Yeisu ina kámasa be ina taoyamna tetelidi
26
(Madiu 26:1—28:20)
Yeisu ana nuwotulu ana losinapu tetelina
(Maki 14:1-2; Luke 22:1-2; Iyoni 11:47-53)
1 Tutayana Yeisu ina bóbwara madabokina ilukavavedi, kai ina tovatotowanayao ilatuwokoima idigo kana,
2 ‘Komi bogina koyagoi maliyalina aiyuwo mlidi moe Basitáwana Aikanina†Tat 12:1-27. ana tuta. Amo tutayana tomota tayamo bei itaoya, Tomalatomota inuwotuluye ina kaleyayao yaidi goi bei kerose goi situpatuko.’
3 E tuwo kidi Tonúwala Gagaidi be nakae Diyuu idi tomoyamoya sima Tonúwala Toolagaina yoina Kaiyapasi ina vada esaaesaina goi situgúguna 4 go, silosinapu bego idi pola goi Yeisu siyoisigau be nakae sikaumate. 5 E sidigo kadi,
‘Go Basitáwana Aikanina sinaena geya tayoisiyeta, govila bei tomota madi egamogamogu sivakaleyeda.’
Vavina Yeisu wowona
ikatubayasi ana valiwoga manuna
ikatubayasi ana valiwoga manuna
(Maki 14:3-9; Iyoni 12:1-8)
6 E kina go Yeisuyana Saimoni ina vada Betani goi ikaaiyaka. Saimoniyana boi tolepero tayamo. 7 E Yeisu ikaaiyaka ikakáika go, vavina tayamo ima pútuma ana maisa gagaina ma bootorina dedevina toina iikavale. Ikavale ima Yeisu dabana goi isiwoi.†Luk 7:37-38. 8 E kai Yeisu ina tovatotowanayao kakaaiyaka go, vavinayana ina guinuwa kagite, tuwo kaegamogamogu, ametava kama,
‘Manakae pútuma ikavaavaluge! 9 Neta putumayana ikaigimone, itoboine maisana gagaina toina ikabi; nakae neta tala tayamo ana paisewa ana maisa. Ikaigimone ikavava, maisana ikabi, tookaidi ivinidi! Go kaga unana tauna nakae geya iguinuweyeta?’
10 Go kina Yeisuyana bogina iyagoi kaga kadigedige, e tuwo idigo kana,
‘Kaga unana vavinayana mou kovinivini? Kokalāve. Ina guinuwa yau yaigu moe guinuwa dedevina toina unana iwowoinegu. 11 Kidi tookaidi tuta liliuna sikaaiyaka yaimi itoboinemi kovaitedi. Go yau sem tuta kaakupina bei akaaiyaka yaimi.†Atu 15:11; Iyo 12:8. 12 Ame moitamo. Vavinayana pútuma ame dabagu goi iisiwoi mana wowoina wowogu ikatubayasi guna valiwoga manuna. 13 U, moe nakae iguinuwe go, ame alatuuwokoimi konōve: Poyapoya ana madabokina goi nako Vala Dedevina ame sitaalavaite, e ina guinuwayana tetelina nakae bei sivateteli go, tauyana sinuwokavate.’
Yudasa itagona Yeisu inuwootoluye tetelina
(Maki 14:10-11; Luke 22:3-6)
14 E tuwo kai yawou aiyuwo yaima goi tayamo yoina Yudasa guma Keriota go, tuwo itaoya ina Tonúwala Gagaidi yaidi goi 15 idigo kana,
‘Kaga kotagone kovinigu bei Yeisu anuwotuluye yaimi?’
‘Mani siriba ana badabada 30’, kidi kaedi.
Tuwo moitamo Yudasayana itagona, e siribayadi sivini ikabidi.†Sak 11:12. 16 Tuwo tuta amo goi Yudasa tuta ana toboine iilusale bei Yeisu inuwotuluye.
Yeisu mana tovatotowanayao
Basitáwana Aikanina sikakáika tetelina
Basitáwana Aikanina sikakáika tetelina
(Maki 14:12-21; Luke 22:7-13,21-23; Iyoni 13:21-30)
17 E Beredi Pokaka Aikanina ana maliyalina vakuumgoina goi kai tovatotówana kama Yeisu kalumadade kadigo kama,
‘Nako goi latuwom Basitáwana Aikanina kakatubayasi bei takáika?’‡Basitáwana Aikanina moe maliyalina tayamo go, Beredi Pokaka Aikanina moe maliyalina ainima aiyuwo goi siguuinuwe. Ego tomota maniyedi sinuwonúwana bego Basitáwana Aikanina moe Beredi Pokaka Aikanina ana maliyalina vakuumgoina. Ana kaigigita aikayadi aiyuwo silamgogoidi nakae maliyalina eita (Tat 12:6,11,15,18).
