21
Yeisu tokalibúbuna nakae
Yerusalema goi isiusiu tetelina
Yerusalema goi isiusiu tetelina
(Maki 11:1-11; Luke 19:28-38; Iyoni 12:12-19)
1 E tutayana bogina kama Yerusalema goi kavakakana, e kama asa Betapegi Oribe Koyaina papanaina goi. Go kai Yeisu ina tovatotowanayao yaima goi adi taiyuwo ivamoleyedi sina asa goi. 2 Go mainao ilatuwokoidi idigo kana,
‘Kōna asa amo matada goi kosīu go, mainao ase bovavina ma boonatuna siikonidi bei kobabanedi. Aseyana ma bonatuna kotaligēidi komēdi yau yaigu. 3 Avatau neta ilumadademi, komi kodīgo kami,
“Tomoya latuwona iepaisewedi.”
E mainao bei ietunedi sima.’
E moitamo adi taiyuwokova sina.
4 E ame dogoiyana isowóduwo bego Yaubada ina tokabivalavala ina talavaita bei imalatomotamna. Tokabivalavalayana idigo kana,
“Gwa! Im Tokalibúbuna ma sakuululuna
ase yatana iitulaga;
aseyana moe ase bonatuna.
Go im Tokalibubunayana iimekoim.” ’
Sakarayau 9:9
6 E adi taiyuwokova sina siguinuwe nakae Yeisu bogina ilatuwokoidi. 7 Sina aseyana ma boonatuna sikabidi simedi go, adi tanigo sivalilividi aseyadi toludi goi sisekulidi. Ikavava, Yeisu ase bonatunayana goi itulaga. 8 E kidi go boda gagaina sima adi tanigo sivalilividi enao goi sieveidi go, maniyedi sina alova gigidi siutudi simedi enao goi sieveidi. 9 E kidi go bodayadi sima Yeisu sivaakitau, maniyedi matana goi, maniyedi mlina goi. Sivaakitau go, siiduduwo kadi,
‘Devida tubuna takilagāsi!
Tauyana Yauwe yoina goi imamaima kaaipakuna!† Mad 23:39; Luk 13:35.
Takilagāsi ituko toina!’
Same 118:25-26
10 Yeisu ima Yerusalema goi isiu, e asa madabokina itátava go, boda sidigo kadi,
‘Amo Tauyana vatau?’
11 E kidi go bodayadi kadi,
‘Amo Yeisu; Tauyana tokabivalavala tayamo guma Nasareta Galili sinaena.’
Yeisu tokaigimona Vada Kimaasabaina goi
ivataapiyedi tetelina
ivataapiyedi tetelina
(Maki 11:15-19; Luke 19:45-48; Iyoni 2:13-17)
12 Yeisu ina Vada Kimaasabaina ina kali goi isiu tokaigimona be togimona madabokidi ivatapiyedi sisiya. Ago mani ana totalamapuyao idi teboro be bunabuna adi tokaigimonayao idi kaba tusobu nakae ikausepaledi. 13 Ikavava, ilatuwokoidi idigo kana,
‘Gínina Kimaasabaina Yaubada manuna italavaita, idigo kana,
“Guna vada moe vada aba kawanoi.”
Aiseya 56:7
Go komi koyatako tovaináwana idi kaba tamumu.’† Yer 7:11.
14 Ibóbwara ikavava, tokebo be topem maniyedi sima Vada Kimaasabaina ana kali goi, e Yeisu ikidedevinedi. 15 E kidi Tonúwala Gagaidi be Yaubada ina Katukeda ana tovatulukwanayao maniyedi sikaaiyaka Yeisu aba kainaopa iguuinuwedi sigitedi. Nakae gogómana Vada Kimaasabaina ana kali goi idi duduwo sinovedi kadi,
‘Devida Tubuna takilagāsi!’
Tuwo gamodi igoyo, 16 Yeisu silatuwoko, sidigo kadi,
‘Amo tauyadi kunovedi kaga sidigedige manum gea geya? Kusanabodēdi!’
E kina go Yeisuyana idigo kana,
‘U, bogina anovedi! Go manakae? Ame tomwanayana manugu bogina konuwoilave ae? Tomwanayana kana,
“Kom gogómana giyaidi be nakae memeya
bogina kuvatulukoidi siyapaliyem.” ’
Same 8:2
17 Yeisu ibóbwara ikavava, ikalavedi go, kai ina tovatotowanayao taiyao asayana goi kasowóduwo kana asa Betani goi kamasisi.
