1 Merikɨtsɨ xewitɨ Kakaɨyari niukameya wiuraya 'Eritseu mɨpaɨ katiniutahɨawe:

—Nekɨna mati'uximayatsiriwame kaniumɨni, 'ekɨ pekatinimaika mɨkɨ Yawé hetsiemieme 'aixɨa katiniyurienekaitɨni. Peru hikɨri xewitɨ tewi temɨte'epinirie kaninuamɨkɨ neniwema yuhutame waranuwitɨnike waɨriyarika te'uximayatamete mɨwarayeitɨanikɨ.

2 'Eritseu mɨpaɨ katinita'iwawiya:

—¿Keri ne nematiparewieni? Yakenetineutahɨawi, ¿'akie ketita perexeiya?

Wiura mɨpaɨ katinita'eiya:

—Ne mati'uximayatsiriwame tixaɨtɨ nepɨkarexeiya nekita, 'etsiwa xeikɨa huriwa hatseitiyari nepexeiya puteyu 'etsipemetsie.

3 Merikɨte 'Eritseu mɨpaɨ katinita'aitɨani:

—Kenemieka hikɨ 'akie hurawatari keniwarekawawiri xarite mekematsihetaniɨtɨani, kepaɨmeme tsepa pemekaxeiya. 4 Hikɨ 'ana yukiita xekeneutahaxɨa 'aniwema yunaitɨ meta xeketeneunama kitenie. Hatseiti 'etsimupetsie mieme xariteta keneukatuaxɨa naimeta, kemɨ'aneri mɨtihɨpɨrikeni xaɨtsie pe'itiyayatsatɨ.

5 Hikɨ wiura 'Eritseu 'utateutɨaka, yukie kaneyani. Merikɨte yuniwema wahamatɨa heuyunaka kanitsutɨani xarite tihɨniyatɨ niwemamata meni'atɨiriwakaitɨni. 6 Kepaukari naitɨ mɨhɨpɨnekai, mɨkɨ yuniwe tawari kaniutawawirieni xeime xari, mɨkɨ mɨpaɨ kaniutayɨni: «Matsi pumaweri». Hikɨ 'ana hatseiti kaniuyewani 'etsimupetsie.

7 Hikɨ 'uka kaneyani tewi Kakaɨyari hetsɨa mieme hetsɨa, katinitaxatɨani kemɨtiuyɨkai. Hikɨ mɨkɨ mɨpaɨta katinita'aitɨani: «Hikɨ kenemieri hatseiti kenetua, kɨmana ketineyutua pemɨrapine. Hikɨ kepaɨmetɨ meyuhayewa 'ekɨ meta 'aniwema kɨmana xetenanetɨ 'axepu'uwani».

8 Merikɨte 'Eritseu, Tsuneni kiekariyaritsie 'uyemiekaku mana xewitɨ 'ukaratsi waɨkawa rexeiyatɨ waɨriyarika yukie kanita'inieni mɨrekwanikɨ. 'Anatɨtɨ kepauka mana muyeyeikakai mana katinitikwa'akaitɨni. 9 'Uka yukɨna mɨpaɨ katiniutahɨawe: «Neuxei, ne yanepɨtimate 'ikɨ tewi takie muta'axe, xɨari tewi Kakaɨyari hetsɨa mieme mɨpatsie pɨhɨkɨ. 10 Xeime kiiya tepɨtawewieni takii heima, muwa mayehupunikɨ 'utaya tepɨkawewieni meta mexaya 'ɨparieya hauyutinɨkame meta kɨxemeya. Kepauka mɨtatsiha'iwatamie meixeiyanikɨ hakewa mayehupuni».

11 Mɨpaɨ mete'uyurieku 'Eritseu kaninuani, muwa heutiyaka kaniukahuni. 12 Hikɨ yuparewiwame Kihetsi mɨpaɨ katiniutahɨawe:

—'Ukaratsi keneta'ini.

Ti'uximayatsiriwame mɨpaɨ katinitahɨawe, hikɨ 'ana mɨkɨ kaninuani. 13 Hikɨ 'Eritseu Kihetsi mɨpaɨ katiniutahɨawe:

—'Ukaratsi mɨpaɨ ketinetahɨawi: “Waɨkawa pepɨ'a'uximatɨa tahetsiemieme. ¿Kenetiyurieni 'ahetsiemieme? ¿Matinake xɨka ti'aitame yatɨni kuyaxi tiwa'aitɨwame 'ahetsiemieme ne'utahɨawe?”

Peru 'ukaratsi mɨpaɨ kaniutayɨni:

—Ne 'aixɨa 'iyari nepuyeika neteɨterima watsata.

14 Hikɨ 'Eritseu Kihetsi mɨpaɨ katiniuta'iwawiya:

—¿Kenetiyurieni hetsiena mieme?

Ti'uximayatame mɨpaɨ kaniutayɨni:

—Mɨkɨ tɨɨri pɨkawarexeiya meta kɨnaya 'ari kani'ukiratsitɨni.