18 ‘Kōna Yerusalema goi tayamo koroto bogina alaatuwoko kobabane kolatuwōko kami,
“Tovatulúkwana idigo kana, ‘Guna tuta giyakainava bei isowóduwo. Latuwogu im vada goi guna tovatotowanayao taiyao Basitáwana Aikanina kakáika’ ” ’, Yeisu kaena.
19 Tuwo moitamo kai tovatotówana kataoya kana kaguinuwe nakae Tauyana bogina ilatuwokoima. Ikavava, ama Basitáwana Aikanina kakatubayasi. Kakatubayasi ikavava, kakaluvila kama Tauyana yaina goi.
20 E bogina kenanatau, Yeisu kai yawou aiyuwo taiyao bogina kama katugúguna kakáika. 21 Kakakáika go, Tauyana idigo kana,
‘Ame dedevina taiyao takakáika go, ame alatuuwokoimi konōve: Koroto tayamo yaimi goi nava bei inuwotuluyegu.’
22 Tuwo kai tamo tamo mama kategeda kabibilágata kadigo kama,
‘Tomoya, nakona yau?’
23 Go Tauyana idigo kana,
‘Kita mada kabivekoveko noko tayamo goi ida beredi tavakuutuidi go, koroto tayamo yaimi goi moe yau agu tonuwotulu.†Sam 41:9. 24 Tomalatomota bogina inonoina nakae Gínina Kimaasabaina boi bogina igimitalavaite Tauyana manuna. Ego ana tonuwotuluyana ana toovalugo! Neta boi sinana geya ivenatuniyeta!’
25 E kina go Yudasa, tauyana bei Yeisu inuwotuluye, idigo kana,
‘Tovatulúkwana Toolagaim, geya, nakona yau?’
Tuwo Yeisu idigo kana,
‘Kom bogina kudigoyabe.’
Tomoya ana káika
(Maki 14:22-26; Luke 22:14-20; 1 Korinta 11:23-25)
26 E kakakáika go, Yeisu beredi ikabi, manuna ikauyagu Yaubada yaina. Ikavava, ikivisi, kai ina tovatotowanayao ivinima idigo kana,
‘Moe wowogu nakae. Kokābi kokāni.’
27 Tuwo kakabi kakáika. Ikavava, oine ma keeigaina ikabi, manuna ikauyagu Yaubada yaina. Ikavava, keigayana ivinima idigo kana,
‘Oine moe madabokimi konīm. 28 Moe ikaikaigu nakae. Ikaikaiguyana bei idaudau komi manumi be nakae tomota liliudi manudi, e bei imi goyo adi nuwotao kobabane. Ikaikaiguyana ina dau goi Yaubada ikanasiukoimi.†Tat 24:8; Yer 31:31-34; Sak 9:11; Ibe 9:20. 29 E ame alatuuwokoimi konōve: Oine ame geya tuwaina bei animnim ana kadókana tutayana Tamagu itagonegu akalibúbuna namliyeta baige komi taiyao oine vau bei tanim.’
Tuwo kakabi kanim.
30 Kakáika ikavava, Same vesina maniyedi kavesiyedi‡Kavesiyedi: Nakona Same 115-118 sivesiyedi unana tutayana Diyuu Basitáwana Aikanina bogina sikáika, e Sameyadi sivesiyedi Yaubada yaina. Yaubada yaina. Kavesi ikavava, kasowóduwo kana Oribe Koyaina goi katuko.
Yeisu ina talavaita Pita ina lawoiwoi manuna
(Maki 14:27-31; Luke 22:31-34; Iyoni 13:36-38)
31 E tuta amo goi Yeisu ilatuwokoima idigo kana,
‘Komi madabokiimi sabamgo ame imi numisa goi bei kokapusi yau pasigu. Moitamo. Gínina Kimaasabaina goi Yaubada kana,
“Sipi adi tomatakavata bei aláui go,
ina sipiyadi bei sisapa‡Sisapa: Da Giriki niyadi goi ame livalayana geya imavadeta. Itoboineda kada ‘Sisapa’ go, aiyuwoina itoboineda kada, ‘Akausapesapedi.’ sisiya.”
