Kwikari witsimɨ'ane
1
1 Tsarumuni kwikarieya xapayari.
'Uka mɨnaki'eriwa
2 Xɨka, penetsi'u'itsenike 'ateni kemɨtiyu'itsewekɨ,
matsi 'aixɨa pɨ'ane 'anaki'eriya, keyuri winu.
3 Witsimu'ɨata pemɨ'akawiriwa, yemekɨ puwanake,
'ekɨtɨtɨ pekanihɨkɨtɨni waritsamu witsimu'ɨa.
Kauka 'ayumieme 'ɨimarixi memenenaki'erie.
4 Kene'amexɨitɨaka, 'ahetsiemieme yemekɨ kenenayeitɨa.
Kenenanuwitɨki pemuyehuputsie, ti'aitame.
Wahamikuma
Tepuyutemamawieka ta'iyarikɨ teyunaitɨ,
tepiku'eriwani kepemɨti'amaɨwa keyuri winu.
Titakɨ mɨmatinaki'erieka panayuhayewa.
'Uka mɨnaki'eriwa
5 'Uka mɨyɨwi nepɨhɨkɨ, peru witsinepɨti'iɨmari,
'ukari 'aku Kerutsaremetari,
nekaniyɨwini Tseraxi teɨteriyari waxamaru hepaɨ,
witsinekatini'ɨimarika Tsarumuni 'ixuriki kiiyarieya hepaɨ.
6 Newaiyaritsie xepɨkanetsixeiyani nemɨyɨwikɨ,
tau nenawiyari mɨyakaniuyurieni.
Ne'iwama 'ukitsi mekaneniuyeheka,
kaxie haraweriyari 'ɨwiyariyarikɨ mekaneniuta'aitɨani waɨriyarika,
meta nekaxie 'aixɨa nepɨkatiɨ'ɨwiyaxɨ.
7 Kenetineutaxatɨa, 'uki nemɨmatsinaki'erie,
¿hakewa 'amuxatsima pepɨwaretihɨwe?
¿hakewa tuka pepɨwareti'uxipitɨwa?
¿Ne titayari netikuyeika xeikɨa,
'ahamikuma wamuxatsima wahamatɨa?
Wahamikuma
8 Xɨka 'atsipekatimaika, 'uka witsipemɨti'ɨimari 'ukari watsata pe'uyeikatɨ,
muxatsi waketate kemɨreuyuyune kenanukuweiya
meta 'atsipuri tɨɨrixi keniwahɨneni,
muxatsi wahɨwemete wakii maku'utsie.
'Uki mɨnaki'eriwa
9 'Ekɨ meta kepemɨreuyukuniɨtɨa, 'uka nemɨmatsi naki'erie,
Kawayutsixi nepɨwaraye'eriwa witsimemɨtehekɨniɨtɨarietɨka yumu'uyaritsie
Parahuni kaxetaya memuhaxime.
10 Witsipɨtiyuxexeiya 'a'aurite meta kepemɨti'akutsa'a.
'Akɨipi witsipɨtiutimerɨka 'akukakɨ.
11 'Anakɨtsa tepɨtiwewieni hurukɨ
meta pɨratakɨ.
'Uka mɨnaki'eriwa
12 Ti'aitame mexi mexatsie 'utika,
witsimu'ɨa nemɨnetawiri kaniɨkɨ'ɨareni hetsiena.
13 'Uki neminaki'erie, mixaxi witsimu'ɨa purutsata mɨyeka hepaɨ kani'aneni,
netawitsie kaneukukutsuni neheikukwekaku.
14 'Uki neminaki'erie, 'aukwe tuturiyari witsimu'ɨa hepaɨ kani'aneni
'Enikaritsie kaxie 'iteɨriyari hepaɨ.
'Uki mɨnaki'eriwa
15 Kwinimieme pepɨti'ɨimari, 'uka nemɨmatsinaki'erie.
Witsipepɨ'ane.
'Ahɨxite, kukuruxi memɨyuhuta wahepaɨ pɨtiyuxexeiya.
'Uka mɨnaki'eriwa
16 Kwinimieme pepɨtitemaikɨ, 'uki nemɨmatsinaki'erie.
Yemekɨ 'ekɨ pepɨnetsinake.
'Uki mɨnaki'eriwa
'Ɨxa mɨtsitsiɨrawi ta'itari kanayeimɨkɨ kepauka temɨyutiwitɨnitsie,
17 takii pikaxiyari kariuxa kanihɨkɨtɨni
Huku mɨxexeurawi xawarikɨ kananukakitsieka.