11
1 Hata keneukahɨwa 'apaa,
yapaɨmexɨa tukari 'anukayayu 'ana keta pekanitaxeiyamɨkɨ.
2 Me'atahutame yatɨni me'atahaikame
ketiniwarumikwa tita pemɨrexeiya,
'atsipemɨkatimatekɨ tita 'uximatɨarikayari
'umɨramie 'ena kwiepa.
3 Haiwitɨri kepauka mayemanenitsie,
kwiepa wiyeri kanikaxɨriemɨkɨ.
Kɨye xɨka tatsutɨa hataweni,
yatɨni tayeta,
hakewa meutaweni mana kaniyuhayewamɨkɨ.
4 Kemɨ'ane 'eka xeikɨa mɨtaxeiya, pɨka'uka'etsa,
kemɨ'aneta haiwitɨri xeikɨa mɨtaxeiya mɨkɨta pɨka'uka'itsana.
5 Mɨpaɨ 'atsipemɨkatimatekɨ 'eka kemɨreumie, meta kehepaɨ memɨtekununuiwa tɨɨri yumamama wahukatsie, yaxeikɨata Kakaɨyari 'uximayatsikaya pepɨka'enie naime mɨtiutiwewi.
6 Ximeri paitɨ 'a'imɨari keneuka'etsa, taikaita 'uxipiya pepɨkahexeiyani, matsi 'atsipepɨkatimate ke'anetɨ 'etsiyari 'aixɨa mɨtiyɨni, xɨka 'iya yatɨni 'ikɨ, yamatsi naitɨ 'aixɨa 'anenetɨ pɨrayani.
7 Hekɨariya witsikani'aneni, 'aixɨata kani'aneni tau hekɨariyayari xeiyatɨ 'amuyeikani. 8 Xɨka tewi matsi mɨixa wiyari 'a'uyeikani hetsiena yutemawietɨ, matsi tukari tekeha'eriwani 'uximatɨarika mɨtixuaweretsie waɨkawa katiniyɨmɨkɨ, meta tita 'umɨramie 'ana yakɨ xeikɨa pɨkarayani.
Matsi'utawewi kena'eriwani
9 Hikɨ kene'atemawieka mexi petemaikɨ, 'a'iyari keneupitɨa mɨyutemawiekakɨ. Kemɨtiku'eriwa keneyeweiyani meta 'ahɨxitekɨ kepemɨtiuyukahiwe'erie, matsi kena'eriwani Kakaɨyari mɨkɨ naimekɨ kamenita'iwawiyamɨkɨ. 10 'A'iyaritsie haxɨa pepɨkapitɨaka, 'ahetsie tita 'axamɨti'ane ketinayeweiya, matsi temaikɨ yu'erietɨ meta temaikɨyari yakɨxeikɨa kanihɨkɨtɨni.