8
Yeisu tolepero ikideedevine tetelina
(Maki 1:40-45; Luke 5:12-16)
1 E Yeisu koya goi isou ima go, boda gagaina sisabokuliye. 2 Isou ima go, tolepero tayamo ima Yeisuyana matana goi aena ivaatugúyala idigo kana,
‘Tomoya, neta im nuwonúwana nakae, itoboinem kukidedevinegu bei sakavaigu imavada.’
3 Tuwo Yeisu nimana iyosale, toleperoyana ibisikone‡Toleperoyana ibisikone: Tolepero aditava sikaaiyaka bego sakavaidi ana vísiya geya itoboineyeta isaidámana ina ituli ta tomota goi. Aiyuwoina avatau neta tolepero ibisikone, tauyana ikabáila tapwaroro manuna. Tauna tutayana Yeisu toleperoyana ibisikone, ikabáila tapwaroro manuna. Moe pasina ame aba kainaopa tayamo. Yeisu geya inuwonuwoneta moe manuna. idigo kana,
‘Guna nuwonúwana nakae. Kumavāda!’
Tuwo mainao korotoyana sakavaina ina lepero ikavava, e sakavainayana imavada. 4 Ago Yeisu idigo kana,
‘Kunōve. Am kimavadayana manuna geya vatau tayaamo kulaatuwōko, go sem kūna Tonúwala yaina goi kuvagitakōim, igitem bei ivayokoim kom bogina kumavada. Ikavava, im vininabeso yoguyogu kukasāle Yaubada yaina ada lovina boi Mosese iivinida tolepero adi kimavada manuna nakae. Moe aba kinana tomota yaidi sakavaim bogina imavada, e bei siuyaonemneim.’†Vin 14:1-32.
Yeisu tovayaviya adi tovakumgo
ina pákwana ikideedevine tetelina
ina pákwana ikideedevine tetelina
(Luke 7:1-10)
5 E Yeisu ina Kapaneumi goi isiu go, da Roma idi tovayaviyayao adi tovakumgo tayamo ima Yeisu yaina ikawanoi makimaki 6 idigo kana,
‘Tomoya, guna pákwana pempemna mana gedageda gagaina guna vada goi iimasisi.’
7 Tuwo Yeisu idigo kana,
‘Manakae? Bego yau ao akidedevine?’
8 Ago kina tovakumgoyana idigo kana,
‘Geya, Tomoya. Yau toosobugu; geya itoboineguta bego guna vada goi kusiu, go sem kom mam lovina kubobwarāmo, bei guna pakonayana iboboina. 9 Yau nakae lovina ayagoi. Yau magu tolovinao be nakae tovayaviya maniyedi sobuyekoigu. Neta tayamo alatuwoko kagu, “Kūna!” bei ina. Neta tayamo alatuwoko kagu, “Kūma!” bei ima. Neta guna pákwana tayamo alatuwoko kagu, “Ame kuguinūwe!” bei iguinuwe.’
10 E ina livalayana Yeisu inove, ikainaopa. Tuwo tauyadi sisabookuliye ilatuwokoidi idigo kana,
‘Iyaa! Ame tauyana moitamo! Ame alatuuwokoimi konōve: Isileli tubunao yaidi goi geya vatau tayaamo ababane ina numisa gagaina ame Totuyoyowoyana nakae. 11 E ame alatuuwokoimi konōve: Totuyoyowo badabadaidi poyapoya ana madabokina goi, bomatu be koiboga goi, bei sima Yaubada ina kaba kalibúbuna goi sisiu sikaaiyaka go, Eberamo, Aisake be Yakobo taiyao situsobu áika manuna.†Luk 13:29. 12 Ego komi Diyuu bego Yaubada ina kinavayao ina kalibúbuna goi geya imi numisamo, tauna bei ilavemi kona moetala mamaníwana goi kokaaiyaka. Amoko goi bei kotaiya vata, nakae salami kokakaavatedi komatamaimaita.’†Mad 22:13, 25:30; Luk 13:28.
13 Go Yeisu ibóbwara ikavava, tovakumgoyana ilatuwoko, idigo kana,
‘Kwaluvīla kūna im kasa. Im numisa pasina im pákwana bogina iboboina.’
Tuwo moitamo, tuta amo goi tauyana iboboina.
Yeisu Pita yaona be tomota liliudi
ikidedeevinedi tetelina
ikidedeevinedi tetelina
(Maki 1:29-34; Luke 4:38-41)
14 Yeisu itaoya ina Pita ina vada goi isiu, ikandobala Pitayana yaona (moe monena sinana) igite manaa katówana kebana goi iimasisi. 15 Tuwo ibala ina vavinayana nimana ibisikone, e ina katowanayana ikalave. Ikavava, vavinayana itaoya ina Yeisu avana ivaidede.
16 E asa bogina lavilavi, toni kasa sediyao naagovaidi badabadaidi simedi Yeisu yaina. Tuwo Yeisu ibobwaramo, e dimoni sisiya. Nakae tokatówana liliudi simemedi ikidedevinedi. 17 Tauna ina guinuwayadi goi Yaubada ina tokabivalavala Aiseya ina livala imalatomotamna nakae boi idigedige kana,
‘Tauyana ida katówana ikabidi, ikalavedi,
nakae ida vísiya goi italigeida.’
