6
Yeisu Sabati ana Tomoya
(Madiu 12:1-8; Maki 2:23-28)
1 E Sabati tayamo goi Yeisu mana tovatotowanayao tánuwo sinaena siiketoiya. Ago ina tovatotowanayaoyadi witi keuwoina siiguwedi, nimadi goi sikimtumtudi sikakáika.† Atu 23:25. 2 E kidi go Parisi maniyedi sikaaiyaka Yeisu mana bodao sigitedi, silatuwokoidi sidigo kadi,
‘Komi manakae koguuinuwa kaga Sabati ana lovina geya itagonedeta taguinuwe?’
3 Go kina Yeisuyana idigo kana,
‘Manakae? Kaga Devida boi iguuinuwe tetelina geya kokatuyaiviyeta ae? Boi tutayana ma senao loga sikámasa go, geya avadimo. 4 Tuwo Devidayana Yaubada ina Vada goi isiu, Tonúwala yaina ikawanoi awoinu manuna. Tuwo tonuwalayana beredi kaasalaidi†a Tat 35:13. ikabidi, Devida ivini ikáika. Ikáika ikavava, senao nakae ivinidi sikáika. Go geya vatau tayaamo mana tagona berediyadi ikáika.†b Vin 24:9; 1Sa 21:1-6. Moe kidi Tonúwala taudiva madi tagona sikáika.’
5 Tuwaina Yeisu idigo kana,
‘Tomalatomota moe Sabati ana Tomoya, e ilovina kaga itoboine Sabati goi tomota siguinuwe, tauna guna tovatotowanayao geya adi pikwanamo.’
Sabati goi Yeisu koroto nimana
napanapaina ikideedevine tetelina
napanapaina ikideedevine tetelina
(Madiu 12:9-14; Maki 3:1-6)
6 E ituli ta Sabati goi Yeisu ina Diyuu idi kaba tugúguna goi isiu ivaatulúkwana. Go koroto tayamo amoko goi ikaaiyaka nimakakataina napanapaina go, kaamasina. 7 E kidi Yaubada ina Katukeda ana tovatulukwanayaoyadi be Parisiyadi nakae sikaaiyaka, Yeisu sidumaakavate; latuwodi sigite neta Sabati goi ikidedevina. Idi dumakavatayana bego Tauyana ina goyo tayamo sibabane bei itoboinedi sikamamaetali Sabati ana lovina ana tokapipilova. 8 E kina go Yeisu idi nuwogau bogina iyagoidi. E tuwo korotoyana ilatuwoko idigo kana,
‘Kom nimam kaamasina, kutāoya tomota nauyayanaidi goi kwaaiyāka.’
Tuwo moitamo itaoya tomota nauyayanaidi goi ikaaiyaka. 9 E Yeisu itugavila, Parisiyadi be Atukeda ana tovatulukwanayaoyadi ilatuwokoidi idigo kana,
‘Ame guna lumadádana: Manakae? Itoboineda Sabati goi tavaita gea tayogedageda? Tomota yawoina tayave gea takaumate?’
10 Tuwo imatavilavila madabokidi yaidi goi go, itugavila korotoyana ilatuwoko idigo kana,
‘Siyagu, nimam kuyosāle.’
Tuwo moitamo nakae iguinuwe go, korotoyana nimana bogina idedevina. 11 E kidi Parisiyadi be tovatulukwanayadi gamodi igoyo toina, tuwo taudiva silosinapu kaga bei siguinuwe Yeisu yaina.
