11
Lasalo ina kámasa tetelina
1 E tayamo tokatówana yoina Lasalo‡a Lasalo: Ame youyana da Giriki niyadi go, ana yagoina moe Yaubada ivaita. Kidi Diyuu niyadi kadi, ‘Eliyesa.’ guma Betani.‡b Betani: Ame asayana Yerusalema kikina goi ikaaiyaka (Iyo 11:18). Ego ituli ta Betani Iyoridani bomatu dadavina goi ikaaiyaka (Iyo 1:28, 10:40). Betaniyana moe Lasalo ma niunao Meri be Marita† Luk 10:38-39. idi kasa. 2 E ame Meriyana† Iyo 12:3. nava bei pútuma ikabi, Tomoya aena ikatukoisidi be nakae kununa goi Tauyana aena isekukudi. Ame Meriyana niuna Lasalo ikatówana. 3 E tuwo Lasaloyana niunao vala sietune ina Yeisu goi sidigo kadi,
‘Tomoya, tauyana kumataakoiye ikatówana.’
4 Go idi livalayana Yeisu inove, idigo kana,
‘Atówana amo goi bei geya ikamasavateta, go sem ina katowanayana moe Yaubada ina togaga ana káeyana ana vagitákwana manuna bego ina togaga ana kaeyanayana Natuna goi ivagitakoe.’
5 E Yeisu Marita mana gómana be niudi Lasalo imatakooiyedi. 6 E tauna tutayana valayana inove bego Lasalo iikatówana, dadavayana Iyoridani goi maliyalina aiyuwo tuwaina ikaaiyaka.
7 Amo maliyalinayadi mlidi kai Yeisu ina tovatotowanayao ilatuwokoima idigo kana,
‘Takaluvilāmna tāna Yudiya goi.’
8 Go kai tovatotowanayama kadigo kama,
‘Tovatulúkwana Toolagaim, ame tuta Diyuu sipooikíkina bego gurewa goi sikaumatem go, manakae? Bego aiyuwoina kukaluvilamna kuna amoko goi?’
9 Go iya Yeisu kana,
‘Geya. Bogina kooyagoi maliyalina goi mavada ikaaiyaka awa ana badabada yawou aiyuwo ae? Neta maliyalina goi taaketoiya, e poyapoya ame ana mavada itoboineda tagite, tauna geya isatupedeta. 10 Go neta sabamgo goi taaketoiya, e mavada yaida goi geya, tauna bei isatupeda.’
11 Moe dogoiyadi Yeisu idigedi namliyeta ilatuwokoima idigo kana,
‘Siyada Lasalo bogina iimasisi go, ana bego awoini.’
12 E tuwo kai ina tovatotowanayao kadigo kama,
‘Tomoya, neta bogina iimasisi, bei iboboina, tuwo geya tanoita.’
13 Ego Yeisu Lasalo ina kámasa manuna ibobóbwara go, kai katainasi, kanuwonúwana bego ina livala masisi toina manuna. 14 E tuwo ame tutayana goi Yeisu ibobwara dókana idigo kana,
‘Lasalo bogina ikámasa 15 go, auyáwana bego yau geya akaiyaketa ina katówana goi komi imi numisa manuna bego guna guinuwa kogite konumisegu. Tuwo ameko geya takaiyaketa, go sem tāna tauyana tagīte.’
16 E tuwo Tomasi, tauyana youyuwoina Didimosi, ilatuwokoima idigo kana,
‘Kita nakae Tauyana taiyao tāna Yudiya goi bego Tauyana taiyao takámasa.’
17 E Yeisu kai taiyao kama Betani goi, Yeisuyana silatuwoko bego Lasalo bogina ikámasa go, moe bogina maliyalina aivasina valiwoga tukubu sinaena goi ikaaiyaka. 18 Ego Betaniyana Yerusalema tupwana yomana nakae kilomita aito. 19 E kidi go Diyuu badabadaaidi Yerusalema goi bogina sima; latuwodi bego Marita be Meri niudi manuna sivayoledi. 20 E iya go Marita tutayana inove bego Yeisu bogina ima, ina ivalobode. E iya go Meri vada sinaena goi iitusobu ikaaiyaka. 21 E Marita ina Yeisu ivalobode go, idigo kana,
‘Tomoya, neta kom boi ameko goi, niugu geya ikamaseta go, nukotogu geya itopeta, 22 go sem ame tuta nakae ayagoi bego kaga neta Yaubada yaina kukawanoiye, Tauyana bei ivinim.’
