5
Yeisu ina tovatotowanayao
vakuumgoidi iduuduwedi tetelina
vakuumgoidi iduuduwedi tetelina
(Madiu 4:17-22; Maki 1:16-20)
1 E tuta tayamo bodayadi Yeisu sivatuvagivagigi†Mak 3:9-10, 4:1. be nakae Yaubada ina livala ivaatulúkwana sitaaiyakeke go, Tauyana Genesareta Bwaena‡Genesareta Bwaena: Ame youyuwoina Galili Bwaena. kikina goi iitaoya. 2 Iitaoya, toúwata idi oga aiyuwo katuloopoudi igitedi go, touwatayadi bogina sisou idi úwata siinikidi. 3 E Yeisu Saimoni ina oga tayamo goi isowoya senao taiyao. Ikavava, Saimoniyana ilatuwoko idigo kana,
‘Saimoni, mamaya goi giyaina tataiwokōva.’
Tuwo moitamo giyaina sitaiwokova go, ogayana goi Yeisu itusobu ivatowo tomota ivatulukoidi.
4 E tutayana Yeisu ina vatulúkwana ilukavave, Saimoni ilatuwoko idigo kana,
‘Saimoni, tataiwokōva giyaina dimowonina goi go, imi úwata kolavēdi.’
5 Go kina Saimoniyana idigo kana,
‘Go Tomoya, sabamgo ana madabokiina goi kapooisógana go, geya kada tayaamo kaga kakone geya.†Iyo 21:3. Go kom im livala pasina ima úwata bei kalavedi.’
6 Tuwo moe nakae siguinuwe. Ikavava, idi úwata silavedi go, íyana badabadaidi sikonedi. Nakae idi uwatayadi giyakainava sikolabudi.†Iyo 21:6. 7 Tuwo kidi Pita ina tosavaiyuwo oga aiyuwoina goi silokosidi sina sivaitedi. Sina go, oga aiyuwokova sivakayaodeidi, e giyakainava bei sisalili. 8 E Saimoni Pita igite kaga iisowóduwo, tuwo Yeisu matana goi aena ivatugúyala idigo kana,
‘Tomoya, yau koroto toogoyoigu, tauna kwalavēgu.’
9 Ina bobwarayana unana moe íyana badabadaidi sikonedi, e tauyana ma senao sigite go, guinuwayana goi Yaubada ina togaga sikinane, tauna nukotodi siwówana. 10 E ina tosavaiyuwo Sebedi natunao Yemesa be Iyoni nakae nukotodi siwówana. E tuwo kina Yeisu Saimoni ilatuwoko idigo kana,
‘Taabu kuumatōita. Ame tuta nakae tuta simamaima kom bei tomota kuuwosidi!’
11 Tuwo sitayava sima oga siyagasidi ikavava, konadi liliudi sikalavedi go, Yeisu sisabokuliye.
Yeisu tolepero ikideedevine tetelina
(Madiu 8:1-4; Maki 1:40-45)
12 Yeisu asa tayamo goi ikaaiyaka go, tayamo koroto ikaaiyaka, sakavaina madabokina lepero ibugoyai. E korotoyana ima Yeisu igite, ikanakabobo, ikawanoi makimaki Tauyana yaina idigo kana,
‘Tomoya, neta im nuwonúwana nakae, itoboinem kukidedevinegu bei sakavaigu imavada.’
13 Tuwo Yeisu nimana iyosale, toleperoyana ibisikone idigo kana,
‘Guna nuwonúwana nakae. Kumavāda!’
Tuwo mainao korotoyana sakavaina ina lepero ikavava, e sakavainayana imavada. 14 Ago Yeisu korotoyana ilovinae idigo kana,
‘Am kimavada manuna geya vatau tayaamo kulaatuwōko, go sem kūna Tonúwala yaina goi kuvagitakōim igitem bei ivayokoim kom bogina kumavada. Ikavava, im vininabeso yoguyogu kukasāle Yaubada yaina ada lovina boi Mosese iivinida tolepero adi kimavada manuna nakae.†Vin 14:1-32. Moe aba kinana tomota yaidi sakavaim bogina imavada, e bei siuyaonemneim.’
15 E Yeisu valena tuwaina inunúnuwo. Tuwo boda gagaina sideli sima latuwodi Tauyana sitaiyakeke be idi katówana goi ikidedevinedi. 16 Ego kina Yeisu tuta liliuna boda ikaalavedi go, anetava ina yoyowo goi ikaawanoi.
Yeisu topem ikideedevine tetelina:
Mana lovina tomota idi goyo inuwotaoidi
Mana lovina tomota idi goyo inuwotaoidi
(Madiu 9:1-8; Maki 2:1-12)
17 Maliyalina tayamo Yeisu nakae vada tayamo goi ikaaiyaka ivaatulúkwana go, Parisi maniyedi be Yaubada ina Katukeda ana tovatulukwanayao maniyedi nakae sikaaiyaka. Tauyadi asa liliudi Galili be Yudiya adi dadava goi be nakae Yerusalema goi sima siitusobu Yeisu sitaaiyakeke. Ago Yauwe ina togaga ikaaiyaka Yeisu yaina goi bei itoboine ikidedevina. 18 Nakae go, koroto maniyedi topem ma liyaliyakaina sikavale sime. Sime sipoikíkina bego sisiuye Yeisu matana goi siyato 19 go, boda isaki pasina geya tayaamo enao sibabane bego sisiuye. Tuwo aitámana toluye goi simwerae sinave vada yatana goi átava giyaina sikibale. Ikavava, topemyana ma liyaliyakaina sisoilave isou Yeisu matana goi siyato. 20 Siyato go, idi numisa igite, tuwo topemyana ilatuwoko, idigo kana,
‘Siyagu, yau adigo kom im goyo adi nuwotao bogina kubabane.’
