Isileli tubunao
adi toyava ana katubayásina tetelina
adi toyava ana katubayásina tetelina
2
(Tateta 2:1-25)
Mosese ina bíbina tetelina
1 E tamagu ana dala Livai‡Ana dala Livai: Korotoyana ana dala yoina Livai unana tubuna yoina Livai, moe Yakobo natuna tayamo. Yakobo natunao adi badabada yawou aiyuwo go, niga tubudiyao adi dala yoidi moe Yakobo natunao yoidi. Tauna Livai moe tomota tayamo ana dala yoina. go, vavina tayamo, moe sinagu, ikabi inai. Sinaguyana nakae ana dala Livai. 2 Sikaaiyaka aaa, sinaguyana ikéuwama. Ikéuwama niga ivenátuna, natuna yau. Ago sinaguyana igitegu bego yau gómana dedevigu, tuwo ikabigu, vada sinaena goi ivamougu ana kadókana tukówana aito.†Gui 7:20; Ibe 11:23. 3 Tutayana tukówana aito sikavava, yau bogina abíbina tupwana, e sinagu geya itoboineyeta ivamougu. Tuwo bayao mana katukábwala iwoi. Ikavava, taa ikabi, ibwade. Ibwade ikavava, ikabigu, idodoigu inavegu sákala Nairi kikina kalavaitou sinaedi goi iyatoigu. 4 Niugu giyakainava masigava goi itaoya iigitegu; latuwona bego iyagoi kaga bei isowóduwo yau yaigu.
5 E Pero natuna vavina mana pakonayao wowoiyai taiyao siiwo sina sakalayana goi. Sákala kikina goi ana wowoiyaiyadi siiketoiya go, Pero natunayana isou iiwo ina bego iisiwo go, ikandobala bayao igite kalavaitou sinaedi ikaaiyaka. Tuwo woiyai tayamo ilatuwoko kana,
‘Kūna amo bayaoyana kwābi kūme!’
6 E tuwo iiwo ina bayaoyana iyoyoi ime, Pero natuna ivini. Ivini, vavinayana ikatupáeve, yau igitegu ataitáiya. Tuwo vavinayana inuwokapisiye, idigo kana,
‘Iyaa! Ame nakona kidi Iberiu natudi tayamo.’
7 E niugu ibala ima Pero natuna ilatuwoko idigo kana,
‘Latuwom bego ana vavina Iberiu alatuwoko ima gomanayana ikabi ivanunu manum?’
8 ‘Dedevina, kūna’, Pero natuna kaena.
Tuwo niugu ina sinama ilatuwoko ima. 9 E tuwo sinamayana ima go, Pero natuna idigo kana,
‘Gómana ame kwābi kuvanūnu manugu gobe yau aemaisim.’
E moitamo sinagu ikabigu, ivaanunugu.
10 E tutayana bogina abíbina, sinagu ikabigu inavegu Pero natuna ivini bego yau natuna.†Gui 7:21. E vavinayana idigo kana,
‘Gomanayana bwae goi ayoyoi, tauna avayou Mosese.’‡Mosese: Ame youyana Isileli tubunao niyadi goi ana taiyakeka nakae yóyova.
Mosese Itipita goi isiya inonoina Midiyani tetelina
11 E tutayana bogina akaitubuwau, tuta tayamo ataoya ana osegowo Iberiu avadadedi go, agitedi idi kogúyala moumou isaki. Aiyuwoina guma Itipita agite ivalauláuwo Iberiu tayamo iiláui. Tauyana moe osiyagu tayamo.†Ibe 11:24. 12 E amatavilavila, geya tayaamo tomota agite, tuwo siyagu avaite, e guma Itipitayana aláui, akaumate. Akaumate ikavava, wowona akabi avamou, ediédila goi avakum. Avakum ikavava, akaluvila ana guna vada amasisi. 13 Amasisi vanuwo itomo, aiyuwoina akaluvilamna ana osegowo avadadedi go, anonoina Iberiu adi taiyuwo agitedi sivalauláuwo. Tuwo togiyosásala alatuwoko adigo kagu,
‘Kaga unana siyada kuuláui?’
