22
Livalakaibala nai aikanina manuna
(Luke 14:15-24)
1 Kina Yeisu aiyuwoina ilivalakaibalamna Tonúwala Gagaidi be tomoyamoya yaidi idigo kana,
2 ‘Yaubada ina kalibúbuna moe tétala ame nakae:
Tokalibúbuna tayamo ikaaiyaka, natuna koroto bego inai, tauna ina naiyana aikanina iguinuwe. 3 Tomota maniyedi boi mainao bogina ilatuwokoidi aikayana manuna bego sima. Niga tutayana bogina ikatubayasi ina pakonayao ietunedi sina tomotayadi siduduwedi sima aikayana manuna. Sina tomotayadi silatuwokoidi go, kidi odi ikai. 4 Aiyuwoina ina pakonayao maniyedi ietunedi sina go, mainao ilatuwokoidi kana,
“Kōna tauyadi boi akawanooiyedi kolatuwokōidi kami, ‘Konōve! Tomoya ana káika bogina iguinuwe, nakae bulumakau be nakae bulumakau bonatudi bobíbina ikaumatedi ivaipoludi. Kaga liliuna bogina ikatubayasi, tauna kōma kokāika.’ ”
5 E moitamo sina tomotayadi silatuwokoidi go, sikawoilova geya sinoita, go sem tayamo ina ina tánuwo goi, tayamo ina ina bisinis goi. 6 E tomota maniyedi nava sikaaiyaka ina pakonayaoyadi siyoisidi sigieomaemaedi baige sikaumatedi. 7 E kina go tokalibubunayana inove bego ina pakonayao sikaumatedi, tuwo gamona igoyo toina, e ina tovayaviyayao ietunedi sina amo tokaumatayadi sikaumatedi be nakae idi kasa sigabu.
8 E tuwo tokalibúbuna ina pakonayaoyadi ilatuwokoidi idigo kana,
“Aikayana bogina akatubayasi go, tauyadi boi mainao bogina aduuduwedi geya itoboinedita sima unana sikatae. 9 Tauna komi kōna asa sinaena goi kovanibinībita. Avatauwa neta kobabanedi, koduduwēdi sima sikáika.”
10 Tuwo moitamo amo pakonidiyadi sitáoya sina asa sinaena goi sivanibiníbita. Neta toogoyoidi o todedevidi sibabanedi, liliudikova sitaligogoidi sima, e aikayana ana vada sivakayaodei.
11 E tokalibubunayana ima vada goi isiu bego ogaoga igitedi go, koroto tayamo igite nai ana kwama geya ilosiyeta. 12 Tuwo ilatuwoko idigo kana,
“Naveya, kom nai ana kwama geya kulosiyeta go, to kusiu kuma ae?”
Go korotoyana itugau; geya itoboineyeta ikatumapu. 13 E tuwo kina go tokalibubunayana ina tovaitayao ilatuwokoidi idigo kana,
“Kōma ame tauyana koyōisi, aena be nimana koyowōidi. Ikavava, kokābi kolāve ina moetala mamaníwana goi ikaaiyaka. Amoko goi tomota bei sitaiya vata be nakae saladi sikakaavatedi simatamaimaita.”†Mad 8:12, 25:30; Luk 13:28.
14 E tauna tomota madabokidi Yaubada iduduwedi go, maniyedi taudi kiinavaidi.’
Lumadádana Sisa ina takisi manuna
(Maki 12:13-17; Luke 20:20-26)
15 E tuwo kidi Parisiyadi sina silosinapu manakaedi bei Yeisu ina livala goi sikatutao. 16 Tuwo tauyadi idi tovatotowanayao be nakae Erodi ina bodao‡Erodi ina bodao: Ame tauyadi Diyuu go, latuwodi Erodi ilovina. Tauna Erodiyana sivaite bego lovinayana ikabi. sietunedi sima Yeisu yaina sidigo kadi,
‘Tovatulúkwana, bogina kayagoim bego kom moitamo be nakae Yaubada ina kenao kuvatulukwana dókana. Kom tomota geya kutagonedita nuwom sikobale. Moitamo. Tomota kuwowooinedi geya adi kaigigita goi geya; nakae madabokidi sivavasa yaim. 17 Tauna kom im nuwonúwana takisi manuna kulatuwokōima. Manakae? Itoboine kita tatakisi Sisa yaina gea geya?’
18 Go kina Yeisu idi nuwonúwana goyogoyoina bogina iiyagoi, tauna idigo kana,
‘Komi todedevimi polapola, manakae bego kokatutaoigu? 19 Takisiyana manina tayamo kovatulukōigu.’
E tuwo tauyadi sina mani tayamo sikabi sime Yeisu sivini. 20 Tuwo maniyana ikabi, idigo kana,
‘Mani ame goi avatau makayauna be nakae yoina?’
21 ‘Sisa!’ Tauyadi kaedi.
Tuwo Yeisu idigo kana,
‘Moe moitamo. Tauna kaga neta Sisa konana, e Sisayana tavīni go, kaga neta Yaubada konana, e Yaubadayana tavīni.’
