2
Yaubada ina kanuwóiya goi
yawoimi vau bogina ivinimi
yawoimi vau bogina ivinimi
1 Komi go boi mainao kaamasimi nakae imi kapipilova be imi goyo pasidi.†Kol 2:13. 2 Dogoiyadi goi boi kooketoiya. Nakae poyapoya ame sinapuna adi lovina sinaena goi be aba lovina yábana osasaina ana tolovina ina lovina sinaena goi kokaaiyaka. Aiyuwoina tolovinayana ina dimoni ame tuta tokapipilova yaidi goi mana togaga ipooisógana. 3 Boi kita madabokida ida sinapu tokapipilovayadi idi sinapu nakae. Sakavaida idi yalagau tasabokuuliyedi nakae sakavaida be nuwoda idi vikaiya taguuinuwedi. Tuwo aderida pasina itoboineda Yaubada ina egamogamogu tababane da poyapoya liliudi nakae.
4 E kina go Yaubada ina nuwokapisi gagaina toina be nakae ina matakoi gagaina toina goi imatakooiyeda. 5 Tauna ida kapipilovayadi goi kita kaamasida nakae go, tuwo ina nuwokapisiyana pasina Guyau taiyao yawoida vau ivinida. Ina kanuwóiya goi bogina iyaveda. 6 Tuwaina Guyau Yeisu taiyao ikaitaoemneida go, kita ida spwagógana Tauyana taiyao pasina ikabida, e yábana goi Tauyana taiyao ivatusobuyeda. 7 Moe nakae iguinuwe bego tuta imamaima ina kanuwóiya nikuunikuna ina yabobona goi bei ivagitakoe kita spwagoogonida Guyau Yeisu taiyao yaida. 8 Moitamo. Yaubada ina kanuwóiya goi bogina iyaveda numisa pasina‡Numisa pasina: Da Giriki niyadi goi itoboineda ame livalayadi takaigaviledi kada, ‘Guyau aba numisa ina kabikáwana pasina.’ go, yavayana unana moe geya kita toinida ida guinuwa goi geya. Moe Yaubada ina yabobona goi. 9 Geya ida guinuwa goi geya, govila bei tagágasa. 10 Moitamo. Kita Yaubada ina madágina go, ida spwagógana Guyau Yeisu taiyao pasina iyolimeda guinuwa dedevidi adi guinuwa manudi. Guinuwayadi boi mainao Yaubada igimilovina bego kita ina bodao taguinuwedi.
Yeisu ina guinuwa goi
Diyuu be Totuyoyowo sispwagógana
Diyuu be Totuyoyowo sispwagógana
11 Tauna komi Totuyoyowo bíbina goi yawoimi bogo konuwāisi. Bogina koyagoi kidi Diyuu sakavaidi kuuponidi sitagiwoimi kadi,
‘Komi sakavaimi geya kuponinamo.’
Go sakava ana kupwanayana siguuinuwe moe tomota idi guinuwa kaka, e ame tuta geya basabasainamo. Tuwo komi konuwāisi bego boi 12 amo tutayana Guyau geya yawoimi goi geya; komi taviileimi Isileli tubunao yaima goi be nakae Yaubada ina kanasíuna tamo tamo boi nimatu iguuinuwedi Isileli tubunao yaidi goi go, komi geya. Tauna ina katótula kidi manudi komi geya. Komi poyapoya ame goi geya imi lotutamo yava manuna be nakae Yaubada mooitamoina komi yaimi goi geya. 13 E boi Yaubadayana goi komi masigava go, ame tuta imi spwagógana Guyau Yeisu taiyao pasina Tauyana ikaikaina goi Yaubada bogina imemi kikina. 14-15 Moe moitamo. Kina Guyauyana ida kaba tuboina. Boda aiyuwo, kai Diyuu nuumisaima be komi Totuyoyowo nuumisaimi, ilamgogoida kita taeboda tayamo. Moe nakae aliupa boi kai Diyuu be komi Totuyoyowo nauyayanaida goi ivatumaasabeda go, Guyau bogina iligei. Aliupayana ida kaba vakaleya go, ana ligavayana ame nakae: Guyau wowona goi aliupayana ina togaga itauwe. Vakaleyayana unana moe Yaubada ina Katukeda mana lovina be mana sanaboda. Go itauwe bego bodayada aiyuwo ilamgogoida bei kita ida spwagógana Tauyana taiyao pasina iyolimeda, e kita boda vau tayamo, e tuboina isowóduwo.†Kol 2:14. 16 Aiyuwoina itauwe bego ina kámasa kerose goi bodayada aiyuwo igudalida kita wówana tayamo, e Yaubada ikabivekovekomneida. Tauna keroseyana goi ida vakaleya ikimate.†Kol 1:20. 17 Guyauyana ida kaba tuboina go, aiyuwoina Tauyana ima tuboina italavaite komi boi masigava goi yaimi be nakae kai kikina goi yaima.†Ais 57:19. 18 Italavaite bego Tauyana goi komi Totuyoyowo nuumisaimi be nakae kai Diyuu nuumisaima Baloma Kimaasabaina yaida goi ikaaiyaka, tauna mada tagona Tamada tavalabelabene.
19 Tauna geya tuwaina komi ogaoga o ituli ta boda nakae geya, go sem komi koetonikasa kai Yaubada ina kimasabayao taiyao be nakae kai toinina ina bodayauwo bogina kosiukoima. 20 Unana komi vada nakae, e kai Yeisu ina vamoleyanayao be ina tokabivalavalayao dako nakae yatama goi ami yówana go, dakoyana ana lasáuna moe Guyau Yeisu. 21 Imi spwagógana Guyauyana taiyao pasina komi vada ana gurewa nakae go, tamo tamo Yaubada ikabimi ivaapopoimi kikina kikina, e vadayana madabokina ibibíbina ina gagaina bei komi Vada Kimaasabaina nakae imi spwagógana ida Tomoya taiyao pasina. 22 Aiyuwoina imi spwagógana Guyau taiyao pasina komi vada ana gurewa nakae Yaubada ivaapopoimi kikina kikina ana kadókana komi be kai Yaubada ina kaba kaiyaka. Moeko goi Tauyana Balomaina bei ikaaiyaka.†Rom 8:9; 1Ko 3:16, 6:19; 2Ko 6:16; Ibe 3:6; Nuw 21:3.