Yeisu inonoina Yerusalema goi tetelina
19
(Madiu 19:1—25:46)
Yeisu ina vatulúkwana vaisobu manuna
(Maki 10:1-12)
1 Tutayana Yeisu ina bóbwara ilukavavedi, itaoya kai taiyao Galili kakalave go, kana sákala Iyoridani goi kasaidámana kana bomatu dadavina, e kanonoina Yudiya ana dadava manuna.‡Nakona ana yagoina ame nakae: Yeisu ina Iyoridani bomatu dadavina goi iketoiya. Niga isaidámana ina Yudiya ana dadava. 2 Go boda gagaina sima Tauyana sisabokuliye. Amoko goi idi tokatowanayao ikidedevinedi.
3 Ago Parisi maniyedi sima bego Yeisu sikatutao, sidigo kadi,
‘Manakae? Ida lovina goi neta koroto tayamo nakonakae latuwona, mana tagona monena ivaisobuyebeso gea geya?’
4 Go kina Yeisu idigo kana,
‘Iyaa! Ana kaigigita nakona ida buki goi geya kokatuyaiviyeta bego tuta ana kaba vatowo goi tomolúluwo tomota iwodugudi, kana,
“Tomotayadi koroto be vavina iwodugudi.”
Aba Vatowo 1:27, 5:2
5 Moe pasina Yaubada idigo kana,
“E tauna moe pasina koroto tamana be sinana yaidi itumasaba go, monena taiyao situyuwo, tauna adi taiyuwokova wowodi tayamo.”†1Ko 6:16; Epe 5:31.
Aba Vatowo 2:24
6 Tauna geya tuwaina kada tauyadi tomota adi taiyuwo, go sem ame tuta tauyadi wowodi tayamo. Tauna avatauwa neta Yaubada nai goi ivatuyuwedi, e tomota taabu sivatumaasabēdi.’
7 Go kidi Parisiyadi sidigo kadi,
‘Go kaga unana tauna Mosese lovina tayamo tubudao ivinidi bego koroto tayamo neta latuwona monena ivaisobuye, e ana katae igini. Ikavava, monenayana ivini, ivaisobuye?’†Atu 24:1-4; Mad 5:31.
8 Go kina Yeisu idigo kana,
‘Imi dabakasa pasina Mosese itagonemi monemiyao kovaisobuyedi. Go boi nimatu tuta ana kaba vatowo goi, e moe nakae geya. 9 E ame alatuuwokoimi konōve: Ava koroto neta monena geya iroerateta go, ivaisobuyebeso bego inaidámana ituli ta vavina yaina, e bogina iroerata.’†Mal 2:14-15; Mad 5:32; Luk 16:18; 1Ko 7:10.
10 Go kai tovatotówana kadigo kama,
‘Tomoya, neta nai ana lovina nakae, e itoboine koroto vavina bei taabu sinaināi.’
11 Go Yeisu kana,
‘Moe nuwonuwanayana nai manuna tomota liliudi geya itoboinedita siuyaone bei siguinuwe, go sem avatauwa neta Yaubada ina togaga ivinidi, e tauyadi aditava itoboinedi nuwonuwanayana siuyaone bei siguinuwe. 12 Koroto maniyedi adi bíbina kunu goi geya kutukutudimo, tauna nai odi ikai.‡aNai odi ikai: Koroto neta ibíbina go, powona sigoyo, tauna geya inuuwonúwana vevina be masisi manudi. Moeko goi geya latuwodi vevina taiyao sinai. Amo tutayana amo korotoyadi siduduwedi yunika (Gui 8:27). Aiyuwoina koroto maniyedi kutukutudi tomota sikabidi,‡bKutukutudi tomota sikabidi: Boi nimatu neta koroto tamo bei ipaisewa tolovina monenao yaidi goi, e korotoyana powona ibobóidi. Moeko goi geya tuwaina inuwonúwana vevina o masisi manudi. Amo tauyana nakae bei nai ona ikai. Amo tutayana koroto amo nakae siduduwe yunika (Gui 8:27). tauna nai odi ikai. Ago koroto maniyedi latuwodi bego Yaubada ina kalibúbuna manuna sipaisewa, tauna toinidi nai sitoto. Avatauwa itobooinedi, e ame livalayana siuyaōne bei siguinuwe.’