Sakarayau 13:7
32 Go ámasa goi Yaubada ikaitaoemneigu mlina bei avakumgo ana Galili.’†Mad 28:7,10,16; Mak 16:7.
33 Go kina Pita idigo kana,
‘Nakona madabokidi bei sikapusi kom pasim go, yau geya aakapusi.’
34 Go kina Yeisuyana idigo kana,
‘Moe dedevina neta moitamo go, ame alatuuwokoim kunōve: Ame sabamgoyana goi kom bogina bei sivato kulawoiwoiyekoigu namliyeta kamkam bei itáiya!’
35 Go kina Pitayana idigo kana,
‘Neta akámasa kom taiyao, tuwo akámasa go, geya alawoiwooiyem.’
Ame nakae tovatotówana liliuma kadige.
Yeisu ina kawanoi be ana yóita
Gedesemane goi tetelidi
Gedesemane goi tetelidi
(Maki 14:32-42; Luke 22:39-46)
36 E tuwo Yeisu kai ina tovatotowanayao taiyao kama asa yoina Gedesemane‡Gedesemane: Ame youyana ana yagoina moe oribe ana kaba vavetaveta. goi go, maniyema ilatuwokoima, idigo kana,
‘Ameko kotusōbu kokaaiyāka go, kai kana dobala, e yau bei akawanoi Yaubada yaina.’
37 Tuwo moitamo katusobu go, Pita be Sebedi natunao adi taiyuwo ikabidi taiyao sina. Sinonoina go, Yeisu nuwona imou be nakae atena igeda. 38 E tuwo adi taito ilatuwokoidi idigo kana,
‘Nuwogu taitáiya iuyoi, nakae bei akámasa.†Sam 42:5. Komi ameko goi kokaaiyāka go, koyauyāusa yau taiyao.’
39 Ibóbwara ikavava, ivayavakova ikanakabobo go, ikawanoi Yaubada yaina kana,
‘Tamagu, manakae? Itoboine bego gedageda keigaina ame geya ababaneyeta? Go yau geya guna nuwonúwana geya, go sem kom im nuwonúwana kuguinūwe.’
40 Ikawanoi ikavava, ikaluvila ima ina tovatotowanayaoyadi ibabanedi sikanaamatáiya, tuwo iwoinidi. Iwoinidi, e Pita ilatuwoko idigo kana,
‘Manakae? Geya itoboinemta tuta giiyaina goi kuyauyáusa yau taiyao ae?’
41 Ago adi taito ilatuwokoidi idigo kana,
‘Koyauyāusa nakae kokaawanōi bego aba vakakona goi geya kokapusita. Balomaimi latuwodi toina go, wowomi sineneta.’
42 Sivayuwoina ivayavamna ina ikawanoi idigo kana,
‘Tamagu, neta geya tayaamo enao ikaiyaka bego gedageda keigaina ame akalave, e bokoyo go tuwo im nuwonúwana bei aguinuwe; keigayana anim.’
43 Tauyana sivayuwoina ikaluvilamna ima ina tovatotowanayaoyadi ibabanedi sikanaamatáiya. Bogina kuyagoi. Matadi inosedi gagaina. 44 Tuwo itaoya ikalavedi, sivatonina ivayava ina ikawanoi nakae maine bogina ikawanoi. 45 Ikawanoi ikavava, ikaluvila ima ina tovatotowanayaoyadi adi taito ibabanedi sikanaamatáiya. Tuwo iwoinidi go, idigo kana,
‘Manakae? Nava koomasisi be kowaaiwasi ae? Konōve. Tomalatomota ina tuta bogina ima. Ana tonuwotulu bei toogoyoidi nimadi goi iyato. 46 Kotāoya tāna. Gwa! Guna tonuwotuluyana bogina imamaima.’
Tuwo moitamo sitaoya go, kai ina tovatotowanayao ainima aito nakae iduduwema kama.
