Ruti ikaawanoi vaita manuna tetelina
3
(Ruti 3:1-18)
Naomi koroto tayamo iilusale Ruti monena tetelina
1 E Naomi inuwonúwana Ruti manuna, tuwo ilatuwoko idigo kana,
‘Natugu, dedevina koroto tayamo alusale monem, bei im kaiyaka dedevina. 2 ¿Boasa kunuwokavate? Tauyana ina pakonayao vevina taiyao boi koseoseo. Amo korotoyana monegu osiyana. Kunōve. Sabamgo ame aba kausapisápina goi bei bali itakino.‡Itakino: Isileli tubunao bali sitakino ame nakae: Mainao bali ma sakavaidi sikaaiyaka go, bulumakau sivakavatedi ana kadókana baliyana sakavaidi sivapavepavedi. Ikavava, bali kutukutuna be nakae mosamosaina taiyao sikaaiyaka. Tuwo sitakino. Idi takinonayana ame nakae: Poke gagaina nakae sikabi kutukutu be mosamosa taiyao sikalalagasidi. Tutayana sikalalagasidi, yágira mosamosa iyawoisave ibala ina masigava itowo go, kutukutu sisou poyapoya goi unana simoumou. 3 E kom kūna kuisīwo. Ikavava, kupūtuma be nakae am kwama dedevina toina kulōsi go, kusōu kūna nako tauyana iitakínona goi. Ego tauyana taabu iigitēm ana kadókana ikáika ikavava, imasisi. 4 Ago kom kūna tauyana kugīte nako goi iimasisi. Bogina iimasisi, e ina tanigo kunīsi go, aena kikina goi kumasīsi. Moe nakae matakavata kukawanoiye.‡Matakavata kukawanoiye: Ame nakona Ruti ikawanoi bego sinai. Namliyeta baige bei ilatuwokoim kaga bei kuguinuwe.’
5 E Rutiyana idigo kana,
‘Kaga liliuna kuudigedi bei aguinuwedi.’
6 Tuwo moitamo tauyana ina aba kausapisápina goi kaga yaona iidigedi nakae iguinuwedi.
Boasa itagona Ruti inai tetelina
7 E Boasayana ikáika ikavava, ina lotówana dedevina, tuwo ina bali gugunina kikina goi imasisi. Niga go Rutiyana ivasinamo ina tauyana ina tanigo inisi, e aena kikina goi imasisi. 8 E nobunatoina goi Boasa ikaliwoisa ikanagavila, e vavinayana igitebabane aena kikina goi imasisi ikanamatáiya. 9 E idigo kana,
‘¡Iyaa! ¿Kom avatau?’
‘Yau Ruti, im pákwana. Kom yaogu kaamasina osiyana guna totateta. Tauna, kwabīgu be kumatakavatēgu’,‡Kumatakavatēgu: Ruti nakona latuwona Boasa taiyao sinai (Rut 3:4). Ruti kaena.
10 Boasayana idigo kana,
‘¡O vavina! ¡Yauwe ikaipakuyem! Boi im lokata gagaina yaom yaina goi go, ame tutayana im lokata gagaina toina yaigu. Boi tubuwau geya kulusaleta bego kunai, toesaesa o tokai. 11 Ago vavina, geya kumatoiteta geya. Kaga liliuna kukawaanoiye bei aguinuwe. Moitamo. Tomota liliudi asa goi siyagoi kom guma Moabe; vavina dedevim. 12 Ego moe moitamo yau yaom kaamasina osiyana ina totateta be nakae itoboinegu amatakavatem†Rut 2:20. go, koroto tayamo ikaaiyaka, tauyana totubukumgo. Tauna tauyana mana lovina itoboine imatakavatem. 13 Ameko goi kuumasīsi vanuwo itomo. Itomo nobuyana ana tauyana agite. ¡Neta itagona bego imatakavatem, e dedevina, go geya, Yauwe yoina goi akatótula, yau bei amatakavatem! Ago ame tutayana kuumasīsi ana kadókana itomo.’
14 E tuwo Boasa aena kikina goi Rutiyana imasisi ana kadókana botomotomo itaoya. Boasa ina nuwonúwana kana,
‘Geya latuwogu tomota siyagoi bego vavina tayamo ima aba kausapisápina goi imasisi.’
15 Tutayana Ruti itaoya, Boasa idigo kana,
‘Am tanigo kunīsi kuvinīgu go, dadavina kuyoisikavāte.’
Tuwo ivini, e Boasayana bali kutukutuna nakae bayao tayamo ikabi, Ruti ana tanigo goi isiwoi. Ikavava, e Rutiyana ivavabe. Ikavava, Boasa itaoya ina asa.‡Boasa itaoya ina asa: Da Isileli niyadi goi ame geya imavadeta. Itoboineda takaigavile kada, ‘Boasa itaoya ina asa.’ Go aiyuwoina itoboineda kada, ‘Ruti itaoya ina asa.’ Da Isileli niyadi kana, ‘Itaoya’ go, geya tayagoiyeta avatau itaoya, Boasa o Ruti.
16 Go Ruti ikaluvilamna ina ina kasa goi baliyana yaona ivini. Yaonayana ilumadádana idigo kana,
‘¿Natugu, im ketoiya manakae?’
Tuwo kaga liliuna Boasa bogina iguinuwe, e manuna Rutiyana ivatétala, 17 idigo kana,
‘Boasa ilatuwokoigu idigo kana,
“Geya itoboinemta nima kaka kwaluvila kuna yaom yaina.”
Tauna bali kutukutuna gagaina ivinigu.’
18 Naomi idigo kana,
‘Ruti, om inūwa. Nava bei tagite kaga isowóduwo yaim. Moitamo. Boasa ame bei iguinuwa manum.’
‡3:2 Itakino: Isileli tubunao bali sitakino ame nakae: Mainao bali ma sakavaidi sikaaiyaka go, bulumakau sivakavatedi ana kadókana baliyana sakavaidi sivapavepavedi. Ikavava, bali kutukutuna be nakae mosamosaina taiyao sikaaiyaka. Tuwo sitakino. Idi takinonayana ame nakae: Poke gagaina nakae sikabi kutukutu be mosamosa taiyao sikalalagasidi. Tutayana sikalalagasidi, yágira mosamosa iyawoisave ibala ina masigava itowo go, kutukutu sisou poyapoya goi unana simoumou.
‡3:4 Matakavata kukawanoiye: Ame nakona Ruti ikawanoi bego sinai.
‡3:9 Kumatakavatēgu: Ruti nakona latuwona Boasa taiyao sinai (Rut 3:4).
‡3:15 Boasa itaoya ina asa: Da Isileli niyadi goi ame geya imavadeta. Itoboineda takaigavile kada, ‘Boasa itaoya ina asa.’ Go aiyuwoina itoboineda kada, ‘Ruti itaoya ina asa.’ Da Isileli niyadi kana, ‘Itaoya’ go, geya tayagoiyeta avatau itaoya, Boasa o Ruti.