10
Mɨtimaiwekɨ 'ɨxatsiyari
1 Xaipɨtsi memɨkwikwi'i 'axamekaniu'ɨatɨkani,
tita witsimɨtiu'ɨa katinanuyeitɨwani.
Mɨpaɨ katinimatsiɨkɨni xɨka 'etsiwa mɨkayɨkɨhɨawe pe'ayani,
pɨkayɨwe muyutaxewire mɨtimaiwenikɨ meta 'aixɨa mɨtixeiyariekakɨ.
2 Mɨtimaiwe katinikuwauneni tita 'aixɨa mɨti'ane yu'iyaritsie,
matsi 'atsimɨkatimate katinikuwauneni 'axamɨti'ane.
3 Meta huye'utɨa kemɨtimie 'atsimɨkatimate waɨkawa katineiyehɨaka mɨretimanikɨ, 'anari yunaitɨ mɨpaɨ mekatenetimaikuni kename 'atsikatimate.
4 Xɨka ti'aitame 'uyeha'ani 'ahepaɨtsita, pepɨka'iku'e'eiriwani ketitakɨ pemɨtihɨritɨarie. Petiukanewietɨ waɨkawa 'axapemɨtiuyurikɨ kani'ayumiemetɨni.
5 Xewitɨ kanixuaweni tita 'axamɨti'ane, te'aitamete meheuyexɨrɨwetɨ kememɨteyurie hepaɨ tiyuxexeiyatɨ: 6 'atsimɨkatimate matsi waɨkawa katinihɨritɨarieka timamariwawemekɨ, peru memɨyɨwawe matsi 'etsiwa xeikɨa mekatenihɨritɨarieka. 7 Nekaniwaxeiyanita waɨriyarika te'uximayatamete kawayutsixi wahetsie mekaniuteni te'aitamete wahepaɨ, teɨterita tewa'aitɨwamete yu'ɨkama mekaniku'uwani waɨriyarika te'uximayatamete wahepaɨ.
8 Putsu xɨka 'utawewieni,
muwa kaneukawemɨkɨ.
Kemɨ'ane 'ixumeri hixɨata 'akame mɨta'una,
kuu kanikeimɨkɨ.
9 Xɨka tetexi pe'utitara,
mɨkɨ tetexi kametinikwinitɨamɨkɨ.
Kemɨ'ane kɨye mawiteni,
mɨkɨ kɨyexikɨ katiniyukwinitɨaka.
10 Hatsa xɨka ka'ataxikaunini,
meta xɨka ka'etamɨani,
matsi karima katinewitekemɨkɨ.
Xɨka petimaimɨkɨni ketine'uximayaka 'aixɨa 'anekamekɨ,
petimaitɨ meta 'aixɨa peti'a'ɨwiyatɨ.
11 Xɨka kuu tiuyukeni meri 'akuxi kwikarikɨ kakewaiyariewetɨ,
tixaɨtɨ pɨkara'iwa 'ikewaiyame.
12 Kepauka mɨtimaiwe mɨtiwakuxaxatɨwa, teɨteri 'aixɨa 'anemekɨ mekani'enieka,
matsi kepaukata 'atsimɨkatimate mɨtikuxata, mɨkɨ xeikɨa kaniwaka'unani,
13 Matɨari mieme niukieya tixaɨtɨ pɨkatihɨkɨ,
'imatɨrieka 'aixɨa pɨkatinɨni 'atsimɨkatimatekɨ.
14 Matsi xewitɨ pɨkayɨwe yamɨtayɨnikɨ.
Xewitɨ pɨkatimate kemɨtiyɨni,
meta 'arikeke kemɨyɨni,
xewitɨ pɨkayuwe yamɨtayɨnikɨ.
15 Mɨka'uka'iyari kemɨti'uximaya yakɨ xeikɨa katiniyu'uxitɨaka,
meta kiekari huyeyari 'utɨma pɨkahemarie.
16 Xɨa'ui kiekari ti'aitame mɨkatseɨye mɨra'aitatsie, meta tewa'aitɨwamete
ximeri paitɨ mekanayatsarɨwani memɨtekwanikɨ.
17 Matsi witsikatinikɨhɨawarɨwani kemɨ'ane kiekaritsie ti'aitame 'aixɨa mɨti'uximaya,
meta te'aitamete kepauka memɨtekwa'a mauyewetsetsie,
waɨkawa memɨtitɨrɨkaxɨanikɨ memɨtarɨwekakɨ pɨkatixaɨ.
18 Mɨyu'ɨraxie kiiya heima mieme kananuka'unikeni,
mɨkatikumaɨwa kiiya kaniuhayeweni.
19 Paa kwatɨ kaniutanawemɨkɨ,
winu'ietɨ kaniyutemawiekamɨkɨ,
tuminita mitixɨtɨanikɨ kani'ayumiemetɨni.
20 Ti'aitame 'axapepɨkatikumamateni meta 'axapepɨkatiku'eriyani,
meta mɨxiku 'awie 'axapepɨkarahɨaweni,
wikixi muyuawitsie miemete mekaniyɨwaweni niuki memenɨtɨkirienikɨ.
Mekaniu'anani mekaniyɨwaweni memɨte'itaxatɨanikɨ.