Yeisu gogómana ikaipaakuyedi tetelina
(Maki 10:13-16; Luke 18:15-17)
13 E tuwo tomota maniyedi natudiyao giyaidi simedi Yeisu yaina goi bego dabadi iyoisidi be manudi ikawanoi Yaubada yaina. E kai go ina tovatotowanayao kataoya tomotayadi kabowoidi kama,
‘Taabu kononōina Yeisu yaina.’
14 Go kina Yeisu kana,
‘Gogomanayadi taabu kosanaabodēdi, go sem kotagonēdi sima yaigu. Tomota nuwotookaidi ame tauyadi nakae Yaubada ina kalibúbuna sinaena goi bei sisiu.’
15 Tuwo gogomanayadi dabadi iyoisidi ikawanoi Yaubada yaina bego ikaipakuyedi. Ikavava, itaoya ikabima amo dadavayana kakalave kana.
Tubuwau toesaesa ina lumadádana
yawoina vata manuna
yawoina vata manuna
(Maki 10:17-31; Luke 18:18-30)
16 Kai kaaketoiya go, koroto tayamo ima Yeisu yaina goi idigo kana,
‘Tovatulúkwana, ava guinuwa dedevina aguuinuwe bei yawoigu vata ababane?’
17 ‘Kaga unana kulumadadegu kaga dedevina manuna? Todedevina anetava. Go neta latuwom yawoim vata kubabane, e Tauyana ina lovina kukabikaonēdi’, Yeisu kaena.
18 Tuwo korotoyana idigo kana,
‘Ava lovinava?’
E kina Yeisu idigo kana,
‘Ame lovinayadi Yaubada ilatuwokoida takabikaonedi, kana,
“Taabu kokaaumāta. Taabu korooerāta. Taabu kovaaināwana. Taabu kotalavaita polapōla. 19 Tamamiyao be sinamiyao kowowooinēdi.”†aMad 15:4; Mak 7:10; Epe 6:2.
Tateta 20:12-16; Atukeda 5:16-20
Aiyuwoina kana,
“Siyami komataakoīye nakae toinimi komatakooiyemi.” ’†bVin 19:18; Mad 5:43, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8.
Vininabeso 19:18
20 Tuwo tubuwauyana idigo kana,
‘Moe lovinayadi madabokiidi bogina akabikaaonedi go, kaga nava akiseyeseye?’
21 Yeisuyana idigo kana,
‘Neta latuwom Yaubada matana goi kumatuwo, e kūna konam liliudi kwaigimonēdi go, maisadi kwabīdi, kūna tookaidi yaidi goi kwaiguyauyēdi, e yábana goi bei kom mam esaesa. Kwaiguyauyedi ikavava, kūma kusabokuuliyēgu.’
22 E kina tubuwauyana Yeisu ina livala inove, mana nuuwomou ina. Bogina kuyagoi. Tauyana konana badabadaidi go, nukotona iyoi.
23 E kina go Yeisu kai ina tovatotowanayao ilatuwokoima idigo kana,
‘U, amo tauyana nuwona imou go, ame alatuuwokoimi konōve: Kidi toesaesa idi siu Yaubada ina kalibúbuna goi moumou isaki. 24 E aiyuwoina ame alatuuwokoimi konōve: Kameri yoguyogu gagaina, tauna geya itoboineyeta siláluma taporaina goi isiu ae? Ago toesaesa nakae. Bego Yaubada ina kalibúbuna sinaena goi toinidi sisiu go, geya itoboinedita, geya toina.’