Yeisu ina vamoleyanayao
yawou aiyuwo ikiinavedi tetelina
yawou aiyuwo ikiinavedi tetelina
(Madiu 10:1-4; Maki 3:13-19)
12 E moe tutayana Yeisu ina koya goi ituko awanoi manuna. Sabamgo ana madabokina Yaubada yaina ikaawanoi. 13 Go tutayana vanuwo itomo, ina tovatotowanayao iduduwedi sima, yaidi goi yawou aiyuwo ikinavedi be nakae ivayokoidi kidi ina vamoleyanayao. 14 Yoidi ame nakae:
Saimoni (Yeisu ivayou Pita) ma siyana Anduru,
Yemesa, Iyoni,
Pilipo, Batolomiu,
15 Madiu, Tomasi,
Alipiyo natuna Yemesa, Saimoni (boi tauyana Isileli tubunao idi kaba lovina ana tokokoila),
16 Yemesa natuna Yudasa be Yudasa guma Keriota, tauyana bei ietonuwotulu.
17 Yeisu ivayokoidi ikavava, koya goi kidi taiyao sisou sima bútuma goi sitaoya. Amoko goi ina tovatotowanayao badabadaidi sikaaiyaka. Nakae boda gagaina Yerusalema goi nakae asa liliudi Yudiya ana madabokina goi sima sikaaiyaka. Aiyuwoina boda asa Taya be Saidoni négwasa kikina goi sima sikaaiyaka. 18 Madabokidi latuwodi Yeisu sitaiyakeke be idi katówana goi ikidedevinedi be nakae tomota naagovaidi ikidedevinedi. 19 Togaga Tauyana yaina goi isowóduwo, e tomota liliudi siboboina, tauna kidi boda madabokidi sipoikíkina Tauyana sibisikone.
Yeisu ina vatulúkwana:
Tomota adi dedevina be adi toovalugo manudi
Tomota adi dedevina be adi toovalugo manudi
(Madiu 5:1-12)
20 Yeisu ina tovatotowanayao ipotedi, idigo kana,
‘Avatauwa komi neta kotokai,
e komi Yaubada ina bodayauwo bei ikalibubumi,
tauna ami dedevina bogina koobabane.
21 Avatauwa komi neta ame tuta kookaloga,‡ Kookaloga: Ame ana yagoina aiyuwo. Tayamo moe tomota loga sikámasa unana geya avadimo. Aiyuwoina moe livalakaibala. Ana yagoina moe tomota latuwodi gagaina Yaubada siyagoi. Moe tupwana nakae balomaidi sikaloga.
e nava bei Yaubada ivakayaodeimi,
tauna ami dedevina bogina koobabane.
Avatauwa komi neta ame tuta kotaitáiya,
e nava bei kovanama,
tauna ami dedevina bogina koobabane.
22 Tutayana tomota sikaolilivemi be sitavileiyemi be sikaogoyoemi be yoimi sitagiwoidi imi numisa Tomalatomota yaina pasina, e komi ami dedevina bogina koobabane.† 1Pi 4:14. 23 Tutayana nakae siguuinuwe yaimi, mami uyáwana kolāusa. Moitamo. Konōve. Ami vaiwówana yábana goi bei gagaina. Tomotayadi tubudiyao nakae siguuinuwe Yaubada ina tokabivalavala yaidi goi go, tokabivalavalayadi adi vaiwówana dedevina sibabane.† 2Te 36:16; Gui 7:52. E komi nakae bei koobabane.
24 Go avatauwa komi neta toesaesa go,
imi esaesa konumise,
e imi uyáwana bogina kobabanevatae go,
niga bei geya.
Tauna ami toovalugo!
25 Komi ame tuta bogina maa konami liliudi,
nakae bogina yoiyami go, nava bei kokaloga.
Tauna ami toovalugo!
Komi ame tuta koovanama,
nava bei nuwomi imou be nakae kotáiya.
Tauna ami toovalugo.
26 Tutayana tomota liliudi sikaodedevinemi,
ami toovalugo.
Moitamo. Tomotayadi boi tubudiyao nakae.
Boi nimatu tauyadi tokabivalavala polapola
sikaodedevinedi go,
tokabivalavala polapolayadi liuna sibabane.
Tauna komi ami toovalugo.’
