1 Merikɨtsɨ Kakaɨyari niukametemama 'Eritseu mɨpaɨ mekateniutahɨawe:

—'Ekɨ pekaniniereni, hikɨ 'ena temakuteitsie 'etsikanakuyeuka tahetsiemieme. 2 'Aixɨa pɨ'ane xɨka tehekɨne Kurutani paitɨ. Mana kɨyexi pexɨawe, kii tepetawewieni muwa temayetenikɨ.

'Eritseu mɨpaɨ katiniuta'ani:

—'Aixɨa pɨ'ane, xekenehu.

3 Peru xewitɨ mɨkɨ wa'iwa mɨpaɨ 'Eritseu katiniutahɨawe:

—Ketananuteɨta, tame mate'uximayatsiriwamete.

'Eritseu mɨpaɨ kaniutayɨni:

—Nekanimieni.

4 Hikɨ wahamatɨa kaneyani, kepauka Kurutani memuta'axɨa 'ana kɨyexi mekaniutiwiteni. 5 Hikɨ xewitɨ Kakaɨyari niukameya xeime kɨye hawitekekaku hatsa kananutihɨne hatuxametsie kaneukaweni.

Hikɨ mɨpaɨ katiniuhiwa:

—Neuxei neti'aitɨwame, mɨkɨ hatsa pɨkanepinitɨkai.

6 Tewi Kakaɨyari hetsɨa mieme mɨpaɨ katinita'iwawiya:

—¿Hakewa peukawe?

Kepauka mitaxatɨa hakewa meukamiekai hatsa, hikɨ 'Eritseu kɨye mamayari kanawiteni, muwa kaneikahɨani 'ana hatsa kananuyewiere haa heima.

7 'Eritseu mɨpaɨ kaniutayɨni:

—Kenanatitu'i.

Hikɨ yumama 'utatseraka kanenatituni.

8 Merikɨtsɨ Tsiriya kwieyaritsie ti'aitame 'Ixaheri kwieyaritsie ti'aitame hamatɨa kaniyumienekaitɨni, hikɨ 'iparewiwamete wahamatɨa tiutixataka, mɨpaɨ katiniwarutahɨawe: «Hikɨmɨ mana tekanekuyaxikuni». 9 Peru tewi Kakaɨyari hetsɨa mieme 'ikɨ niuki 'Ixaheri kwieyaritsie ti'aitame kanenɨ'airieni: «Keneyukweriwayurieka mana pepɨka'ayeyeikani, mana tsiriyutsixi mekamanihupieka». 10 Merikɨte 'Ixaheri kwieyaritsie ti'aitame yukuyaxima mana kaniwarenɨ'ani memɨtehetimanikɨ tewi Kakaɨyari hetsɨa mieme hakewa mexatakai. Mɨixamexɨa tawari 'Eritseu 'Ixaheritsie ti'aitame mɨpaɨ katinayehɨtɨani, hikɨ mɨkɨ mɨpaɨ katiniyukweriwayuriekaitɨni. 11 Tsiriya kwieyaritsie ti'aitame, ha'atɨ mɨyamɨtiyɨanekaikɨ, kuyaximama tewa'aitɨwamete waruta'inieka mɨpaɨ katiniwarutatieni:

—Yaxekeneteneutahɨawi, ¿kemɨ'ane tahetsɨa miemetɨtɨ 'Ixaheri kwieyaritsie ti'aitame yapɨtikuxaxatɨwa?

12 Mɨkɨ wa'iwa xewitɨ mɨpaɨ kaniutayuni:

—Neti'aitɨwame, nixewitɨ. 'Eritseu kanihɨkɨtɨni Kakaɨyari niukameya 'Ixaheritsie meyeika. Mɨkɨ naime 'Ixaheri kwieyaritsie ti'aitame yakatinikuxaxatɨwani, metatsiere naime 'ekɨ ti'aitame kepemutaine 'awie pemuyehuputsie.