15 'Eritseu mɨpaɨ kaniutayɨni:

—Keneta'ini.

Kihetsi kaneita'inieni, mɨkɨ 'ana kitenie kaniutakeni. 16 Hikɨ 'Eritseu mɨpaɨ katinitaxatɨani:

—Yurika 'epauka nunutsi pekanexeiyakamɨkɨ.

'Ukaratsi mɨpaɨ katinita'eiya:

—Hawaikɨ, neti'aitɨwame, 'ekɨ tewi Kakaɨyari hetsɨa pemumieme. Hawaikɨ ne matsiparewiwame pepɨkaneti'itaiyaneni.

17 Mɨpaɨ katiniuyɨni, mɨkɨ 'ukaratsi kaniutihukata. Kemɨrahɨawarɨwakai yurikatsiena mɨkɨ tukaritsie kaniutiniweni, 'Eritseu kemɨrehɨawekai.

18 Nunutsi kaniutawere, heiwa yupaapa hetsɨa kanekuyeixɨani, mɨra'uximayatsiekaitsie meyeikakai. 19 Hikɨ yapauka mɨpaɨ yupaapa katiniutahiwieni:

—'Ai nemu'u. Nemu'u pɨnetsi'ukukuine.

Paapaya xeime tiyu'uximayatsiriwame mɨpaɨ katiniuta'aitɨani:

—Maamaya hetsɨa kenetuamie.

20 Ti'uximayatame kaneitɨni maamaya hetsɨa paitɨ, hikɨ yutunutsie heikukwekaku tuka kanaye'ani, 'ana nunutsi kaniumɨni. 21 Hikɨ maamaya kananutiyani yukii heima tewi Kakaɨyari hetsɨa mieme 'utayatsie yuniwe kanateni, kitenie reunaka kaniwayeyani. 22 Hikɨ yukɨna kaniutahiwieni mɨpaɨ katinitahɨawe:

—Xeime ti'uximayatame keneneuniɨtɨa meta puxu 'ukaratsi, tewi Kakaɨyari hetsɨa mieme kie nekanimieni, kwitɨwata nekaninuamɨkɨ.

23 Kɨnaya mɨpaɨ katinita'iwawiya:

—¿Titayarikuta hikɨ kwitɨwa hetsɨana petimie? Metseri hekwame 'ixɨarariyari pɨkahɨkɨ meta 'uxipiya tukari.

Mɨkɨ mɨpaɨ katiniuta'ani:

—Tsepatsɨ.

24 Hikɨ 'ana puxu kaniutixiratɨani meta ti'uximayatame mɨpaɨ katiniutahɨawe:

—Hikɨmɨ xeiya tepɨyehu teka'uxipietɨ, kepaukake yanemetayɨni.

25 Merikɨte 'ukaratsi kanayeyani, Kaximeru hɨriyaritsie paitɨ kaniye'ani, 'Eritseu manukateitsie paitɨ, tewi Kakaɨyari hetsɨa mieme. Hikɨ mɨkɨ kanixeiya 'ateewa hamiekame. 'Ana yuparewiwame Kihetsi mɨtitewa mɨpaɨ katiniutahɨawe:

—Neuxei. Huma pamie 'ukaratsi Tsunemi kiekame. 26 Xeiya kenenakimie, keneta'iwawiya mɨkɨ 'aixɨa kapɨreu'erie, nu'aya meta kɨnaya 'aixɨa mekapɨtehaka'iyuniwa.

Ti'uximayatame kaneikunake, 'ukaratsi kename yunaitɨ 'aixɨa meteheu'erie kaniutayɨni. 27 Kepauka hɨritsie paitɨ munua tewi Kakaɨyari hetsɨa mieme manukateitsie, 'ɨkateyatsie kanikawiere. Kihetsi hurawa 'uyaka kaneikuhanakekaitɨni, peru tewi Kakaɨyari hetsɨa mieme mɨpaɨ katinita'imaiya:

—Kenehayewani. Waɨkawa puyuhiwerie meta Yawé kanetinanukanamirieka kemɨreyɨ, 'akuxi 'atsipɨkanetitahɨawiwe.

28 Hikɨ 'ukaratsi mɨpaɨ kaniutayɨni:

—Neti'aitɨwame, ¿nekuta 'ekɨ nunutsi nemetiutawawiri? ¿Tamɨ mɨpaɨ nekarainekai kename pekaneti'itaiyanenikekai?

29 'Eritseu Kihetsi mɨpaɨ katiniutahɨawe:

—Keni'akuha'aritɨaka, ne'itsɨ kenakwetɨ kenemie huyeta. Xɨka xeime pehanukunake, pepɨkaheiwaɨritɨaka, xɨka xewitɨ matsihahɨaweni, pepɨkaheiku'eiyani. Kepauka pemeta'ani, mɨkɨ 'itsɨ nunutsi nierikayatsie kenateka.