14 Go kina togiyosasalayana ibolagu idigo kana,
‘Kom avatau ivayokoim bego kai ama tolovina o ama totakínona? Manakae? Bego kwaumategu nakae boile guma Itipita kwaumate ae?’
E yau bogina amatoita; guna nuwonúwana kagu,
‘O guna guinuwa bogina siyagoi.’
15 E tutayana guna guinuwayana valena Pero inove, ina tovayaviyayao ilatuwokoidi sima bego sikaumategu go, yau Pero ina kaba lovina goi asiya ana Midiyani dadavina goi atunagu. Amoko goi doelu tayamo ikaaiyaka, e kikina goi atunagu.†Gui 7:23-29; Ibe 11:27.
16 E kina go da Midiyani adi Tonúwala yoina Reuweli‡Reuweli: Ame tauyana youyuwoina moe Iyetoro (Tat 3:1). amoko goi ikaaiyaka. Tauyana natunao vevina adi badabada ainima aiyuwo. E natunaoyadi sima doelu goi bwae sitegatega, yoguyogu adi kaba nim goi sisiwoi, idi yoguyoguyao adi bwae. 17 Sisiwoi go, ituli ta yoguyogu adi tomatakavatayao koroto sima vevinayadi sivatapiyedi. Latuwodi toinidi idi yoguyoguyao sivanimdi. Sivatapiyedi go, agitedi, tuwo ataoya vevinayadi ayavedi. Ayavedi ikavava, idi yoguyoguyao avanimdi. 18 E vevinayadi sikaluvila sina tamadi Reuweli goi go, tamadiyana igitedi, nukotona iwówana idigo kana,
‘Ii! Kaga unana tauna ame mainao koma?’
19 ‘Koroto tayamo guma Itipita doelu goi ikaaiyaka iyavema yoguyogu adi tomatakavatayao yaidi goi. Tauyana nakae bwae itege manuma nakae im yoguyoguyao ivanimdi!’ natunaoyadi kaedi.
20 ‘Go korotoyana nako? Kaga unana kokalave? Kōna kolatuwōko ima ikáika’, tamadi kaena.
E tuwo moitamo sima silatuwokoigu ana. 21 E ana kidi taiyao kakáika. E Reuweli latuwona akaiyaka kidi taiyao. Atagona, e niga korotoyana natuna yoina Sipora ivinigu monegu. 22 Kakaaiyaka, e Siporayana ikéuwama, niga ivenátuna, natuma koroto. Tauyadi alatuwokoidi adigo kagu,
‘Yau amalatonikasa ituli ta kasa goi.’
Tauna gomanayana avayou Gerasom.‡Gerasom: Ame youyana Isileli tubunao niyadi goi ana taiyakeka nakae malatonikasa amoko goi.
Yaubada inuwokavate boi Eberamo ikanasiuko
23 E tala maanawena Midiyani goi akaaiyaka go, amo talayadi mlidi da Itipita adi tolovina ikámasa go, tuwo segowo Isileli tubunao idi kogúyala moumouna pasina sikalayawoi be nakae sitaiyaduduwo vaita manuna. Idi taiyaduduwoyana ituko ina Yaubada yaina goi, 24 e Tauyana inove. Ina kanasiunayana boi Eberamo, Aisake be nakae Yakobo yaidi goi inuwokavate.†Abv 15:13-14. 25 Isileli tubunao idi kaiyakomou igite, manudi inuwonúwana gagaina.
‡2:1 Ana dala Livai: Korotoyana ana dala yoina Livai unana tubuna yoina Livai, moe Yakobo natuna tayamo. Yakobo natunao adi badabada yawou aiyuwo go, niga tubudiyao adi dala yoidi moe Yakobo natunao yoidi. Tauna Livai moe tomota tayamo ana dala yoina.
‡2:10 Mosese: Ame youyana Isileli tubunao niyadi goi ana taiyakeka nakae yóyova.
‡2:16 Reuweli: Ame tauyana youyuwoina moe Iyetoro (Tat 3:1).
‡2:22 Gerasom: Ame youyana Isileli tubunao niyadi goi ana taiyakeka nakae malatonikasa amoko goi.