuna goi ana yava bei ibabane neta madi numisa be madi matakoi be madi sinapu dedevina.’ Itoboineda ame tataligei ame nakae: (1) Paulo nava Ivi idigedige. Tauyana igimigoyo go, venátuna goi Yaubada bei iyave. Venátuna ana yagoina ameko moe Yeisu ina bíbina. (2) Ame tomwanayana ivatulúkwana bego vevina itoboinedi idi paisewa siuyaone unana moe Yaubada ivinidi. Venátuna ana yagoina moe aba gita idi paisewa liliuna manuna.