25
Paulo ikawanoi
bego ina Sisa yaina kotu manuna
bego ina Sisa yaina kotu manuna
1 E tuwo Pestoyana ima Sesariya moe Yudiya parovinsi goi bego ina lovina ivatowo go, maliyalina ana badabada aito sikavava, ituko ina Yerusalema. 2 Ago Paulo ina kaiyaka deri pasina, tauna kidi Tonúwala Gagaidi be nakae koroto gagaidi Diyuu yaidi goi sima Pestoyana yaina, e Paulo ina goyo sitalavaitedi. Ago sikaugeogéona Pestoyana yaina 3 nakae sikawanoi makimaki kadi,
‘Neta kukanuwoiyema ame nakae: Kulovina bego Paulo sietune ima Yerusalema goi kotu manuna.’
Moe latuwodi unana Diyuuyadi bogina silosinapu bego enao goi sitamumu, Pauloyana situyaosi, e bei ava tuta tovayaviya simememe, bei siyoisi sikaumate. 4 E tuwo Pestoyana idigo kana,
‘Sesariya goi Paulo simataakavate. Yau giyakainava bei asou ana amoko, 5 tauna ava koroto gagaimi yaimi neta latuwomi, e kōma taiyao tasōu tāna Sesariya. Neta tauyana moitamo goyo iguinuwe, amoko goi ina goyoyana kotalavāite.’
6 E tauyana Diyuu yaidi goi ikaaiyaka nakae maliyalina ana badabada ainima aito o yawou, taudi. Ikavava, tauyadi taiyao sisou sina Sesariya goi simasisi. Simasisi vanuwo itomo Pestoyana itaoya ina aba takínona ana kaba tusobu goi itusobu go, livala ietune ina bego Paulo sime. 7 E tuwo tutayana sime, kidi Diyuu Yerusalema goi sima tauyana sitaoyakobu go, idi wowókana madabokina moumoudi sitalavaitedi. Go idi wowokanayadi geya adi kiyakiyayamo. 8 Tuwo kina Paulo idi wowokanayadi ilawoiwoiyedi idigo kana,
‘Moe nakae geya. Geya tayaamo kai Diyuu ima lovina Yaubada ina Katukeda goi o Vada Kimaasabaina ina lovina o Sisa ina lovina akapipilave geya.’
9 E kina go Pestoyana latuwona Diyuu ikanuwoiyedi, tuwo Pauloyana ilatuwoko idigo kana,
‘Paulo manakae? Kutagona bego tatuko tana Yerusalema goi bei maeko goi im kotu yau aguinuwe, gea tuwo?’
10 Go kina Pauloyana idigo kana,
‘Moe nakae geya! Yau ame Sisa ina kaba takínona goi bogina aataoya! Ameko goi itoboinegu guna takínona ababane unana yau Roma ina lovina sinaena goi akaaiyaka. Aiyuwoina geya tayaamo goyo aguinuwe Diyuuyadi yaidi goi! Moe kom nakae bogina kuyagoidoko. 11 Neta moitamo goyo tayamo aguinuwe go, goyoyana pasina itoboinegu akámasa, e dedevina, ámasa geya asiyaeyeta. Ago idi bobwarayadi siwoowokoigu geya aguinuwedita, tauna geya vatau tayaamo itoboine Diyuuyadi nimadi goi iyatoigu. Tauna akawanoi bego yau ana Roma goi guna kotu Sisa inove!’
12 Tuta amo goi kina Pestoyana ina tonanamsayao taiyao sibóbwara. Ikavava, idigo kana,
‘Bogina kukawanoi bego Sisa am kotu iguinuwe, tauna bei kuna Sisa yaina am kotu manuna.’
