1 Merikɨtsɨ Nahamani, Tsiriya kwieyaritsie ti'aitame kuyaximama wa'ukiyari kanihɨkɨtɨkaitɨni, mɨkɨ tewi waɨkawa mɨtiyunaki'erie, ti'aitame waɨkawa pinaki'eriekai, mɨkɨ 'iparewiekaku Yawé mipitɨakaikɨ mɨrayu'iwakɨ yumienetɨ. Mɨkɨ kuya mɨkama kanihɨkɨtɨkaitɨni, peru nawi kwiniyayari kanexeiyakaitɨni.

2 Merikɨtsɨ heiwa kuyaxi tsiriyutsixi mekanayekɨkakaitɨni meku'uwatɨ metekunawatɨwetɨ, 'ana 'uka 'ɨimari 'Ixaheri kiekame mekaniunawani, mɨkɨ Nahamani 'ɨyaya ti'uximayatsiriwame mekanayeitɨani. 3 Heiwa mɨkɨ 'uka mɨti'aitɨa mɨpaɨ katiniutahɨawe: «'Aixɨa pɨyɨnikeyu neti'aitɨwame Kakaɨyari niukameya Tsamariya kiekariyaritsie meka hetsɨa xɨka heuyani, mɨkɨ 'aixɨa kaniyuriweni kemɨtikuye yunawiyaritsie».

4 Hikɨ Nahamani 'uka 'Ixaheri kiekame kemainekai ti'aitame mɨpaɨ katiniutahɨawe. 5 Tsiriya kwieyaritsie ti'aitame mɨpaɨ katinita'eiya:

—'Aixɨa kani'aneni kenemie, neta 'Ixaheri kwieyaritsie ti'aitame xapa nekananunɨ'airiemɨkɨ.

Hikɨ 'ana Nahamani kaneyani, haika tsienituyari heimana huta tewiyari kiruyari raheteme pɨrata ha'ikatatɨ meta haika tewiyari heimana 'atahaika kiruyari raheteme huru meta tamamata kemarite. 6 Xapa 'Ixaheri kwieyaritsie ti'aitame mehuriyarie mɨpaɨ katine'ukaitɨni: «Kepauka xapa 'ahetsɨa meye'ani, kemɨ'ane mɨmatsihe'atɨiri Nahamani kanehɨkɨtɨni, mɨkɨ nekuyaxima wa'ukiyari kanihɨkɨtɨni. Nekamanenɨ'airieni nawi kwiniyayari kemɨrexeiya 'aixɨa 'aneme pemayeitɨanikɨ».

7 Xapa hakaterɨwaka, 'Ixaheri kwieyaritsie ti'aitame yukamixa kaneukatsana meta mɨpaɨ kaniutayɨni: «¿Nekuta Kakaɨyari netihɨkɨ? Ne nepɨkayɨwe xewitɨ mɨmɨnikɨ mexɨkatɨni manutanierekɨ nemipitɨani. ¿Titayari mɨkɨ netiwawirie nawi kwiniyayari mexeiya 'aixɨa 'aneme pemayeitɨanikɨ? Kaukatɨ mɨkɨ haxɨa mekuwautɨwe xeikɨa tahamatɨa».

8 'Eritseu, tewi Kakaɨyari hetsɨa mieme, kepauka mɨtiutamari kename 'ixaheritsixi tiwa'aitɨwame yukamixa haukatsanakai, niuki kaneinɨ'airieni mɨpaɨ haineme: «¿Ketitayari waɨkawa peti'a'uximatɨa? 'Ekɨ mɨkɨ tewi kenenanɨ'airi, yamɨretimanikɨ kename Kakaɨyari niukameya 'a'uyeika 'Ixaheri kwieyaritsie».

