1 E Besaleli gaigíyala taalaidi ikabidi, dedeoga imadagi. Ana mamanao panetayataya aba katugúyala go, ana papaeva panetayataya go, ana tukotuko panetayataya. 2 Ikavava, e dedeogayana toluyena be sinaena goi góura maavadaina go, paaevaidi ikaupatukoidi. Ikavava, kinababaina goi ana papa góura ikaupatuko. 3 E rini góura aivasi imadagidi, aena aivasi goi iyatoidi, dadava aiyuwo, dadava aiyuwo. 4 Ikavava, aitakeo aiyuwo gaigíyala ibobóidi go, góura paaevaidi ikabidi, aitakeoyadi ipaimidi. 5 Ikavava, riniyadi goi ivaisiudi, e bei dedeogayana sikaitakeve.

6 Imadagi ikavava, e góura maavadaina ikabi, ana katukábwala góura imadagi. Ana katukabwalayana moe aba núwala go, ana kakainaki ame nakae: Ana mamanao panetayataya aba katugúyala go, ana papaeva panetayataya. 7 Ikavava, góura itutu, yábana ana tomatakavatayao aiyuwo imadagidi tokwalu nakae. Imadagidi ikavava, aba núwala yatana goi iyatoidi, 8 tayamo matakubuna, tayamo matakubuna goi ikaupakiyedi. 9 Ego yábana ana tomatakavatayaoyadi ma panepanedi imadagidi go, panepanediyadi siyosaledi, e aba núwala†Roma 3:25; Iberiu 9:5; 1 Iyoni 2:2, 4:10. sitakabobo be simatakavate. Adi taiyuwokova matana matana sikaaiyaka go, sikandosobu aba nuwalayana sigitegite.

10 E Besaleliyana gaigíyala taalaidi ikabidi, teboro tayamo imadagi. Teboroyana ana kakainaki ame nakae: Ana mamanao panetayataya kasikasi go, ana papaeva aba katugúyala go, ana tukotuko panetayataya. 11 Imadagi ikavava, teboroyana goi góura maavadaina be paaevaina ikaupatuko. Ikavava, kinababaina goi ana papa góura ikaupatuko. 12 Ikaupatuko ikavava, teboroyana yatana goi tupaota góura iyatoidi sivaníbita. Tupaotayadi adi tukotuko nimakulemwasi tayamo. Go tupaotayana goi ana papa góura ikaupatuko. 13 Ikavava, e rini aivasi góura maavadaina imadagidi, teboro matakubuna aivasi goi iyatoidi. 14 Sikaaiyaka tupaotayana kikina go, sobuyekoina goi, e bei teboroyana aitakeo goi sikaiitakeve. 15 Rini iyatoidi ikavava, aitakeo gaigíyala aiyuwo ibobóidi, e aitakeoyadi goi góura paaevaina ikaupatuko. 16 Ikaupatuko ikavava, e góura maavadaina ikabi, teboroyana ana noko, ana pereiti, ana botori be ana borodisi imadagidi. Botoriyana be borodisiyana moe idi vininabeso oine manuna.

17 E Besaleli góura maavadaina ikabi, itutu, e rampa adi kaba yata imadagi. Aba yatayana alova maisiyana, tauna unana, tolobona, gadona be nakae senina vagana imadagidi go, madabokina ana lamgógana góura tayamo. 18 E tolobona goi laonina nakae ainima tayamo imadagidi situko, dadavina aito, dadavina aito. 19 Laoninayadi tamo tamo goi senina vagana ma gadona aito sikaaiyaka. Seninayadi taniya maisiyana. 20 Go tolobonayana goi senina vagana ma gadona aivasi imadagidi. 21 Nako goi laonina sisowóduwo tolobona goi, e senina vagana ma gadona sikaaiyaka. 22 E senina gadona be laonina góura maavadaina situtudi go, ana lamgógana góura tayamo. 23 Ikavava, e góura maavadaina ikabi, rampa giyaidi‡Rampa giyaidi: Ame rampayadi siyatoidi láwana sipona yatadi. ainima aiyuwo be wiki ana kaba kalikaina be nakae ana noko imadagidi. 24 E góura mavadainayana ana moumou nakae kilo ana badabada 30 ikabi rampa adi kaba yata be nakae konanina adi madágina manudi.

25 E Besaleli gaigíyala taalaidi ikabidi, insensi ana kaba kasala imadagi. Aba kasalayana ana mamanao be nakae ana papaeva moe aba katugúyala go, ana tukotuko panetayataya kasikasi. Ikavava, ana sakusaku aivasi matakubuna goi iyatoidi. Go sakusakuyadi be aba kasala alova tayamo goi imadagidi. 26 Imadagi ikavava, góura maavadaina be paaevaina ikabi, aba kasalayana goi ikaupatuko. Tauna madabokina góura. Ikaupatuko ikavava, e kinababaina goi ana papa góura ikaupatuko. 27 Ikavava, e rini aiyuwo góura imadagidi, ana papa kikina go, sobuyekoina goi ikaupatukoidi, dadavina tayamo, dadavina tayamo. Riniyadi moe aitakeo manudi. 28 Ikaupatukoidi ikavava, e aba kasalayana ana kaitakeo aiyuwo gaigíyala ibobóidi, góura paaevaidi goi ipaimidi.

29 E Besaleli pútuma aba kaipaku imadagi namliyeta ikimasabe Yauwe umana. Ikavava, alova sisina be nakae náuna lamna ikabidi, insensi maavadaina be nakae mainina dedevina imadagi. Go putumayana be insensiyana adi madágina nakae tauyadi pútuma be insensi adi tokatanaki idi paisewa nakae.†Tateta 30:22-38.