30 Peru nunutsi maamaya mɨpaɨ kaniutayɨni:

—Ne yurikɨ mɨpaɨ nekanaineni Yawé mayeyurikɨ meta 'ekɨ, ne nekie nepɨkahakunuani xɨka pekanetsiheweiya.

Hikɨ 'ana 'Eritseu kananukukeni kaneyani hamatɨana. 31 Kihetsi meri manuyehaitɨakai nuaka nunutsi nierikayatsie 'itsɨ kaniutiteni, peru 'ikɨ pɨka'utaniu meta pɨka'ukuyuaxɨa tixaɨtɨ 'inɨari pɨkatiuyuri. 'Ayumieme, Kihetsi 'Eritseu kaniwarekunake mɨpaɨ katinitahɨawe:

—Nunutsi pɨkahekuyuane pɨkahanutaneniere.

32 Kepauka 'Eritseu wakie munua, nunutsi mɨkime kaniutaxeiya, 'utatsie 'akakaikame. 33 Kiita hautahaka, nunutsi muyekatei, kitenie reunaka Yawé kaniutahɨawe. 34 Hikɨ 'utatsie hautiyaka nunutsi hetsie kanahuni tetana keneikahɨtsieni, meta mamateyatsie kawɨtɨ, kepaukake nunutsi mutaxɨrixɨ. 35 Hikɨ 'Eritseu 'anukukeka kaniutiyatɨyani kiita yeyeikatɨ, kwitɨta nunutsi hetsie kaneutihuni, 'anakeri 'atahutamexɨa nunutsi kaniutakuku meta yɨhɨxite kanutayepiexɨani. 36 Hikɨ 'Eritseu Kihetsi mɨpaɨ katiniutahɨawe:

—Maamaya kene'inimie.

Kihetsi katineikuxatɨani, kepauka 'ukaratsi munua, 'Eritseu mɨpaɨ katinitahɨawe:

—'Ari 'aniwe kenawitɨtɨri.

37 Mɨkɨ hautahaka, 'Eritseu 'ɨkayatɨa kaniukahɨximakeni pamɨpariyutsi 'ipitɨanike. Hikɨ 'anake yuniwe 'awitɨtɨ kaneyani.

38 Merikɨtsɨ 'Eritseu Kirikari kaninuani 'ana mana kanihaakaxatɨkaitɨni mɨkɨ kwieyaritsie. Mana kiekatari Kakaɨyari niukametemama wahamatɨa kaniuyuhayewa, hikɨ 'Eritseu tiyu'uximayatsiriwame mɨpaɨ katiniuta'aitɨani: «Xari 'amɨnena mana taipa keneuyeyeka 'itsari keneukawewi Kakaɨyari niukametemama memɨtekwanikɨ».

39 'Ana, xewitɨ wa'iwa kanayeyani yeuta tupiriya heupimieka, muwa 'iteɨri yeuta mieme kanetaxeiya hikɨ waɨkawa 'ikwaxiyari kaneka'inɨni kaneitahɨniya yukamixatsie. 'Akunuaka kanitixiteni yapepeme mɨkɨ 'itsarita kaneikaxɨrieni 'atsikatimaitɨ tita mɨtihɨkɨtɨkai. 40 Kepauka 'ikwai makatuariexɨa, kepauka teɨteri memekwaixɨa, mɨpaɨ mekateniuhiwa:

—Neuxei, tewi Kakaɨyari hetsɨa pemumieme, 'ikɨ 'ikwai pu'uayema.

'Ana mɨkɨ mepɨka'uyɨwekaxɨa memikwanikɨ. 41 Hikɨ 'Eritseu mɨpaɨ kaniutayɨni:

—Tɨriku harinayari xekenatu'i.

Hikɨ harina 'itsarita heukawiwiekari, mɨpaɨ kaniutayɨni:

—Teɨteri xekeniwarakatu'iriexɨari memɨtekwanikɨ.

'Anari 'aixɨa 'iyari mepɨte'ukwai, tawari mepɨkate'utikwikwinixɨ.

42 Xewitɨ Wahari-Tsaritsa heyeyaka kaninuani paa ha'ɨtɨ, tewi Kakaɨyari hetsɨa mieme tikutuirienetɨ 'ikwaxi mexɨakame timieme: xeitewiyari tsewara payari meta tɨriku takariyari hehekwame. 'Eritseu yuparewiwame mɨpaɨ katiniutahɨawe:

—Ketiniwarumikwa teɨteri.

43 Ti'uximayatsiriwame mɨpaɨ kaniutayɨni:

—¿Kenetiwamini teɨteri xeitsienituyari memɨhɨkɨ?

Peru 'Eritseu mɨpaɨ katinitahɨawe:

—Teɨteri ketiniwarumikwa, Yawé mɨpaɨ kanaineni: “Mekatenikwaikuni meta waɨkawa katiniyuhayewamɨkɨ”.

44 Hikɨ ti'uximayatame paa kaniwarumini, Yawé kemainekai, teɨteri mekateniukwani meta waɨkawa katiniuyuhayewa.