Yeisu ana yóita tetelina
(Maki 14:43-50; Luke 22:47-53; Iyoni 18:3-12)
47 Yeisu nava ibobóbwara go, Yudasa isowóduwo ima. Tauyana tovatotówana tayamo kai yawou aiyuwo yaima goi. Isowóduwo go, boda gagaina madi sisi be madi kepati taiyao sima. Bodayadi kidi Tonúwala Gagaidi be Diyuu idi tomoyamoya sietunedi sima. 48 Ego Yeisu ina tonuwotuluyana aba kinana tayamo bogina ivinidi bei siiyagoi ava koroto moe Yeisu, kana,
‘Avatau neta ayowoi, e amo Tauyana koyōisi.’
49 E tuwo tauyadi sima go, Yudasayana mainao iseivata ima Yeisu goi idigo kana,
‘Tovatulúkwana Toolagaim, uyagu!’
Ikavava, iyowoi. 50 E kina go Yeisu idigo kana,
‘Naveya, moe pasina kuma ae?’
Tuwo bodayadi sibala sima Tauyana siyoisi. 51 Ago koroto tayamo kai Yeisu ina bodao yaima goi ina sisi ibuyagi, ibala ina Tonúwala Toolagaina ina pákwana taiyana ivakanáupe. 52 Tuwo Yeisu ibóbwara, korotoyana ilatuwoko idigo kana,
‘Im sisi kebana goi kuvaisiumnēi! Avatauwa neta giya sisi goi sivalauláuwo, e sisiyana goi bei sivailai. 53 Manakae? Geya kuyagoiyeta neta latuwogu, itoboinegu Tamagu yaina goi akawanoi makimaki bei mainao aivina tausani anerose ietunedi sima sivaitegu? 54 Neta nakae aguinuwe, e Gínina Kimaasabaidi adi talavaita manugu manakaedi simalatomota? Geya. Tauna nakae geya aguinuweyeta.’
55 Go tuta amo goi bodayadi Yeisu ilatuwokoidi idigo kana,
‘Manakae? Yau bego tokapipilova tayamo, tauna komi mami sisi be mami kepati koma koyoisigu? Maliyalina tamo tamo Vada Kimaasabaina goi atusobu avaatulúkwana go, geya koyoisiguta.†Luk 19:47, 21:37. 56 Go ame dogoiyadi madabokidi sisowóduwo bego Yaubada ina tokabivalavalayao idi Gínina Kimaasabaidi simalatomotamna.’
E tuwo kai Yeisu ina tovatotowanayao liliuma Tauyana kakalave go, kasiya.
Yeisu ana kotu Diyuu
idi tomoyamoya matadi goi tetelina
idi tomoyamoya matadi goi tetelina
(Maki 14:53-65; Luke 22:54-55,63-71; Iyoni 18:12-14,19-24)
57 E kidi go bodayadi Yeisu siyoisi, sinave Tonúwala Toolagaina Kaiyapasi ina vada goi. Amoko goi Yaubada ina Katukeda ana tovatulukwanayao be nakae Diyuu idi tomoyamoya bogina sigugúguna.
58 E kina go Pita tupwana masigava goi Yeisu isabookuliye, e ina Tonúwala Tolagainayana ina vada ana kali goi isiu itusobu Vada Kimaasabaina ana polisi taiyao bego igite kaga iisowóduwo.
59 E kidi go Tonúwala Gagaidi be nakae Diyuu adi kotu ana tolovinao liliudi vadayana sinaena sikaaiyaka Yeisu ana totalavaita polapola siluusaledi bego sitakino kina toogoyoina bei sikaumate. 60 Totalavaita polapola badabadaidi moitamo sima sitalavaita polapola go, idi talavaitayadi goi geya tayaamo itoboine bei Yeisu sikaumate. Nakae nakae siguuinuwe, e totalavaita polapola adi taiyuwo sima 61 sidigo kadi,
‘Ame Tauyana kanove idigo kana,
“Itoboinegu Yaubada ina Vada Kimaasabaina atauwe go, maliyalina aito mlidi goi ayowomnei.” ’†Iyo 2:19.
62 Sitalavaita ikavava go, kina Tonúwala Toolagaina itaoya Yeisu ilatuwoko idigo kana,
‘Manakae kom im katumapu? Ame kaga manuna tauyadi sitalavaaitem?’
63 E kina go Yeisuyana iitugau. Kina go Tonúwala Tolagainayana idigo kana,
‘Yaubada maa yawoina yoina goi alovinaem: Kubōbwara moitamo. Neta kom moitamo Guyau, Yaubada Natuna, kulatuwokōima!’