23 Yeisuyana idigo kana,
‘Nium bei itaoyamna.’
24 Go kina Maritayana idigo kana,
‘Bogina ayagoi bego taoyamna ana tuta moe tuta ana kaba lukavava goi bei itaoyamna.’
25 Go Yeisuyana idigo kana,
‘Yau Tauyagu taoyamna be yawana vata unadi. Avatauwa neta sinuumisegu, moitamo bei sikámasa go, nava yawoidi vau bei sibabane. 26 Avatauwa neta maa yawoidi vau sinuumisegu, geya sikamakámasa. Moe kunumise?’
27 Maritayana idigo kana,
‘U Tomoya. Yau bogina anumisa bego kom Guyau, Yaubada Natuna kuma poyapoya ame goi.’
28 Marita ibóbwara ikavava, ikaluvilamna ina ina vada goi ana gómana Meri iduduwe ima ikului idigo kana,
‘Tovatulúkwana bogina ima ilumaadadem; latuwona kom.’
29 E tutayana Meriyana inove, mainao itaoya, ina Yeisu yaina. 30 Ego Yeisu iya nava geya imaita idi kasa goi, go sem asayana maine Marita ivaalobode goi ikaaiyaka. 31 E tuwo kidi Diyuuyadi vada goi Meri taiyao sikaaiyaka siivayole, tauyana sigite woilina itaoya isowóduwo, sisabokuliye. Idi nuwonúwana bego tauyana ina valiwoga tukubu goi bego itaiyakuwokúwala.
32 E kina go Meriyana tutayana isowóduwo Yeisu goi, Tauyana igite, tuwo aena goi ikanakabobo idigo kana,
‘Tomoya, neta boi kom ameko goi, yau niugu geya ikamaseta.’
33 E Yeisu ikandobala Meri ina taiyakuwokúwala igite nakae Diyuuyadi taiyao simamaima idi taiyakuwokúwala igite, tuwo gamona igoyo be nakae nukotona taitáiya iuyoi. 34 Tuwo idigo kana,
‘Tauyana nako goi koyato?’
‘Tomoya, kūma kugīte’, tauyadi kaedi.
35 Tuwo Yeisu itáiya. 36 E tuwo Diyuuyadi sidigo kadi,
‘Kogīte. Siyana imataakoiye gagaina!’
37 Ego maniyedi kadi,
‘Ame Tauyana tokebo matadi ikidedevinedi go, manakae? Geya tayaamo kaga itoboine iguinuwe bego siyana ikidedevine bei ina katówana goi geya ikamaseta?’
Yeisu ina kaba kinana gagaina:
Lasalo ámasa goi ikaaitáoe tetelina
Lasalo ámasa goi ikaaitáoe tetelina
38 E iya go Yeisuyana inove, aiyuwoina gamona igoyo,‡ Gamona igoyo: Ame livalayana da Giriki niyadi goi geya imavadeta. Ameko itoboineda takaigavile kada, ‘Gamona igoyo’ o itoboineda kada, ‘Nukotona taitáiya iyoi.’ ima valiwoga tukubuyana goi. Ego valiwogayana moe tukubu go, tobuna goi gurewa paaevaina sikaubode. 39 Yeisu ima valiwogayana goi idigo kana,
‘Gurewa kopūli!’
Go tokámasa niuna Marita idigo kana,
‘Tomoya, bogina ibówana go! Moe maliyalina aivasi bogina sikavava!’
40 Go iya Yeisuyana idigo kana,
‘Manakae? Kaga bogina alatuuwokoim kunuwoilave? Neta kunumisegu, Yaubada ina togaga ana káeyana ana vagitákwana bei kugite!’
41 E tuwo moitamo gurewayana sipuli. E iya go Yeisuyana matana idolaga ikawanoi idigo kana,
‘Tamagu, akauyagu yaim bego bogina kunovegu. 42 E yau bogina aayagoi bego tuta liliuna kuunovegu go, boda sitaoyaakobugu pasina nakae abóbwara bego sinumisa kom kuetunegu.’