Aiseya 53:4
Yeisu ana sabokuli ana moumou tetelina
(Luke 9:57-62)
18 E Yeisu boda igitedi sitaooyakobu, tuwo ina tosabokuliyao ilovinaedi idigo kana,
‘Tasowōya, Galili Bwaena tatadamāne tāna ta dadava.’
19 Bogina bego sisowoya go, Yaubada ina Katukeda ana tovatulúkwana tayamo ima Yeisu yaina idigo kana,
‘Tovatulúkwana, neta ava kasa goi kunonoina, bei asabokuuliyem.’
20 Ago kina Yeisu idigo kana,
‘Weiniya woliwoli‡Weiniya woliwoli: Dimdim kadi, ‘Fox.’ Ame weiniya giyaina maisiyana go, ina vada moe poyapoya sinaena bobosiu goi. madi bobosiu, mánuwo madi vátala go, Tomalatomota geya ana kaba masisimo. Tauna neta kusabokuuliyegu, e kom bei yau nakae.’
21 E Yeisu ina tovatotówana aiyuwoina idigo kana,
‘Tomoya, kutagonēgu mainao ana tamagu amatakavate ana kadókana ikámasa avaliwoge baige ama asabokuliyem.’
22 E kina go Yeisu idigo kana,
‘Kūma kusabokuliyēgu go, tokámasa kwalavēdi bei toinidi idi tokamasayao sivaliiwogedi.’
Yeisu yágira be aivaya iloviinaedi tetelina
(Maki 4:35-41; Luke 8:22-25)
23 Yeisu oga goi isowoya go, ina tovatotowanayao sisabookuliye, e nakae sisowoya bego Galili Bwaena sitadamane. 24 Sisowoya ikavava, sikailova sinonoina go, yágira gagaina ikalisou Bwaeyana goi itowo. Tuwo aivaya siseulalágata, e ogayana giyakainava sivakayaaodei. E kina go Yeisu imasisi ikanaamatáiya. 25 Ago ina tovatotowanayao sima siwoini sidigo kadi,
‘Tomooya, kutāoya kuyavēda! Giyakainava bei tavailai!’
26 Go kina ibowoidi idigo kana,
‘Kaga komatoitae? Komi geya konumisedokoiguta!’
E tuwo itaoya, e yágira be aivaya ilovinaedi sisayata. Sisayata, e yagirayana ilakapuwe nakae Bwaeyana ikadaúmwara gagaina. 27 E kidi go korotoyadi sikainaopa kadi,
‘Iyaa! Ame ava koroto? Yágira be aivaya niyana sikabiikaone?’
Yeisu dimoni ivataapiyedi tetelina
(Maki 5:1-20; Luke 8:26-39)
28 Yeisu kidi bogina sima da Gadara‡Gadara: Buki maniyedi kadi, ‘Gerasine.’ Da Gadara moe Totuyoyowo (Mak 5:1). idi kaolao goi sivaiu. E sisou go, koroto adi taiyuwo naagovaidi valiwoga tukubu goi sisowóduwo sima Yeisu sivalobode. Korotoyadi aba silali toina, tauna geya vatau tayaamo itoboine bei amo enaoyana goi iiketoiya. E korotoyadi sima Yeisu sivalobode. 29 Sivalobode, e Yeisu yaina sipodeda sidigo kadi,
‘Kom Yaubada Natuna, kwalavēma! Kai ima polava moe geya kom im polava geya. Manakae? Lovina ana lava nava go, kom kuma bego kuyogedegedema ae?’
30 Ego bao badabadaidi sikaaiyaka tupwana yomana goi sidumdumla. 31 E kidi go dimoniyadi sikandobala bao sigitedi, tuwo sikawanoi makimaki Yeisu yaina sidigo kadi,
‘Neta kuvatapiyema, e kuetunēma kāna bao amo sinaedi goi kasiu.’
32 Tuwo Yeisu idigo kana,
‘Kosowōduwo kōna!’
E dimoniyadi sitaoya, korotoyadi sikalavedi sina bao sinaedi goi sisiu. Go baoyadi matabuwodi madabokidi sisaloku, silokoina sina koya tagatagagina goi sipela sisou Galili Bwaena goi sisalili. 33 E kidi go baoyadi adi tomatakavatayao sisiya sina asa goi, e kaga liliuna sigite sitalavaite. Nakae kaga siisowóduwo boi korotoyadi naagovaidi yaidi goi nakae sitalavaitedi. 34 Tuwo toni kasayadi madabokiidi sima; latuwodi Yeisu sivalobode go, tutayana sigite, sikawanoi makimaki kadi,
‘Ima kasa kwalāve!’
‡8:3 Toleperoyana ibisikone: Tolepero aditava sikaaiyaka bego sakavaidi ana vísiya geya itoboineyeta isaidámana ina ituli ta tomota goi. Aiyuwoina avatau neta tolepero ibisikone, tauyana ikabáila tapwaroro manuna. Tauna tutayana Yeisu toleperoyana ibisikone, ikabáila tapwaroro manuna. Moe pasina ame aba kainaopa tayamo. Yeisu geya inuwonuwoneta moe manuna.
†8:4 Vin 14:1-32.
†8:12 Mad 22:13, 25:30; Luk 13:28.
‡8:20 Weiniya woliwoli: Dimdim kadi, ‘Fox.’ Ame weiniya giyaina maisiyana go, ina vada moe poyapoya sinaena bobosiu goi.
‡8:28 Gadara: Buki maniyedi kadi, ‘Gerasine.’ Da Gadara moe Totuyoyowo (Mak 5:1).