Pita ana yóita be ina kotu tetelidi
3
(Guinuwa 3:1—4:31)
Pita koroto topem ikideedevine tetelina
1 E tuta tayamo awanoi ana tuta Pita be Iyoni sina Vada Kimaasabaina ana kali sinaena goi bego sisiu. 2 Ego koroto tayamo ikaaiyaka, tauyana ana bíbina goi topem. Maliyalina tamo tamo goi senao sikavale sinavenave Vada Kimasabainayana ana kali totomna yoina Kausara‡Kausara: Ame totom maisina dedevina toina, tauna sivayou Kausara. goi siyatoyato bego ikawanoi mani manuna Vadayana ana tosiu yaidi. 3 E korotoyana ikaaiyaka ikandobala, Pita be Iyoni iigitedi bego Vada Kimasabainayana sisiu, tuwo ikawanoi yaidi mani manuna. 4 E Pita Iyoni taiyao sidumaakavate go, Pita idigo kana,
‘Kugitēma!’
5 E tauyana igitedi inuwonúwana kana,
‘Nakona bei kaga sivinigu.’
6 Go kina Pita idigo kana,
‘Yau siriba be goura geya, go sem kaga nakae itoboinegu bei avinim. Yeisu Guyau guma Nasareta yoina goi kutāoya be kuketōiya!’
7 Pita ibisisobu korotoyana nimakakataina iyoisi, imalolasa itaoya go, mainao tauyana aeyapayapana be aekituna sitogaga. 8 Tauna ilosuyae itaoya dókana, mana pela iiketoiya. Tuwo ina Vada Kimaasabaina ana kali sinaena goi isiu tauyadi taiyao go, mana pela be mana yapali Yaubada yaina iiketoiya. 9 Isiu go, tomota liliudi sikandobala korotoyana sigite iiketoiya be nakae iiyapali Yaubada yaina. 10 E korotoyana sikinane kadi,
‘Ame tauyana boi Vada Kimaasabaina ana kali totomna Kausara goi iitusobu ikaawanoi mani manuna!’
Tuwo ame guinuwayana pasina tomota sikaliwoisa be nakae sikainaopa.
Pita ina kidedevina pasina
Vala Dedevina italavaite tomota yaidi
Vala Dedevina italavaite tomota yaidi
11 E awanoi ana tuta ikavava, Pita be Iyoni sisowóduwo, sibala sina vada geya ana vabodamo yoina Solomoni ina veranda goi go, korotoyana nava iyoisikaavatedi. Iyoisikaavatedi go, tomota liliudi sikandobala sigitedi, madi kainaopa silokoina sima yaidi. 12 E Pita igitedi, tuwo ilatuwokoidi idigo kana,
‘Komi Isileli tubunao, ame guinuwayana bogina kogite ae? Kaga kokainaopae? Kaga kopootekoima? Manakae? Konuwonúwana bego kai toinima ima togaga goi o ima sinapu yábana sinapuna goi ame tauyana kakidedevine iketoiya ae? 13 Moe nakae geya, go sem Yeisu yoina goi ame topemyana togaga ibabane. Ame nakae: Eberamo, Aisake, Yakobo be nakae tubudao idi Yaubada†Tat 3:6,15; Mad 22:32; Mak 12:26; Luk 20:37; Gui 7:32. ina kitom moe Yeisu. E ina togaga ana káeyana Yeisuyana goi ivagitakoe. Go ame Yeisuyana komi boi bogina Pailato nimana goi koyato be nakae Pailatoyana matana goi kolawoiwoiye go, bogina itagona Yeisu italigei! 14 Go moe Totumasaba nakae Tokibóbwata komi kolawoiwoiye nakae kokawanoi makimaki Pailato yaina bego tokaumata italigei ivinimi.†Mad 27:15-23; Mak 15:6-14; Luk 23:13-23; Iyo 19:12-15. 15 Moe Yáwana ana Tokaimatana kokaumate go! Go ina kámasa mlina tokámasa yaidi goi Yaubada ikaitáoe! Moe kai bogina kagite, e kataalavaite yaimi. 16 Numisa Yeisu yoina goi pasina, tauna ame topemyana kogitegite be nakae kooyagoi, e Yeisu yoina ina togaga ikitogage. Go numisa Yeisu goi tababane, e moe numisayana koroto ame bogina ikidedevinedoko go, bogina kogite.
17 Go segowo, ame tuta bogina ayagoi komi mami tomoyamoya Yeisu kotamogemogeye, tauna amo nakae koguinuwe Tauyana yaina. 18 Go konuwokavāte boi Yaubada ina tokabivalavalayao liliudi sopadi goi igimitalavaita bego ana Vadámana ina gedageda bei ibabanedi. Tauna nakae ina livalayana imalatomota. 19 Tauna kotugavīla go, Yaubada komēko, e bei imi goyo itakukudi. 20 Neta nakae, bei Tomoya ina kaiyaka yaimi goi yawoimi kokani go, Tauyana boi bogina iikinave ietunemnei iwo moe Guyau Yeisu ada Toyava. 21 Yeisuyana itoboine yábana goi ikaaiyaka ana kadókana tutayana Yaubada kaga liliuna iyolimedi nakae boi ina tokabivalavalayao kimaasabaidi goi italavaite. 22 Mosese nakae boi nimatu idigo kana,
“Koroto tayamo semiyao yaimi goi Yauwe ida Yaubada nava bei ivayoko kina tokabivalavala tayamo yau nakae manumi. Kaga liliuna ilatuuwokoimi kokabikaonedōko.†Gui 7:37. 23 Go avatauwa neta tokabivalavalayana ina livala geya sikabikaoneyeta, Yaubada bei ilivisidi yaimi.”
Atukeda 18:15,18-19
24 E nakae tokabivalavala liliudi moe Samwera be nakae tauyadi mlina goi sima, e ame guinuwayadi ame tuta siisowóduwo boi nimatu sigimitalavaitedi. 25 Yaubada Guyau ietune ima komi be kai yaida goi nakae ina tokabivalavalayaoyadi sopadi goi ikatotule. Aiyuwoina boi tubudao ikanasiukoidi, e moe nakae komi be kai ikanasiukoida tutayana Eberamo ilatuwoko idigo kana,
“Nava boda liliudi poyapoya ame bei siyagoi tubumyana goi akaipakuyedi.”†Abv 12:3, 18:18, 26:4-5, 28:14; Gal 3:8.
Aba Vatowo 22:18
26 Tauna Yaubada ina kitom ikinave go, ietune ima mainao kita yaida bego ikaipakuyeda ame nakae: Kita liliuda ida sinapu goyo goi bei ikaigavileda.’
‡3:2 Kausara: Ame totom maisina dedevina toina, tauna sivayou Kausara.
†3:13 Tat 3:6,15; Mad 22:32; Mak 12:26; Luk 20:37; Gui 7:32.
†3:14 Mad 27:15-23; Mak 15:6-14; Luk 23:13-23; Iyo 19:12-15.
†3:25 Abv 12:3, 18:18, 26:4-5, 28:14; Gal 3:8.