64 Kina Yeisuyana idigo kana,
‘Kom bogina kudigoyabe. Go ame alatuuwokoimi konōve: Tuta imamaima Tomalatomota bei kogite mana lovina wowoina basekoina Tokalika kakataina goi iitusobu†aSam 110:1. be nakae yábana geleoina yatadi goi imamaima.’†bDan 7:13.
65 E tuwo kina go Tonúwala Tolagainayana ana kwama ikiise giyaina go, idigo kana,
‘Tauyana idigopopóita! Kaga ana dedevina totalavaita tuwaina taalusala?†Vin 24:16. Geya! Ame tuta ina digopopoitayana toinimi bogina konove! 66 Komi manakaemi koolovina?’
E tauyadi sidigo kadi,
‘Moitamo Tauyana ibágala. Itoboine ikámasa!’
67 E tuwo matana sisikobode go, maisina sigiwoli be nakae sipwaiki. E maniyedi maisina sisapi†Ais 50:6. 68 go, sidigo kadi,
‘Yo Guyau! Kom bego Yaubada ina tokabivalavala, tuwo kulatuwokōima avatau iilauim!’
Pita ina lawoiwoi tetelina
(Maki 14:66-72; Luke 22:54b-62; Iyoni 18:15-18,25-27)
69 E kina go Pitayana Tonúwala Toolagaina ina vada ana kali sinaena goi iitusobu go, Tonúwala Toolagainayana ina pákwana woiyaina tayamo ima Pitayana igite, idigo kana,
‘Kom woi Yeisu guma Galili ina tosabokuli tayamo.’
70 E kina go Pita ilawoiwoi idigo kana,
‘Moe kaga kudigedige yau geya ayagoiyeta!’
71 E ibala ina aliyana ana kaba siu goi ikaaiyaka. Ikaaiyaka go, ituli ta vavina paakonina ikandobala Pita igite, tomota amoko goi sikaaiyaka ilatuwokoidi idigo kana,
‘Ame tauyana Yeisu guma Nasareta ina tosabokuli tayamo.’
72 Pita sivayuwoina ilawoiwoimna go, ikanatamada idigo kana,
‘Iyagoida! Korotoyana geya ayagoiyeta geya!’
73 E tuta giyaina toyoko sibala sima Pita silatuwoko sidigo kadi,
‘Kom woi Yeisu ina tosabokuli tayamo. Moitamo. Niyam ana taiyakeka kakinane. Kom guma Galili.’
74 E tuwo Pita ibibilágata ikanatamada idigo kana,
‘Iyagoida! Neta apola, Yaubada itoboine ilauigu. Amo korotoyana kodigedige yau geya ayagoiyeta geya!’
E mainao kamkam itáiya. 75 Tuwo Pitayana Yeisu ina livala inuwopeye boi idigo kana,
‘Namliyeta kamkam itáiya, e kom bogina bei sivato kulawoiwoiyekoigu.’
Tuwo vadayana ina kali goi isowóduwo ina moetala goi itáiya gagaina toina.
†26:15 Sak 11:12.
‡26:17 Basitáwana Aikanina moe maliyalina tayamo go, Beredi Pokaka Aikanina moe maliyalina ainima aiyuwo goi siguuinuwe. Ego tomota maniyedi sinuwonúwana bego Basitáwana Aikanina moe Beredi Pokaka Aikanina ana maliyalina vakuumgoina. Ana kaigigita aikayadi aiyuwo silamgogoidi nakae maliyalina eita (Tat 12:6,11,15,18).
†26:23 Sam 41:9.
†26:28 Tat 24:8; Yer 31:31-34; Sak 9:11; Ibe 9:20.
‡26:30 Kavesiyedi: Nakona Same 115-118 sivesiyedi unana tutayana Diyuu Basitáwana Aikanina bogina sikáika, e Sameyadi sivesiyedi Yaubada yaina.
‡26:31 Sisapa: Da Giriki niyadi goi ame livalayana geya imavadeta. Itoboineda kada ‘Sisapa’ go, aiyuwoina itoboineda kada, ‘Akausapesapedi.’
†26:32 Mad 28:7,10,16; Mak 16:7.
‡26:36 Gedesemane: Ame youyana ana yagoina moe oribe ana kaba vavetaveta.
†26:38 Sam 42:5.
†a26:64 Sam 110:1.
†b26:64 Dan 7:13.
†26:65 Vin 24:16.
†26:67 Ais 50:6.