11
Paulo ina guinuwa da Korinta manudi
1 O neta guna livala yaaluwoidi nakae tuta giyaina goi komesayágana! Guna kaleyayao idi bóbwara yaaluwoidi goi bogina komesayágana, tauna ame tuta latuwogu yau guna bóbwara goi komesayágana. 2 Bogina koyagoi. Alokatemi nakae Yaubada ilokateda. Aemi bogina apakoidi nakae koroto tonai tayamo yaina, e bei itoboinegu komi kimaasabaimi woiyai geya ana kanaotamo nakae avagitakoimi Guyau yaina. 3 Ego amatoita nakona imi kasala mooitamoina be maavadaina Guyau yaina goi moteta bei nuwomi ivasulaigidi nakae boi nimatu ina nuwotulu goi Ivi bogina ivasulaigi.†Abv 3:1—5:13. 4 Maniyedi tomota bogina siwo ituli ta livala Yeisu manuna sitaalavaite yaimi go, amo livalayana boi geya katalavaiteyeta yaimi. Nakae ituli ta baloma kidi goi kokabi go, amo geya kada Baloma Kimaasabaina boi bogina kokabi Yaubada goi geya. O nakona ituli ta vala kouyaone go, amo valayana geya nakae Vala Dedevina mooitamoina bogina kouyaone nakae geya. Komi manakae! Moe dogoiyadi pola go, komi komesayágana ae? 5 Go itoboine yau guna bóbwara goi komesayágana. Moitamo. Amo korotoyadi bego Guyau ina vamoleyanayao toosakidi go, yau guna nuwonúwana geya sikalisaveguta geya. 6 E nakona moitamo yau geya bóbwara ana tokatanaki dedevina geya nakae tomota maniyedi sidigedige, go sem Guyau ana nanamsa manuna geya atamogemogeta, go sem tuta liliuna ima vatulúkwana be ima guinuwa liliudi goi kavatulukoimi bego moe kayagoidoko.
7 Manakae? Nakona imi nuwonúwana ituli? Boi Yaubada ina Vala Dedevina atalavaite yaimi go, geya latuwogu koemaisigu, go sem toinigu nimagu goi apaisewa. Moeko goi toinigu akisobuyegu go, manakae? Komi imi nuwonúwana bego guna kisobuyana goi goyo aguinuwe ae? Iyaa! Akisobuyegu bego akilagasimi! 8 Yaubada ana totugugunayao ituli ta dadava goi siemaisigu bego komi manumi apaisewa o tadigo kada, ‘Idi mani avainao nakae bego avaitemi komi ami dedevina manuna.’ 9 Boi tutayana yaimi goi akaaiyaka neta avakeposi, e imi yogala geya ayatoeta. Konuwaisi. Sedao nuumisaidi Mesadoniya goi sima kaga avaakeposi sivinigu. Ago kaga liliuna goi apoikiki bego imi yogala geya ayatoeta go, tuta simamaima, guna sinapu bei nakae.†Pil 4:15-18. 10 Guyau ibóbwara moitamo, e yau nakae abóbwara moitamo bego tomota geya atagonedita sitabubuligu Yaubada ina paisewa aguuinuwe manuna. Ame guinuwayana manuna auyawana gagágasa go, geya vatau tayaamo Akeya ana dadava goi itoboine guna uyawana gagagasayana goi isanabodegu. 11 Ame guna sinapuyana tabúbula manuna unana kaga? Unana geya amatakoiyemita? Moe nakae geya! Yaubada iyagoidokoigu! Moitamo amatakoiyemi!
12 E guna sinapuyana yaimi ame tuta be nakae nava bei aguuinuwe. Moe bego tosakidiyadi idi pásima avakoikoi bei geya itoboinedita madi uyawana gagágasa sipásima bego idi sinapu yogala manuna yaimi goi nakae yau guna sinapu. 13 Moitamo. Tomota amo tauyadi nakae moe geya Yeisu ina vamoleyanayao moitamo geya. Kidi toguinuwa polapola. Kai Guyau ina vamoleyanayao sitapatema bego tomota sikatubaudi. 14 Moe manuna geya takaliwoiseta ae? Moitamo. Kaleya anerose maavadaina itapate bego ikatubauda. 15 Tauna ikakapu neta Kaleyayana ana tovaitayao toinidi sikaigaviledi bego tanuwonúwana kidi sinapu mooitamoina adi tokibobwatayao. Ago tuta ana kaba lukavava goi kidi idi goyo adi katumapu bei sibabane.
