17
Yeisu ana kaigigita ikaanagavila tetelina
(Maki 9:2-13; Luke 9:28-36)
1 Maliyalina ainima tayamo mlidi Yeisu itaoya, Pita, Yemesa ma siyana Iyoni ikabidi, aditava sina koya maanawena goi situko. 2 Maeko goi Tauyana ana kaigigita ikanagavila, nakae maisina inínima níyala nakae go, ana kwama sivapopowou, poowoudi toina mavada tayamo nakae. 3 Go geya mgoninamo Mosese be Eliyau sisowóduwo tauyadi yaidi goi go, Yeisu taiyao sibobóbwara. 4 E kina Pita iigitedi, tuwo ikaubesobeso idigo kana,
‘Guna Tomoya, ame dedevina kita ameko takaaiyaka. Manakae? Yoyou aito ayowóidi? Tayamo kom im yoyou, tayamo Mosese ina yoyou, tayamo Eliyau ina yoyou.’
5 Pita nava ibobóbwara go, gaota maavadaina iumaidi.†aTat 40:35. Ago gaotayana goi níyana tayamo sinove idigo kana,
‘Ame Natugu, guna kakaya, auyaonedoko.†bAbv 22:2; Sam 2:7; Ais 42:1; Mad 3:17, 12:18; Mak 1:11; Luk 3:22; 2Pi 1:17-18. Tauyana konōve!’†cAtu 18:15.
6 Niyanayana ina tovatotowanayao sinove, madi matoita sikanakabobo. 7 Tuwo Yeisu ibala ina tauyadi ibisikonedi idigo kana,
‘Kotāoya. Taabu koomatōita.’
8 E sitaoya, sikandobala, koroto adi taiyuwo geya sigitedita, go sem Yeisu anetava sigite ikaaiyaka. 9 Ikavava, koya goi sisousou go, Yeisu ilovinaedi idigo kana,
‘Kaga koogitedi taabu kotalaavaitēdi ana kadókana Yaubada Tomalatomota tokámasa yaidi goi ikaitáoe.’
10 Go Eliyau ina sowóduwo pasina ina tovatotowanayaoyadi adi taito silumadade sidigo kadi,
‘Go kom kam,
“Guyau bei ikámasa.”
Moe ana taiyakeka Guyau itoboine igimiima. Tauna kaga unana Yaubada ina Katukeda ana tovatulukwanayao sidigodigo bego Eliyau igimiima namliyeta Guyau bei ima?’†Mal 4:5.
11 E kina Yeisuyana idigo kana,
‘Moe moitamo. Eliyau bei ima kaga liliuna iyolimedi. 12 Go ame alatuuwokoimi konōve: Eliyauyana bogina ima go, tomota geya sikinaneyeta, go sem kaga nakae latuwodi siguinuwe tauyana yaina, e nakae siguinuwe. Tomalatomota nakae, bei siyogedegede.’†Mad 11:14.
13 Tuta amo goi ina tovatotowanayaoyadi adi taito bogina siyagoi moe Iyoni tosayóyova manuna ibobóbwara.
Yeisu gómana naagovaina
ikideedevine tetelina
ikideedevine tetelina
(Maki 9:14-27; Luke 9:37-43a)
14 Tuwo Pita, Yemesa be Iyoni Yeisu taiyao koya goi sisou sima boda yaidi go, koroto tayamo ima Yeisu matana goi aena ivatugúyala 15-16 idigo kana,
‘Tomoya, natugu koroto ina vísiya goi ma taatavina, tauna visiyayana ibunenete. Nakae tuta maniyena ikapusi isou yeu goi go, tuta maniyena ikapusi isou bwae goi. Aiyuwoina maine bogina ame im tovatotowanayao yaidi goi bego sivaite go, geya itoboinedita sikidedevine. Tauna tauyana kunuwokapisīye.’
17 Go kina Yeisuyana idigo kana,
‘Komi tomota manakae? Manakae? Komi numisa geya be nakae dabami sikasa ae? Tuta maanawena taiyao bogina takaaiyaka go, ava tuta bei konumisedokoigu? Tuta maanawena imi dabakasa bogina aatogage, tauna ava tuta bei konovegu? Tuwo, gomanayana kōme!’
18 Tuwo gomanayana sikabi sime Tauyana yaina goi go, dimoni ikaaiyaka gomanayana sinaena ilovinae idigo kana,
‘Dimoni, kusowōduwo!’
Moitamo isowóduwo go, gomanayana mainao idedevina. 19 Niga kai ina tovatotowanayaoyama ametava kama Yeisu yaina goi kadigo kama,
‘Kaga unana geya itoboinemeta amo dimoniyana kavatapiye isiya?’
20 E Yeisu kana,
‘Unana geya konumisadokoneta. U, moe pasina go, ame alatuuwokoimi konōve: Neta imi numisa beno kutukutuna nakiyana, itoboinemi ame koyayana kolatuwoko kami, “Kubāla kūna amoko goi”, bei ibala ina amoko goi. Aiyuwoina neta imi numisa beno kutukutunayana nakiyana, e geya kada tayaamo kaga bei imoumou yaimi.†Mad 21:21; Mak 11:23; Luk 17:6; 1Ko 13:2. [ 21 Ego dimoni amo nakae bóbwara kaka goi geya isiyeta, go sem awanoi goi be diyakímwana goi bei isowóduwo.]’‡Ame tomwanayana nakona Madiu geya iginiyeta, go sem tokaidámana tayamo ikatusavi.
Yeisu ina kámasa aiyuwoina italavaitemnei
(Maki 9:30-32; Luke 9:43b-45)
22 E kataligógana Galili goi go, Yeisu ilatuwokoima idigo kana,
‘Segowo, tomota tayamo giyakainava bei itaoya, Tomalatomota inuwotuluye tomota nimadi goi. 23 Ikavava, bei sikabi sikaumate go, maliyalina aitonina goi Yaubada bei ikaitáoe.’
Ame kai kanove, nuwoma imou gagaina.
Vada Kimaasabaina ana takisi manuna
24 E kai kama Kapaneumi goi go, Vada Kimaasabaina ana takisi ana togogoyao sima Pita yaina sidigo kadi,
‘Imi tovatulúkwana Vada Kimaasabaina ana takisi itakisi gea geya?’†Tat 30:13, 38:26.
25 ‘U’, Pita kaena.
Go isiu vada goi, Yeisu mainao idigo kana,
‘Saimoni, manakaem kunuwonúwana? Poyapoya ana tolovinao nako goi idi takisi sikabidi, toinidi natudiyao gea ituli ta boda yaidi goi?’
26 E Pitayana idigo kana,
‘Ituli ta boda goi.’
Tuwo Yeisu idigo kana,
‘Tauna natudiyao geya sitakisita. Kita nakae tokalibúbuna natunao, tauna geya tatakisita. 27 Go tuwo, kuīwo kūna bwae goi im bani kulāve. Ava íyana mainao kugimibiu, e kukābi, tobuna kukikatanāi, bei mani tayamo kubabane. Maniyana kwābi kunāve Vada Kimaasabaina ana takisi ana togogoyaoyadi kuvinīdi kom be yau ida takisi manuna, govila bei tagiegamogamoguyedi.’