13 Hikɨ ti'aitame mɨpaɨ katiniuta'aita:

—Kamɨtsɨ xekeneuti'iwau hakewa meyeika, mana nemɨtitanɨ'anikɨ mɨwiyarienikɨ.

Kepauka mɨtiutaxatɨarie kename Rutani 'Eritseu heyeikakai, 14 hikɨ ti'aitame mana kaniwarutanɨ'ani yuwaɨkawa kuyaxi kawayutsixi wahetsie me'utekame meta kaxetate kuyaxa miemete. Kiekari warita mekana'utɨkɨne yɨwikɨta mehaye'axɨaka. 15 'Uxa'arieka ximeri tewi Kakaɨyari hetsɨa mieme ti'uximayatsiriwameya kananukukeni, hikɨ kuyaxi kawayutsixi wahetsie me'utekame meta kaxetate kuyaxa miemete kiekari warita kaniwaruxeiya. Ti'uximayatame mɨpaɨ kaniutayɨni:

—Neuxei neti'aitɨwame, ¿keri teyɨaka?

16 'Eritseu mɨpaɨ katinita'eiya:

—Hawaikɨ pepɨkamaka. Memɨtatsinɨ'ɨ matsi mekaniyuwaɨkawani mɨkɨ 'etsimekaniyupaɨmeni.

17 Hikɨ 'Eritseu mɨpaɨ katiniuyutanenewieni: «Yawé, Kihetsi kenanutanieritɨa ti'uximayatame mɨnierekɨ». Yawé mɨpaɨ katiniuyurieni, hikɨ ti'uximayatame kaniwaruxeiya yemuri 'etsimupetsie kawayutsixi tai hepaɨ meteyuxexeiyame meta kaxetate yaxeikɨa meteyuxexeiyame mehakutsekame 'Eritseu wawarita. 18 Kepaukari 'ahurawa memahukai tsiriyutsixi, 'Eritseu kanitsutɨani yunenewietɨ: «Yawé 'aku, 'ikɨ teɨteri keniwarakɨpiriyaxɨa». Yawé yakatiniuyurieni 'Eritseu kemɨtitawawiri.

19 Hikɨ 'Eritseu mɨpaɨ katiniwarutahɨawe: «'Ikɨ kiekari pɨkahɨkɨ hakewa xemeukɨnekai, xeime huyeyari pɨta xekananukuweiya. Hikɨmɨ xekenenanuweiya ne nekanixe'anuwitɨmɨkɨ hakewa tewi xemikuwautɨwe meyeika». Peru mɨkɨ Tsamariya pɨta kaniwarewitɨni. 20 'Ari kiekaritsie mehautahaxɨaku, 'Eritseu mɨpaɨ kaniutayɨni: «Yawé, keniwaranutanieritɨa meheunenieretɨ memakɨnekɨ». Yawé mɨpaɨ katiniuyurieni, mɨkɨ memauyutamaixɨa Tsamariyatsie paitɨ mekaniyɨakaitɨni. 21 Kepauka 'Ixaheri kwieyaritsie ti'aitame mɨwaruxei, 'Eritseu mɨpaɨ katiniuta'iwawiya:

—Neti'aitɨwame, ¿netiwakwini? ¿Netiwakwini?

22 'Eritseu mɨpaɨ katinita'eiya:

—Hawaikɨ, pepɨkawakukukuyani. ¿'Ekɨ kuta 'a'ixiparakɨ meta 'a'ɨrɨkɨ petiwarutiwi, titayari petiwakwimɨkɨ? 'Aixɨa pɨyɨni matsi 'ikwai meta haa ketiniwakupiniri memɨtekwanikɨ meta memanuharenikɨ, meta keniwarupitɨata memakunuaxɨanikɨ hakewa tiwa'aitɨwame meka.