Paulo iuyawana gagágasa ina kaleyayao nakae
16 Abobwaramna. Taabu konuuwonūwana yau ayaluwo. Ego neta konuwonúwana ayaluwo, yaaluwoigu nakae agu gogo yaimi nakae kidi bego toosakidi adi gogo, bei itoboinegu tupwana auyawana gagágasa tauyadi nakae. 17 Guna livala moe geya ida Tomoya ina lovina goi ima geya, go sem moe tomota yaaluwoina nakae auyawana gagágasa. 18 Tomota badabadaidi yaimi sakava ana dadava goi siuyawana gagágasa, tauna yau nakae bei auyawana gagágasa. 19 Moitamo. Komi bego tonanamsa go, mami uyáwana tosakidiyadi yaaluwoidi idi bóbwara goi komesayágana ae? Tauna yau guna bóbwara goi bei komesayágana ae? 20 Moitamo toina. Nakona tomota sivayokoimi komi idi pakonayao o sivaobumi o sikatutaoimi o sinuwatue o silopadipadimi bego sigieomaemaemi go, tuwo yaidi komesayágana ae? 21 U, oma go imayamaya beso; katalavaitema moitamo kai kaneneta unana geya itoboinemeta amo tauyadi idi sinapu nakae kaguinuwe yaimi ae?
E kaga goi tauyadi madi katepatu siuyawana gagágasa, yau nakae magu katepatu bei auyawana gagágasa. O yaaluwoina nakae abobóbwara!
22 Manakae? Kidi Iberiu?
Yau nakae.
Kidi Isileli tubunao?
Yau nakae.
Kidi Eberamo tubunao?
Yau nakae.
23 Manakae? Kidi bego Guyau ina tovaitayao?
Yau ina tovaita moitamo toina.
(¡Ame guna bóbwara goi nakona dabagu bogina igoyo!) Go akalisavedi ame nakae:
Guna poisógana Guyau manuna
atogagasavedi.
Deri goi akaaiyaka tuta badabadaina go,
kidi geya.
Agu láuwo sivavina ababanedi,
geya ayagoiyeta.
Tuta badabadaina giyakainava bei akámasa go,
kidi geya.†Gui 16:23.
24 Sivanima liuna ababane kidi Diyuu nimadi goi go,
liunayadi tamo tamo moe dábina 39 sivinigu.†Atu 25:3.
25 Sivato alova dilidilina goi
da Roma idi tovayaviya sidabigu.†aGui 16:22.
Sivatayamo gurewa goi silauigu.†bGui 14:19.
Sivato oga goi alokoina go,
isalili.
Sabamgo tayamo be maliyalina tayamo
osasa goi idoiyegu.
26 Guna vaníbita badabadaidi goi
aba vailai badabadaidi sisowóduwo yaigu.
Aba vailaiyadi ame nakae:
Sákala goi,
tovaináwana goi,
segowo Diyuu goi,†aGui 9:23.
Totuyoyowo goi,†bGui 4:5.
asa goi,
udódana goi,
osasa goi, tonumisa polapola yaidi goi,
27 guna poisógana be guna valitulítuwo goi,
sabamgo badabadaidi geya amasisita,
magu loga be maegu isayasaya,
tuta badabadaina geya avagumo,
gogou akámasa unana guna kwama geya sibadebadeta.
28 Ame dogoiyadi sisowóduwo yaigu goi. Ago ame alotowo sinaegu goi:
Maliyalina tamo tamo goi mou
Yeisu ana totugugunayao liliumi manumi alootowoidi,
e manumi anuwonúwana gagaina.
29 Avatau neta ineneta,
ina nenetayana yau nakae alotowo.
Avatau neta siyana ivakapusiye goyo goi,
tovakapusiyana manuna yau gamogu igoyo toina.
30 Neta latuwomi auyawana gagágasa tosakidiyadi nakae, e kaga neta guna neneta ivagitaakoedi, moe dogoiyana manuna bei auyawana gagágasa. 31 Yaubada aba yapali vata!†aLuk 1:68; Rom 1:25, 9:5; 2Ko 11:31; Epe 1:3; 1Pi 1:3. Tauyana ida Tomoya Yeisu ina Yaubada be nakae Tamana.†bRom 15:6; 1Ko 1:3; Epe 1:3,17; 1Pi 1:3. Ame Yaubadayana iyagoigu bego geya apoleta. 32 Boi Yaubada guna neneta ivatulukoigu ame nakae: Boi tolovina Aretasi ina tuta goi tolovina tayamo sobuyekoina mana tovayaviyayao asa Damasiko goi siyausegu bego siyoisigu†Gui 9:23-25. 33 go, segowo sivaitegu. Bayao tayamo gagaina goi asowoya, ali gurewa toluyena ana windo goi sisoilavegu asou poyapoya, e tolovinayana nimana goi magu omayamaya asiya.