9 Hikɨ Nahamani kaneyani 'Eritseu kie yuteɨterima warawitɨtɨ yukawayutsixi meta yukaxetate mewarahapatɨ, hikɨ kiiya kiteniena hɨxie mekaniu'axɨani. 10 Hikɨ 'Eritseu ti'uximayatame yuhetsɨa mieme kanenɨ'ani mɨpaɨ mɨreitahɨawekɨ: «Kenemie 'atahutamexɨa kenekahaki Kurutani hatuxameyaritsie, 'ana 'anawiyaritsie 'aixɨa pe'anetɨ pekanayeimɨkɨ meta pe'itiyatɨ pekanayeimɨkɨ».

11 Hikɨ Nahamani ha'atɨ kaneyani mɨpaɨ 'utaitɨ: «Ne mɨpaɨ nepɨtiku'eriwakai tewi Kakaɨyari niukameya wayeyanike nepɨ'eriekai netsi'anunakeke, Kakaɨyari Yawé tawawirienike, meta nehetsɨa hatametɨ newaiyari 'anayehɨanike nepɨ'eriekai. 12 ¿Matsi Ramatsiku hayari 'Awaná meta Paripaxi hatuxameyarite kari 'aixɨa pɨka'anene keyuri haa 'Ixaheri kwieyaritsie mieme? ¿Kari mana nemeyukahauxini pɨkaheyɨwe hikɨ 'aixɨa nemɨyɨnikɨ?» Hikɨ ha'atɨ kaneyani yu'ɨtɨma.

13 Merikɨte 'iparewiwamete hurawa mekanewakɨne mɨpaɨ mete'itaxatɨanike: «Tati'aitɨwame, xɨka Kakaɨyari niukameya kwaniwemekɨ mereta'aitɨanike. ¿Tamɨ yapekatikayeiwe? Matsi 'aixɨa kani'aneni hikɨ xɨka xeikɨa pekahamɨkɨ hapa, 'ana mɨpaɨ pe'itiyatɨ pekanayeimɨkɨ». 14 Hikɨ Nahamani Kurutani hatuxameyaritsie kaneyani, mana 'atahuta mexɨa kaniukahani, tewi Kakaɨyari hetsɨa mieme kemɨtitahɨawekai. 'Anake nawiyarieya 'aixɨa kaniuyɨni nunutsi nawiyarieya hepaɨ, 'ana 'itiyatɨ kanayani. 15 'Aixɨa 'anetɨ Namahani, kaninuani yunaime memeweiya warawitɨtɨ, tewi Kakaɨyari hetsɨa mieme hɨxie 'uwetɨ, mɨpaɨ kaniutayɨni:

—Hikɨ mɨpaɨ nepɨretima pumawe Kakaɨyari naitsarie kwiepa, 'Ixaheri kwieyaritsie xeikɨa payexeiyarie yuri Kakaɨyari. Merikɨ yemekɨ keneutanaki'eri 'ekɨta ne'imikieri.

16 Hikɨ 'Eritseu mɨpaɨ kaniutayɨni:

—Yurikɨ mɨpaɨ nekanaineni Yawé mayeyuri hɨxie 'anemuyeikakɨ, kemɨ'ane nemɨti'uximayatsirie, ne tixaɨtɨ nepɨkaranupini.

Tsepa waɨriyarika mɨtiyexatɨakai Nahamani, 'Eritseu pɨkatitanaki'eriri.

17 Hikɨ Nahamani mɨpaɨ kaniutayɨni:

—Kamɨtsɨ, 'ekɨ keneneupitɨa huta 'ikayari kwie nemanu'ikatakɨ 'ena mieme, hikɨri 'enamɨtiyehane ne ti'a'uximayatsiriwame tawari kakaɨyarixi mawari taiyariyari meta hipame mawari nepɨkawawewirieni, matsi Yawé hetsiemieme xeikɨa. 18 Kepauka mana neti'aitɨwame, Ximuni tukieyata yukakaɨyari meuhɨawimie nemamatsie 'ana kaniyukɨtɨrɨkariyani, ne mɨpaɨ nepɨtimaika waɨriyarika pɨnetsipitɨaka nemakatutsirekɨ, 'ayumieme Yawé mɨpaɨ nepɨrahɨawe kenereuyehɨwirieka mɨkɨ tukita nemɨtitunumakenikɨ.