22 Tuwo tauyadi ina livala sinove, sikainaopa. Geya itoboinedita sikatutao, tuwo sitáoya, Yeisu sikalave sina.
Tokámasa idi taoyamna manuna
(Maki 12:18-27; Luke 20:27-40)
23 Amo maliyalinayana goi Sadusi maniyedi sima Yeisu yaina. Tauyadi sidigodigo tokámasa geya sitaoyamneta.†Gui 23:8. E sima bego Yeisu sikatutao sidigo kadi,
24 ‘Tovatulúkwana, boi nimatu Mosese idigo kana,
“Koroto nainaina neta geya natunamo go, ikámasa, e aena vavilaina itoboine kobuina inai. Niga neta vavinayana ivenátuna, natunao moe tokámasa ana katumapu.”
Atukeda 25:5-6
25 E tayamo aba gita ame nakae:
Koroto adi badabada adi tainima adi taiyuwo sinadi tayamo boi yaima goi sikaaiyaka. Botomoya igiminai go, geya natunamo ikámasa. Tuwo aena vavilaina itáoya tuwowona kobuina ikabi inai. 26 Go geya natunamo ikámasa. Tauna nakae korotoyadi senao tamo tamo. Kobuyayana sinai go, geya natudimo tamo tamo sikámasa. 27 E korotoyadi liliudikova sikamasa kówasa, namliyeta baige vavinayana nakae ikámasa.
28 Tauna neta moitamo tomota ámasa goi sitaoyamna, e amo tutayana goi korotoyadi adi tainima adi taiyuwo yaidi ava koroto moe vavina monena mooitamoina? Bogina koyagoi. Korotoyadi boi mainao nava maa yawoidi go, vavinayana liliudi sinai.’
29 Go kina Yeisuyana idigo kana,
‘Ke, moe komi imi bágala unana Gínina Kimaasabaina geya koyagoiyeta be nakae Yaubada ina togaga taoyamna manuna geya koyagoiyeta. 30 Moitamo. Taoyamna ana tuta goi koroto be vevina nai geya, go sem idi kaiyaka anerose yábana goi nakae; tauyadi nai geya. 31 Ego tokámasa idi taoyamna manuna, Yaubada ina Gínina Kimaasabaina goi bogina ilatuwokoimi go, manakae? Geya kokatuyaiviyeta ae? Manakae kobagabágala? Tauyana idigo kana,
32 “Yau tubumowo Eberamo, Aisake be Yakobo idi Yaubada.”†Gui 3:13, 7:32.
Tateta 3:6
Yaubada kina geya kada tokámasa idi Yaubada geya, go sem tauyadi maa yawoidi idi Yaubada. Moeko goi taayagoi bego tokámasa sitaoyamna.’
33 Tuwo boda sikaaiyaka Yeisu sinove, ina vatulúkwana pasina nukotodi siwowówana gagaina.
Lovina gagaina Yaubada ina Katukeda goi
(Maki 12:28-34; Luke 10:25-28)
34 E kidi go Parisi livala sinove bego Yeisu Sadusi ikausagugudi, situgúguna silosinapu manakaedi bei Yeisu sikatutao. Silosinapu ikavava, sima Tauyana yaina. 35 Sima go, Yaubada ina Katukeda ana tolumavívita tayamo yaidi goi ibala ima Yeisu yaina; latuwona bego ikatutao. Tuwo ilumadade idigo kana,
36 ‘Tovatulúkwana, ava lovina Yaubada ina Katukeda goi lovina gagaina?’
37 E Yeisu kana,
‘Gínina Kimaasabaina idigo kana,
“Yauwe ida Yaubada komataakoīye atemi madabokinakova goi be yawoimi madabokinakova goi be nuwomi madabokinakova goi.”
Atukeda 6:5
38 Ame lovinayana moe lovina gagaina, nakae lovina liliudi ivakumgoiyedi. 39 E lovina aiyuwoina ikaaiyaka moe lovinayana vakuumgoina nakae. Lovinayana ame nakae kana,
“Siyami komataakoīye nakae toinimi komatakooiyemi.”†Mad 5:43, 19:19; Rom 13:9; Gal 5:14; Ibe 13:1; Yem 2:8.
Vininabeso 19:18
40 Yaubada ina Katukeda madabokina be nakae tokabivalavala idi gínina madabokidi unadi moe ame lovinayadi aiyuwo.’
Guyau moe Devida tubuna be nakae ina Tomoya
(Maki 12:35-37; Luke 20:41-44)
41 E Parisiyadi nava sikaaiyaka go, Yeisu ilumadadedi 42 idigo kana,
‘Komi manakaemi konuwonúwana Guyau manuna? Tauyana avatau tubuna?’
‘Devida tubuna’, kidi kaedi.
43 Go kina Yeisu kana,
‘Neta moe moitamo, kaga unana kina Devida Guyau ikatomoyae? Boi nimatu Baloma Kimaasabaina Devida nukotona isanayato, tuwo idigo kana,
44 “Yauwe ibóbwara guna Tomoya ilatuwoko kana,
‘Kūma wowoina basekoina kakataigu goi kutusōbu
ana kadókana im kaleyayao avasobusoobuyedi
kulovinaedi.’ ”†Gui 2:34-35; Ibe 1:13.
Same 110:1
45 Tauna Devida igimibíbina namliyeta Guyau go, Devidayana Guyau ikatoomoyae ae? Tauna tayagoi Guyauyana moe Devida tubuna go, tuwaina, Tauyana Tomoya, e Devida itobusave!’
46 Ago geya tayamo Parisi itoboine Yeisu ina lumadádana ikatumapu. Aiyuwoina amo tutayana mlina goi geya vatau tayaamo tuwaina mana katepatu bego Yeisu ilumadade.