25 E Yeisu ina livalayadi kanovedi, pasidi nukotoma siwówana gagaina toina, tauna kadigo kama,
‘Iyaa! Neta toesaesa geya itoboinedita yábana goi sisiu, avatau itoboine ana yava ibabane?’‡Kidi Diyuu sinuwonúwana esaesa moe aba kinana bego Yaubada toesaesa iuyaone. Tauna esaesayana moe Yaubada ina yabobona tauyana yaina. Tuwo avatauwa neta Yaubada iyabobonedi, e nakae bei iyavedi. Neta toesaesa geya itoboinedita sisiu, geya vatau tayamo nakona itoboine isiu. Moe pasina Yeisu ina tovatotowanayao nuwodi siwówana.
26 E Yeisu iipotema go, idigo kana,
‘Tomota yaidi goi moe geya itoboineyeta, go sem Yaubada yaina goi kaga liliuna sikakapu.’
27 E tuwo kina Pita idigo kana,
‘Go kai bei manakaema? Kai kaga liliuna yaima bogina kakalavedi go, kama kasabokuuliyem, tauna kai bei kaga kababane?’
28 E kina go Yeisuyana idigo kana,
‘Moitamo konami liliudi bogina kokalavedi go, ame alatuuwokoimi konōve: Nava bei Yaubada kaga liliuna iyolimedi. Amo tutayana Tomalatomota kebana esaaesaina aba taimámina goi bei itusobu ina bodayauwo ikalibubudi.†aMad 25:31. Ago komi nakae kébana esaaesaidi yawou aiyuwo goi bei kotusobu, Isileli tubunao adi dala yawou aiyuwo bei kokalibubudi.†bLuk 22:30. 29 Ago avatau neta ina vada o senao o niunao o tamanao o sinanao o natunao o ina kaba lovina ikalavedi yau yoigu pasina, e ana katumapu ivakaigaga toina bei ibabane be nakae yawoina vata bei ibabane. 30 E badabadaidi ame tuta toolagaidi go, nava bei tauyadi toosobudi. Badabadaidi ame tuta toosobudi go, nava bei tauyadi toolagaidi.’†Mad 20:16; Luk 13:30.
‡19:1 Nakona ana yagoina ame nakae: Yeisu ina Iyoridani bomatu dadavina goi iketoiya. Niga isaidámana ina Yudiya ana dadava.
†19:9 Mal 2:14-15; Mad 5:32; Luk 16:18; 1Ko 7:10.
‡a19:12 Nai odi ikai: Koroto neta ibíbina go, powona sigoyo, tauna geya inuuwonúwana vevina be masisi manudi. Moeko goi geya latuwodi vevina taiyao sinai. Amo tutayana amo korotoyadi siduduwedi yunika (Gui 8:27).
‡b19:12 Kutukutudi tomota sikabidi: Boi nimatu neta koroto tamo bei ipaisewa tolovina monenao yaidi goi, e korotoyana powona ibobóidi. Moeko goi geya tuwaina inuwonúwana vevina o masisi manudi. Amo tauyana nakae bei nai ona ikai. Amo tutayana koroto amo nakae siduduwe yunika (Gui 8:27).
†a19:19 Mad 15:4; Mak 7:10; Epe 6:2.
†b19:19 Vin 19:18; Mad 5:43, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8.
‡19:25 Kidi Diyuu sinuwonúwana esaesa moe aba kinana bego Yaubada toesaesa iuyaone. Tauna esaesayana moe Yaubada ina yabobona tauyana yaina. Tuwo avatauwa neta Yaubada iyabobonedi, e nakae bei iyavedi. Neta toesaesa geya itoboinedita sisiu, geya vatau tayamo nakona itoboine isiu. Moe pasina Yeisu ina tovatotowanayao nuwodi siwówana.