43 Tuwo Yeisu amo nakae ikawanoi ikavava, niyana gagaina goi iduduwo idigo kana,
‘Lasalo e! Kusowōduwo!’
44 Tuwo tokamasayana isowóduwo ima go, aena be nimana areko goi bogina uutubaidi. Maisina nakae paaimina areko goi. Yeisuyana ilatuwokoidi idigo kana,
‘Kotaligēi, kokalāve iketoiya!’
Tuwo nakae siguinuwe.
Diyuu adi tolovinayao idi nuwonúwana
Yeisu ina kaba kinana manuna
Yeisu ina kaba kinana manuna
(Madiu 26:1-5; Maki 14:1-2; Luke 22:1-2)
45 E kidi go Diyuuyadi badabadaidi boi simamaima Meri goi, Yeisu ina guinuwa sigite, e sinumise. 46 E kidi go maniyedi sina Parisi yaidi goi Yeisu ina guinuwayana sitalavaite. 47 E tauna kidi Tonúwala Gagaidi be Parisi idi tomoyamoyayao sikatuvagogu idi kotu gagaina manuna. Sima situgúguna sidigo kadi,
‘Amo korotoyana aba kinana badabadaidi iguuinuwedi. Tauna bei kita manakaeda? 48 Neta Tauyana tatagone nakae iguuinuwe, tomota liliudi bei sinumise go, da Roma bei sima kita ida Vada Kimaasabaina sitauwe be nakae ida tomota sikaumatedi!’
49 E tayamo koroto yaidi goi yoina Kaiyapasi. Iya Tonúwala Toolagaina tala amo goi. Tauyana idigo kana,
‘Komi geya tayaamo kaga koyagoi ae? 50 Manakae? Geya konuwonuwoneta bego kita ada dedevina manuna bego tayamo koroto itoboine ikámasa tomota liliuda ada katumapu go, kita Isileli ina bodao madabokida geya tavailaita ae?’
51 E moe Kaiyapasi ina livalayadi iidigedi geya toinina ina nuwonúwana goi geya, go sem tauyana Tonúwala Toolagaina tala amo goi, tauna Yaubada ina livala ikabivalevale bego Yeisu giyakainava bei ikámasa Isileli ina bodao adi katumapu. 52 Ago geya Isileli ina bodao aditava manudi bei ikámasa geya, go sem itoboine Yaubada natunao bogina sisapasapa italigogoidi sima sieboda tayamo.
53 E amo maliyalinayana goi siyupuyupu bego Tauyana sikaumate.
54 E tauna iya go Yeisuyana geya tuwaina Diyuu yaidi goi ivamamaétala, go sem Tauyana kai ina tovatotowanayao taiyao Betani kakalave kana asa tayamo yoyowo kikina. Asayana yoina Eparaim. Amoko goi kakaaiyaka.
55 E Diyuu adi Basitáwana Aikanina bogina ana kebukebu. Tuwo tomota badabadaidi idi kasa goi Aikayana manuna situko sina Yerusalema bego toinidi sikimasabedi Yaubada yaina namliyeta baige Aikayana siguinuwe. 56-57 E tomotayadi sima Yerusalema goi Yeisu siilusale. Siilusale go, kidi Tonúwala Gagaidiyadi be Parisiyadi lovina siyato kadi,
‘Avatauwa komi neta kooyagoi Yeisu nako ikaaiyaka, kotalavāite yaima bego itoboinema kana kayoisi.’
E tuwo tomotayadi Vada Kimaasabaina goi siitaoya, taudiva sibobóbwara sidigo kadi,
‘Manakaemi konuwonúwana? Bei Tauyana ima Aikayana manuna gea geya? Geya ae?’
‡a11:1 Lasalo: Ame youyana da Giriki niyadi go, ana yagoina moe Yaubada ivaita. Kidi Diyuu niyadi kadi, ‘Eliyesa.’
‡b11:1 Betani: Ame asayana Yerusalema kikina goi ikaaiyaka (Iyo 11:18). Ego ituli ta Betani Iyoridani bomatu dadavina goi ikaaiyaka (Iyo 1:28, 10:40).
‡11:38 Gamona igoyo: Ame livalayana da Giriki niyadi goi geya imavadeta. Ameko itoboineda takaigavile kada, ‘Gamona igoyo’ o itoboineda kada, ‘Nukotona taitáiya iyoi.’