Yeisu keukeu ikatuubolate tetelina
(Maki 11:12-14,20-24)
18 E vanuwo itomo, kaluwoboi kakaluvilamna kana Yerusalema go, kanonoina Yeisu loga ikámasa. 19 Tuwo ikandobala enao kikina goi keukeu tayamo igite, ibala ina ikandolaga go, geya ikeuwoita, go sem vaga kaka sikaaiyaka. Tuwo ikatubolate idigo kana,
‘Geya tuwaina bei kukeuwōmna, ame tuta be nakae tuta simamaima!’
Tuwo mainao alovayana ivadiwówana. 20 Go ina vadiwowanayana kai ina tovatotowanayao kagite, nuwoma iwówana kama,
‘Iyaa! Keukeuyana manakae mainao ivadiwówana?’
21 E kina Yeisuyana idigo kana,
‘U, nakae isowóduwo go, ame alatuuwokoimi konōve: Neta mami numisa go, geya konanayuwoita, e kaga bogina aguinuwe keukeuyana yaina goi, itoboinemi nakae koguinuwe. Go tuwaina bei itoboinemi koya ame kolatuwoko kami,
“Yaubada ikabim ilavem kusōu négwasa goi.”
E nakae bei isowóduwo.† Mad 17:20; Luk 17:6; 1Ko 13:2; Yem 1:6. 22 Tuwo kaga liliuna kokawaanoiye Yaubada yaina, bei kobabane neta konumisa.’
Diyuu adi tolovinayao
Yeisu ina lovina sivaakakone tetelina
Yeisu ina lovina sivaakakone tetelina
(Maki 11:27-33; Luke 20:1-8)
23 E kaketoiya kama Vada Kimaasabaina ana kali goi kasiu go, Yeisu ivatowo ivatulúkwana. Ivaatulúkwana go, kidi Tonúwala Gagaidi be tomota idi tomoyamoyayao sima Tauyana silumadade sidigo kadi,
‘Avatau ina lovina goi moe guinuwayadi kuguuinuwedi? Nakae avatau itaagonem kuguuinuwedi?’
24 Go kina Yeisu idigo kana,
‘Yau nakae lumadádana tayamo alumadademi. Neta kokatumapu, e yau nakae bei alatuwokoimi avatau ina lovina goi ame guinuwayadi aguuinuwedi. 25 Guna lumadadanayana ame nakae: Iyoni ina sayóyova moe Yaubada ina lovina goi gea tomota idi lovina goi?’
E kidi aditava sibobóbwara sidigo kadi,
‘Bei manakaeda? Neta kada, “Yaubada goi”, e Tauyana bei kana,
“Moe moitamo! Tauna kaga unana geya konumiseyeta?”
26 Go neta kada, “Tomota goi”, e ame bodayadi tamatooitedi seki kaga bei sivekoida. Boda liliudi sinuwonúwana Iyoni tokabivalavala tayamo.’
27 Tuwo Yeisu silatuwoko sidigo kadi,
‘Geya kayagoiyeta avatau ina lovina goi.’
Go kina Yeisu nakae idigo kana,
‘Yau nakae geya alatuwokoimita avatau ina lovina goi ame guinuwayadi aguuinuwedi.’
Livalakaibala koroto natunao
adi taiyuwo manuna
adi taiyuwo manuna
28 E aiyuwoina Yeisu ibobwaramna idigo kana,
‘E tétala ame konōve go, manuna konuwolelēu:
Koroto tayamo natunao koroto adi taiyuwo go, ina ina botomoya ilatuwoko idigo kana,
“Natugu, kutāoya, ame tuta kūna oine tanuina goi kupaisēwa.”
29 “Ogu ikai”, botomoyayana kaena.
E niga go nukotona ikatuvilavila, tuwo moitamo ina ipaisewa.
30 E korotoyana ina bogomane nakae ilatuwoko.
“Tamagu, dedevina. Bei ana”, bogomaneyana kaena.
Niga go geya ina ipaiseweta.
31 Adi taiyuwokova yaidi goi avatau tamana ina nuwonúwana iguinuwe?’
Kidi sidigo kadi,
‘Kina botomoya.’
Tuwo Yeisu idigo kana,
‘U, moe kina botomoya go, ame alatuuwokoimi konōve: Toogoyoidi, moe kidi takisi adi togogo be nakae tomatagogoli, Yaubada ina kalibúbuna sinaena goi bei sisiu go, komi masa bei kosiu. 32 Moe moitamo. Iyoni iwo yaimi goi anasíuna ana kibóbwata italavaite go, komi geya konumiseyeta. Go kidi takisi adi togogo be nakae tomatagogoli sinumise. E komi matami goi amo kogite go, tuwo niga komi geya kotugavileta be tauyana konumise.’† Luk 3:12, 7:29-30.