Yeisu ina vatulúkwana:
Ida kaleyayao adi matakoi manuna
Ida kaleyayao adi matakoi manuna
(Madiu 5:38-48)
27 Yeisu tuwaina kana,
‘Komi imi sinapu amo nakae geya, go komi sem ame alatuuwokoimi konōve: Imi kaleyayao komatakoiyēdi ame nakae: Avatauwa neta sikaolilivemi, yaidi goi guinuwa dedevidi koguuinuwēdi. 28 Avatauwa neta sikatubolatemi go, komi tuwo kokaipaakuyēdi. Avatauwa neta siyogedegedemi go, komi tuwo, manudi kokaawanōi Yaubada yaina. 29 Avatauwa neta padipadimi sikailavako, e taabu kokatuumapūdi, go sem padipadimi aiyuwoina nakae kotagōne sikailavako. Avatauwa neta ami tanigo sivasebukoimi, e taabu ami kwama kovakagagalekōidi. 30 Avatauwa neta sikawanoiyemi, e kovinīdi. Nakae avatauwa neta konami sivasebukoimi, e taabu kokuuliūye. 31 Nakonakae latuwomi bego tomota siguinuwe yaimi, e komi nakae tauyadi yaidi kogimiguinūwe.† Mad 7:12. 32 Go neta tomota simatakooiyemi go, tomotayadi aditava komatakooiyedi, kaga ana dedevina yaimi? Geya. Moe kidi toogoyoidi idi sinapu nakae. Toinidi sediyao aditava simatakooiyedi. 33 Neta tomota sivaaitemi go, tomotayadi aditava kovaaitedi, kaga ana dedevina yaimi goi? Geya. Moe kidi toogoyoidi idi sinapu nakae. Sediyao toogoyoidi aditava sivaaitedi. 34 Ava tomotava neta koyagoi imi mani neta sikatoguye bei sikaluvilemnei yaimi go, amo tauyadi aditava kotaagonedi imi mani sikatooguyedi, e moe kaga ana dedevina yaimi goi? Geya. Moe toogoyoidi idi sinapu nakae sediyao yaidi goi. Sediyao aditava sitaagonedi idi mani sikatooguyedi bego nava bei kidi nakae sibabane. 35 Go sem komi imi kaleyayao komatakoiyēdi be kovaitēdi be nakae kotagonēdi imi mani sikatoguyedi go, taabu konuuwonūwana itoboine bei sikatumapu. Neta nakae koguuinuwe, ami vaiwówana bei gagaina be nakae komi Tokanayatanatoina natunao unana tauyadi tokaipopóita be toogoyoidi iyabobonedi. Tauna neta imi sinapu nakae koguuinuwe, e komi imi sinapu bei Tokanayatanatoina nakae. 36 Konuwokapīsi, nakae Tamada inuwokapisi.’
Yeisu ina vatulúkwana:
Sedao adi takínona manuna
Sedao adi takínona manuna
(Madiu 7:1-6,16-20)
37 Yeisu tuwaina kana,
‘Taabu semiyao kovaayokōidi kidi toogoyoidi, e Yaubada nakae bei geya ivayokoimita komi toogoyoimi. Nakae taabu semiyao kotaakinōidi itoboinedi liuna sibabane, e Yaubada nakae, bei geya ilovineta komi toogoyoimi bei iliunemi. Tomota idi goyo konuwotaōidi, e komi imi goyo Yaubada bei inuwotaoidi. 38 Neta kokaiguyau, e Yaubada nakae bei ikaiguyau yaimi go, kina ina kaiguyauyana bei gagaina. Nakae neta maisi kutukutuna ivakakonedoko. Kutukutuyadi bayao goi isiwoi namliyeta baige bayaoyana itubuutubutu, nimana goi ivatutu bego bayaoyana ivakayaodei, e ilausiwosiwo. Tauna gagaina ivinimi. Moitamo. Nakonakae imi guinuwa tomota yaidi, e Yaubada nakae bei iguinuwe yaimi.’