Paulo itaoya
Agiripa matana goi kotu manuna
Agiripa matana goi kotu manuna
13 E maliyalina maniyedi sikavava, Tolovina Agiripa‡ Agiripa: Ame tauyana yoina madabokina moe Erodi Agiripa. Tubuna moe Erodi Toolagaina (Mad 2). Tubuna vavina tayamo Diyuu, tauna Agiripayana Diyuu idi sinapu iyagoidi. ma niuna Benise sima Sesariya goi bego gávana vau Pesto siuyaone. 14 E nava tabu sikaaiyaka go, Pestoyana ina Agiripa ilatuwoko Paulo ana kotu manuna idigo kana,
‘Tayamo koroto deri ana tokaiyaka boi kina Pilikisi nava iilovina deri goi ikalave. 15 E tutayana Yerusalema goi akaaiyaka go, kidi Tonúwala Gagaidi be Diyuu idi tomoyamoyayao sima tauyana ina goyo sitalavaitedi. Go sikawanoi bego tauyana ámasa ibabane. 16 Go yau adigo kagu,
“Kai Roma ima sinapu goi toyogala geya katagoneyeta ámasa goi bego boda kavauyaonedi. Geya katagoneyeta ámasa goi ana kadókana tauyana ana towowokanayao taiyao sivaloboda be toyogala itoboine idi wowókana ilawoiwoiyedi.”
17 Tauna Diyuuyadi taiyao kama Sesariya go, geya akaimumuneta, go sem vanuwo itomo ama aba takínona ana kaba tusobu goi atusobu. Ikavava, guna tovayaviyayao alovinaedi sina korotoyana sikabi sime. 18 Sikabi sime go, tutayana ana towowokanayao sitaoya ina goyo sitalavaitedi, anuwonúwana bego idi wowókana goi goyo gagaidi bei sitalavaitedi go, niga geya. 19 E kidi Paulo taiyao sikaumakimaki go, idi kaumakimakiyana moe toinidi idi tapwaroro ana lovina manudi be nakae koroto tayamo yoina Yeisu manuna. Korotoyana ikámasa go, Paulo igéona bego tauyana maa yawoina. 20 E yau geya ayagoiyeta manakaegu idi wowokanayadi bei adovatusidi bego ayagoidi. Tauna tauyana alumadade adigo kagu,
“Manakae? Kutagona bego kutuko kuna Yerusalema goi am kotu manuna, gea tuwo?”
21 Ago Paulo ikawanoi bego kamatakavate ana kadókana tokanayatanatoina Sisa itoboine ilovina. E tutayana ikawanoi, yau alovina bego ameko simatakavate ana kadókana itoboinegu aetune ina Sisa yaina.’
22 E kina go Agiripayana idigo kana,
‘Yau nakae latuwogu korotoyana toinigu anove.’
Pesto idigo kana,
‘Dedevina, moitamo itomo bei tauyana kunove.’
23 E tauna vanuwo itomo, Agiripa be Benise madi pasapasa naamalidi be madi gágasa sima aba tugúguna goi sisiu tovayaviya adi tokalikumatanayao be asa ina korotoyao gagaidi taiyao. Sisiu ikavava, Pesto ilovina bego Paulo sikabi sime. 24 Tuwo moitamo sina sikabi sime. Tutayana bogina sime, Pesto idigo kana,
‘Tolovina Agiripa be nakae komi koroto gagaimi kokaaiyaka kai taiyao, ame korotoyana kogīte. Tauyana manuna Diyuu liliudi Yerusalema goi be nakae ameko Sesariya goi sima sikawanoi yau yaigu be nakae niyadi gagaidi goi siduduwo kadi,
“Tauyana geya itoboineyeta maa yawoina ikaaiyaka!”
25 Go yau geya tayaamo goyo ababane iguinuwe bego ámasa itoboine. E tauyana toinina ikawanoi bego ina tokanayatanatoina goi kotu manuna. Tauna nakae yau alovina bego aetune ina. 26 Moe dedevina kwalave go, manakaegu bei tauyana ina goyo ida tomoya ana leta goi atalavaite? Geya tayaamo kaga itoboinegu agini. Moe pasina tauna tauyana akabi ame matami goi bego kodovatusiye go, latuwogu toina kom Tolovina Agiripa matam goi itaoya bei kudovatusi, e bei tutayana imi dovatusiyana ikavava, imi vaita goi itoboinegu ayagoi manakaegu ida tomoya ana letayana agini. 27 Bogina koyagoi. Neta tomota yoowonina aetune ina Sisa goi go, ana wowókana geya aetuneyeta, Sisayana manakaena bei ana wowokanayana iyagoi? Anuwonúwana moe yaluwo.’
‡25:13 Agiripa: Ame tauyana yoina madabokina moe Erodi Agiripa. Tubuna moe Erodi Toolagaina (Mad 2). Tubuna vavina tayamo Diyuu, tauna Agiripayana Diyuu idi sinapu iyagoidi.