23 Hikɨ 'ixaheritsie ti'aitame waɨkawa 'ikwai katiniwaruta'aitsirieni. Kepauka memɨte'utahayewaxɨ metekwatɨ, kaniwarutateutɨani 'ana mɨkɨ tiyu'aitɨwame hetsɨa mekanekɨne. Mana mɨtiyehane tsiriyutsixi tawari 'Ixaheri kwieyaritsie mepɨkaheutahaxɨa yɨkɨmana metekunawatɨwetɨ.

24 Yapaɨmexɨa wiyari 'anukayaku, Weni-'Arari Tsiriya kwieyaritsie ti'aitame, yukuyaxima yunaime kaniwarukuyuitɨani Tsamariya kiekariyari warita memayaxetɨkɨnekɨ. Xewitɨ meutahani meta muwayeyani pɨkayɨwekai, hikɨ 'ikwai mekateniuxɨni. 25 Mɨixa tukari memukunamiekaikɨ waɨkawa haakaxa kaniutixuawere, 'ayumieme mana puxu mu'uya kaninanaiyakaitɨni xeikiruyari pɨrata tepɨayarikɨ meta kukuruxi wamiri xeiwatsuyari haika tewiyari kɨramuyari.

26 Heiwa, ti'aitame kiekari kuraruyari 'amatayewatsie 'uyeikakaku, 'ukaratsi xewitɨ mɨpaɨ katinitahiwieni:

—Neti'aitɨwame, ketaneutawikweitsitɨa.

27 Ti'aitame mɨpaɨ katiniuta'ani:

—Xɨka Yawé kamatsiwikweitsitɨamɨkɨni, ¿ne matsi kenetiyɨwe? tɨriku nepɨkahexeiya meta winu ne nemɨmatsiminikɨ. 28 ¿Titakɨ kuta nemetiparewienikeyu?

'Ukaratsi mɨpaɨ katinita'eiya:

—'Ikɨ 'ukaratsi mɨpaɨ kanetiniutahɨawe kename neniwe nekeyetuanike temitakwanikɨ hikɨ, meta 'uxa'arieka 'ikɨ niweya temɨtakwanikɨ. 29 Merikɨte neniwe teniuka'etsa tekanitakwani, peru 'uxa'ariekatsie kepauka nemitawawiri nu'aya miyetuanikɨ temitakwanikɨ, peru mɨkɨ yuniwe puti'awietakairi.

30 Hikɨ 'u'enaka 'ukaratsi kemɨtiuyuriekai, ti'aitame yukamixa kaneukatsana hiwerikakɨ. Hikɨ tawari kuraru 'amatayewatsie heima kanikuyani, 'ana teɨteri mekanixeiya kuxitari 'ixurikiyari 'anakatɨkɨme, hiwerika kamixayari. 31 Hikɨ ti'aitame ha'atɨ mɨpaɨ kaniutayɨni: «Yawé pɨkanereuyehɨwirieka yuheyemekɨ xɨka hikɨ 'Eritseu mu'uya neka'anutiwiteni Tsapati nu'aya».

32 Mexi 'Eritseu yukiita hayekatei 'ixaheritsixi wa'ukiyarima wahamatɨa, ti'aitame tewi xeime kanenɨ'ani meimienikɨ. Mexi kanuawekai, 'Eritseu 'ukirawetsixi mɨpaɨ katiniwarutahɨawe:

—Hikɨ xekaninenierikuni tiyumiekame xeime kemɨtiutanɨ'a nemu'u manutiwitenikɨ, kepauka mɨkɨ nɨ'ariekame munuani, kitenie 'itupariyari 'aixɨa xeketeneunama para mɨkawatahakenikɨ. 'Ari tekani'enieka ti'aitame yuariyaya 'ukanamieni tiyumiekame 'utɨma.

33 'Eritseu 'akuxi tikuxatakaku kaninuani nɨ'ariekame mɨpaɨ kaniutayɨni:

—'Ikɨ 'uximatɨarika Yawé hetsɨa kanimiemetɨni. 'Ari tatsitawikweitsitɨanike tawari nepɨka'erie.