39 E tayamo livalakaibala nakae Yeisu ilatuwokoidi idigo kana,
‘Manakae? Tokebo itoboine kebosiyana ivakede, gea geya? Geya ae? Govila bei adi taiyuwokova bobosiu goi isouyedi.† Mad 15:14. 40 Tovatotówana ina tovatulúkwana geya itobusaveyeta. Go tutayana tovatulukwanayana ina vatulúkwana ilukavave, tauyana be ina tovatulúkwana taiyao sivavasa.† Mad 10:24-25; Iyo 13:16, 15:20.
41 E manakae? Semiyao idi goyo giyaidi mosamosa giyaina nakae matadi goi koogitedi go, komi imi goyo gagaidi alovagabugabu nakae toinimi matami goi ikaaiyaka geya kogiteyeta ae? 42 Manakae komi semiyaoyadi kolatuwokoidi kami,
“Siyagu, kutagonēgu mosamosa giyaina matam goi akabi”?
Go alovagabugabuyana toinimi matami goi ikaaiyaka geya kogiteyeta! Komi todedevimi polapola! Mainao alovagabugabuyana matami goi kokābi bei itoboinemi kogita dókana namliyeta baige mosamosayana giyaina semiyao matadi goi kokabi. 43 Moitamo. Neta nakae koguuinuwe, komi bei alova dedevidi nakae. Geya tayaamo alova dedevina itoboine keuwoina goyogoyoina ikeuwoe. Alova goyogoyoina nakae; geya itoboineyeta keuwoina dedevina ikeuwoe. 44 Alova tamo tamo toinidi keuwoidi goi takinanedi.† Mad 12:33. Geya itoboinedeta goitagoita goi keukeu taguwe o taliboibo goi kilekile taguwe ae? 45 Kita tomota nakae. Tomota nuwodi goi idi esaesa sikanukulidi. Tuwo tomota dedevina ina esaesayadi dedevidi goi dogoi dedevidi ikaiwoduwedi. Ago tomota goyogoyoina ina esaesa goyogoyoidi goi dogoi goyogoyoidi ikaiwoduwedi. Moitamo. Kaga neta nuwoda ivakayaodei, e sopada nakae sivatoi.’† Mad 12:34-35.
Yeisu ina vatulúkwana:
Vada ana toyówana adi taiyuwo tetelidi
Vada ana toyówana adi taiyuwo tetelidi
(Madiu 7:24-27)
46 Tuwaina Yeisu kana,
‘E kaga unana kokatomoegu go, kaga nakae alatuuwokoimi geya koguinuwedita? 47 Avatauwa neta simekoigu be guna livalayadi sinovedi be nakae sisabokuliyedi, bei avatulukoimi tauyadi avatau nakae. 48 Kidi koroto tayamo nakae vada iyowoyowo. Mainao túmala goi ieli ana kadókana gurewa ibabane. Gurewayana yatana dako ikaudakodako. Ikavava, dakoyana yatana ina vada iyowo. E kúwana gagaina ikúwana, mluwa idau ina vadayana iláui go, geya itoboineyeta bei ikaubasi unana ana yówana dedevina.
49 Go avatauwa neta guna livala sitaiyakekedi go, geya sisabokuliyedita, e tauyadi koroto tayamo nakae neta poyapoya geya ana dakomo goi ina vada iyowo. Niga mluwa gagaina idau, vadayana iláui, e mainao isou. Ago vadayana ina bugoyo gagaina toina.’
†6:1 Atu 23:25.
†b6:4 Vin 24:9; 1Sa 21:1-6.
‡6:21 Kookaloga: Ame ana yagoina aiyuwo. Tayamo moe tomota loga sikámasa unana geya avadimo. Aiyuwoina moe livalakaibala. Ana yagoina moe tomota latuwodi gagaina Yaubada siyagoi. Moe tupwana nakae balomaidi sikaloga.
†6:40 Mad 10:24-25; Iyo 13:16, 15:20.