Livalakaibala toni tánuwo manuna
(Maki 12:1-12; Luke 20:9-19)
33 Yeisu livalakaibala aiyuwoina ivinidi idigo kana,
‘Livalakaibala aiyuwoina konōve.
Toni tánuwo tayamo ikaaiyaka. Ina tanuwoyana goi oine kaka ibaguli. Ibaguli ikavava, gurewa ikabidi tanuwoyana ana kali ikaudakodako. Ikavava, bobosiu ieli. Amoko goi oine ana kaba vavetaveta iwodugu. Iwodugu ikavava, tanuwoyana sinaena vada aba yáusa tayamo maanawena iyowo ituko ina. Iyowo ikavava, koroto maniyedi itagonedi tanuwoyana sikatoguye go, niga dibayoya ana tuta oine keuwoina maniyena bei toni tánuwo siemaisi. Tuwo kidi tokatoguyadi sikaaiyaka tánuwo sipaaisewa go, kina toni tanuwoyana itaoya ina ituli ta dadava.† Ais 5:1-2.
34 E tutayana dibayoya ana tuta isowóduwo, toni tanuwoyana ina pakonayao ietunedi sina tánuwo ana tokatoguyao yaidi goi bego tánuwo ana takona oine sikabidi simedi. 35 Simamaima go, kidi tokatoguyadi sitaoya, ina pakonayaoyadi siyoisidi, tayamo sidabiyamo, aiyuwoina sikaumate, aitonidi gurewa goi sikaumate. 36 Aiyuwoina tuwaina ina pakonayao tupwana badabadaidi ietunedi sina go, kidi tokatoguyadi sitaoya, e nakae liliudikova sikaumatedi. 37 Aba lukavava goi toni tanuwoyana inuwonúwana kana,
“Tuwo bokoyo natugu bei aetune ina. Nakona bei tauyana sigite odi imayamaya.”
Tuwo moitamo natunayana ietune ina. 38 E kidi go tokatoguyadi sikandobala tauyana sigite imamaima. Tuwo aditava sibobóbwara kadi,
“Amo toni tánuwo natuna imamaima. Tauyana tamana ana katumapu. Tuwo ima, tayōisi takaumāte bei tanuwoyana kita ida kaba lovina.”
39 Tuwo moitamo tauyana ima kikidi, e siyoisi silave ina takiki goi sikaumate.’
40 Livalakaibala ilukavave, Tonúwala Gagaidiyadi ilumadadedi idigo kana,
‘Tauna tutayana tomoyayana, moe toni tánuwo, bei ima, kaga bei iguinuwe amo tokatoguyadi yaidi goi?’
41 Tonúwala Gagaidi be nakae Diyuu idi tomoyamoyayao sidigo kadi,
‘Amo togoyoidiyadi bei ilokaumatematedi go, ituli ta tokatogu dedevidi bei itagonedi tanuwoyana simatakavate. Amo tokatoguyadi dibayoya ana tuta bei sitakona.’
42 Kina Yeisu idigo kana,
‘Moe moitamo go, manakae? Ame tomwanayana Gínina Kimaasabaina goi konuuwaisi gea geya? Tomwanayana Guyau manuna idigo kana,
“Gurewayana kidi toyówana siikatae
bogina imalalasáuna.
Ame Yauwe ina guinuwa go,
guinuwayana moe aba kainaopa kita yaida.Ӡ Gui 4:11; 1Pi 2:4,7.
Same 118:22-23
43 Komi nakae. Yaubada Natuna kokatae. Tauna ame alatuuwokoimi konōve: Yaubada ina kalibúbuna bei ikuliuye yaimi go, ituli ta boda bei ikalibubudi, bodayadi moe Totuyoyowo. Tauyadi bei kéuwo dedevina goi sikéuwo. [ 44 Avatau neta isou ame gurewayana goi, bei ivatuguguyali. Avatau neta yatana goi gurewayana isou, bei ikauvetevete.]’‡ Ame nakona Madiu geya iginiyeta, go sem buki ana tokaidámana tayamo toinina ina nuwonúwana igini.
45 Tuwo ina livalakaibalayadi kidi Tonúwala Gagaidi be nakae Parisi sinovedi, bogina siiyagoi bego tauyadi iidigedi. 46 Tuwo enao siilusala bei Yeisu siyoisi go, boda simatoitedi unana sinuwonúwana Tauyana Yaubada ina tokabivalavala tayamo, tauna nakona kaga bei sivekoidi.