19 'Eritseu mɨpaɨ katinitahɨawe:

—Kenemie 'atsipekati'akɨhɨawetɨ.

Hikɨ 'ana Nahamani kaneyani, 'ariri yateewa peumiekai, 20 kepauka 'Eritseu tewi Kakaɨyari hetsɨa mieme parewiwameya Kihetsi mɨpaɨ pɨtiu'eri: «'Eritseu neti'aitɨwame waɨkawa 'aixɨa pɨtiuka'iyari, 'ikɨ Tsiriya kiekame Nahamani nitixaɨtɨ pɨkatitanaki'eriri ketita mɨtixatɨakai. Peru ne mɨkɨ nepenukuweiya, heiwatɨ tixaɨtɨ neremini. Yurikɨ mɨpaɨ nepaine Yawé 'amuyeikakɨ mayeyuri».

21 Hikɨ Kihetsi kaneyani Nahamani 'anuku'axeke. Kepauka mɨkɨ mixei 'utɨmana 'unautsarɨmekaku, yukaxetatsie kananakayani 'itahɨaweke, mɨpaɨ katinita'iwawiya:

—¿Kereyɨ?

22 Kihetsi mɨpaɨ katinita'eiya:

—Hawaikɨ 'atsipɨkareyɨ. 'Eritsehu neti'aitɨwame kaneneyenɨ'ani mɨpaɨ nemɨmatitahɨawekɨ: “Yuhutatɨ temari mekaniu'axɨani Kakaɨyari niukametemama 'Epɨrahini hɨriyaritsie mehakanexɨaka. Nepɨmatsiwawirie mɨkɨ wahetsiemieme, haika miriyayari pɨrata tuminiyari meta hutame kemariteyari”.

23 Nahamani mɨpaɨ kaniutayɨni yuwaɨriyatɨ mitanaki'erienikɨ:

—Neuxei, 'ataxewi miriyari pɨrata tuminiyari kenatɨtɨ.

Hikɨ huta kuxitariyarita kanikayatsirieni pɨrata meta hutame kemariyarite, 'ikɨ tinaime yuhutame te'uximayatamete katiniwarutɨtɨani Kihetsi memɨtehanutɨkirienikɨ. 24 Kepauka memuta'axɨa yemuri mematitekaitsie, Kihetsi mɨkɨ huta kuxitariyari kaniuti'awieta yukiita, hikɨ 'ana kaniwarutateutɨani mɨkɨ teɨteri tsiriyutsixi Nahamani hetsɨa mekanekɨne. 25 Merikɨte Kihetsi 'Eritseu hetsɨa kaninuani. 'Eritseu mɨpaɨ katinita'iwawiya:

—¿Kihetsi hakewa pepanutɨa?

Kihetsi mɨpaɨ katinita'eiya:

—Matsi hawaikɨ nepɨkahanumie ne mati'uximayatsiriwame.

26 Peru 'Eritseu mɨpaɨ katinitahɨawe:

—Ne mana ne'iyari kaniuyeikakaitɨni, kepauka 'iya manakatɨatsie yukaxetatsie, mɨmatsitahɨawekɨ. 'Ikɨ tukaritsie pɨkaheuyewetse temɨtehanupinenikɨ, pɨrata, kemarite, harawerite, muxatsi, tuurutsixi kwietsanamete, meta teɨteri te'uximayatamete 'ukitsi 'ukari. 27 Hikɨ Nahamani nawi kwiniyayari mexeiyakai pehexeiyatɨ pekanayeimɨkɨ meta yunaitɨ 'anuiwarite wahetsie katininakimɨkɨ yuheyemekɨ.

Hikɨ Kihetsi 'amɨranuyetɨa 'Eritseu hɨxie, peixeiyakai nawi kwiniyayari 'ɨwi mutuxa hepaɨ peu'anekai.