12
1 Kemɨ'ane matsi'utawewi kena'eriwani,
hikɨri pemɨtemaikɨ,
mexinetɨ tukari 'axamɨ'ane ka'aye'awe,
kepauka mɨpaɨ pemɨtayɨni:
«Pɨkanetsinakeri 'anemuyeikanikɨ mɨixa wiyari»,
2 matsi'utawewi kena'eriwani mexinetɨ mehekɨariwie
tau meta hekɨariya xuawe,
metseri meta xurawetsixi mehekɨariwie,
meta mexi haiwitɨri 'anuku'eke kepauka wiyeri mɨtitahayewatsie.
3 Tukari Kanaye'amɨkɨ kepauka kii hɨwemete memɨtiyɨyɨaka marikakɨ,
mekananakatutsirikuni yukukuyamete,
'anari mekatenihayewakuni tɨxɨmete memɨkayumɨirenikɨ,
'anarita mepɨkaneniereni, 'itupari 'etsi mayeyeutsie memaneniere.
4 Katinaunarirɨmemɨkɨ kitenie kaye 'utɨa mieme,
'anari kananukanuaximemɨkɨ murina yuariyaya,
wikixi yukwikari mekananukuhanikuni,
matsi wakwikari pɨtɨkini puka'enierieka.
5 Marika Kanitixuawerimɨkɨ hɨrite 'amanutitɨtɨtsie,
'anarita huyeta kaniumariwemɨkɨ.
'Arimenitɨra meta 'ana kanitixutuimɨkɨ,
'utsikari mekani'axɨakuni yumɨiretɨ,
mekanikakɨmikuni 'anari tixaɨtɨ tiyunaki'erietɨ pɨka'ayani,
tewi kaniyemieni kiekari 'emɨtiteriwetsie,
kaye'utɨa mekaniyexɨrietɨwekuni, meyuhiwerietɨ 'akaxari mexeiyatɨ.
6 Kena'eriwani kemɨ'ane matsi'utawewi,
mexi katatsaniwe pɨrata hɨiyameyari,
meta mexi katatariwe huru xariyari,
meta xari haa manakaxɨrɨwetsie katitawaxɨawe,
tsikɨrɨrɨiya katitarixɨawawe putsuta mɨiretɨ ka'ayeiwe.
7 'Anari kwiepa tumuanari kanayeimɨkɨ,
meripaitɨ mɨ'anekai hepaɨ,
'iyari kanakunuamɨkɨ Kakaɨyari hetsɨa,
mɨkɨ mana meiyenɨ'akɨ.
8 Ti'ɨkitame mɨpaɨ nekanaineni:
'ikɨ tukari tixaɨtɨ pɨkarexeiya,
naitɨ 'axakatini'aneni.
Niuki 'imatɨarieka mieme
9 Matsi waɨkawa timaiwetɨ, ti'ɨkitame teɨteri katiniwarutaxatɨani naime ketita mɨretima. Mɨkɨ naime katineutixeiyaxɨani yumarima, mɨireme temaiwawemete kememɨte'u'ɨxatsita waxapa kanayeitɨani. 10 Tsiepɨre hipame niukite kaniutaxeiya 'aixɨa 'anuyɨtɨkaime, mɨkɨta kaniti'utɨani yumarima yuri mainekɨ.
11 Memɨtemaiwawe waniuki tiyutseweme hepaɨ kani'aneneni. Kɨrapuxite 'aixɨa mɨretsunini hepaɨ mekatenikuxatani, xewitɨ xeikɨa tixaxatame tiwakuxaxatɨwakaku. 12 Ne matsi mɨkɨ hepaɨtsita nematsihaye'eritɨwa 'ekɨ neniwe nematsinaki'erie, waɨkawa xapate xɨka'utiwewieni pɨkayɨnɨrinɨa, meta xɨka pe'ititerɨwa pekaniti'uximɨkɨ waɨkawa. 13 'Imatɨarieka 'ikɨ niuki naitɨ kaniu'enierieni. Kakaɨyari matsi kenayemakaxeni, yaketinekamieni 'aitsikayatsie, 'ikɨ naitɨ tewi hetsie kanimiemetɨni. 14 'Uximayatsika matsi, 'axamɨ'anene meta 'aixɨamɨ'ane meta 'awie ketemɨteyurie Kakaɨyari naime kanita'iwaumɨkɨ.