21 Ago kidi Yaubada ina Katukeda ana tovatulukwanayao be nakae Parisi sinuwonúwana kadi,
‘Iyaa! Amo Tauyana manakae! Idigopopóita! Tauyana bego ieyaubada! Geya vatau tayaamo itoboine bei tomota idi goyo inuwotaoidi. Moe Yaubada anetava itoboine.’
22 E idi nuwonuwanayana Yeisu bogina iyagoi, tuwo ilatuwokoidi idigo kana,
‘Komi kaga unana nuwomi goi nakae konuwonúwana? 23 Gobe ava livala ikakapu ame tauyana alatuwoko? Kagu, “Kom im goyo ana nuwotao bogina kubabane!” Gea kagu, “Kutāoya, kuketōiya”? Nako ikakapu? 24 E itoboine koyagoi bego Tomalatomota mana lovina poyapoya goi tomota idi goyo inuwootaoidi.’
Yeisu itugavila topemyana ilatuwoko idigo kana,
‘Alatuwokoim kutāoya, im baseko kwābi, kwaluvīla kūna im kasa!’
25 Tuwo moitamo mainao topemyana tomota matadi goi itaoya, ina baseko boi ina liyaliyaka goi ikabi, yaidi goi isowóduwo ina ina vada go, Yaubada ina togaga ana káeyana ikamooitamoe. 26 Tauyana boda liliudi sigite, to sopadi ikaupatudi gagaina, tauna Yaubada ina togaga ana káeyana sikamoitamoe go, madi matoita wowooinina sidigo kadi,
‘Ame ame baige aba kainaopa bogina tagitedi!’
Yeisu Livai iiduduwe tetelina
(Madiu 9:9-17; Maki 2:13-22)
27 Amo ikavava, Yeisu isowóduwo go, takisi ana togogo yoina Livai igite takisi ana kaba gogo goi iitusobu ipaaisewa. Tuwo ilatuwoko idigo kana,
‘Livai, kūma kusabokuliyēgu!’
28 Tuwo moitamo konana liliudi ikalavedi go, itaoya, Yeisu isabookuliye. 29 Tuwo áika gagaina ina vada goi Yeisu manuna iguinuwe. Yeisuyana mana tovatotowanayao sina takisi ana togogo be boda maniyedi tauyadi taiyao siitusobu sikakáika. 30 Ago kidi Parisi ma senao Yaubada ina Katukeda ana tovatulukwanayao sima Yeisu ina tovatotowanayao yaidi goi sikaukulukúluwo, sidigo kadi,
‘Kaga unana takisi ana togogoyao be ituli ta toogoyoidi taiyao kokakáika be konimnim?’†Luk 15:1-2.
31 Go kina Yeisu ilatuwokoidi idigo kana,
‘Gwa. Tauyadi madi deedevina geya latuwodi doketa, go sem kidi tokatówana latuwodi doketa. 32 Ama geya tauyadi toinidi sinuwonúwana bego kidi tokibóbwata aduduwedi geya, go sem ama toogoyoidi aduduwedi bei situgavila.’
33 E maniyedi tomota kadi,
‘Iyoni ina tovatotowanayao tuta tuta sidiiyakímwana be nakae sikaawanoi. Parisi idi tovatotowanayao nakae. Go kom im tovatotowanayao manakae sikakáika be sinimnim?’
34 E kina go Yeisuyana idigo kana,
‘Neta nai ana káika goi tonai koroto nava yaimi ikaaiyaka, manakae? Itoboinemi bei nai ana toyokoyao kolovinaedi madi nuwomou sidiyakímwana? Geya ae? Go sem itoboinedi madi uyáwana sikakáika ae? 35 E diyakímwana ana tuta nava imamaima. Amo tutayana tonaiyana bei siyoisi sinave, e tuta amo goi baige tauyadi sidiyakímwana.’
36 E livalakaibala nakae ilatuuwokoidi vatulukwana bogo be vatulukwana vau manudi idigo kana,
‘Geya vatau tayaamo kwama vau goi giyaina ikiise, boboda ikabi, ana kwama bogo taaporaina goi igilumipatuko, govila bei ana kwama vauyana bogina igoyo be nakae boboda vau be kwama bogo maisidi ituli ituli. 37 Aiyuwoina geya vatau tayaamo oine vau ikabi, opo bogo goi isaligogo, govila bei oine vauyana ana togaga pasina opo itapao, e oineyana idau besobeso go, opoyana bei igoyo. 38 Go sem oine vau takabi, opo vau goi tasiwoi. 39 Avatau neta oine bogo inimnim, geya latuwona oine vau kana,
“Ame oine bogo bogina yoiyagu.” ’