2
'Uka mɨnaki'eriwa
1 Ne tuutu Tsarunitsie mayeweri mɨxuawe nekanihɨkɨtɨni,
xewitɨ tuturi texuxuri mayeweritsie mieme.
'Uki mɨnaki'eriwa
2 'Uka neminaki'erie, kepauka hipame 'ukarawetsixi watsata muyeika,
tuturi texuxuri xuyatsata muwe hepaɨ katiniyuxexeiyani.
'Uka mɨnaki'eriwa
3 'Uki neminaki'erie kepauka hipame 'ukitsi watsata muyeika,
xikɨti*2:3 Manzana. 'ɨtsitsata mɨkawe hepaɨ katiniyuxexeiyani.
Kaneninakeni hetɨana nemɨ'etɨpieka,
witsikatinakakani takariyari.
4 Kanenewitɨni kiita 'ixɨarari muwatiwewiwatsie,
muwa yunaki'eriya 'inɨariyari kaniwarepitɨani.
5 Kaxie takari patsaruyarikɨ keneneutatɨrɨkariya,
manitsanakɨ keneneutahuxaitɨa,
nekanimɨximeni naki'eriyakɨ.
6 Mamaya 'utatana miemetsie nemu'u
mɨniuka'uxipitɨanike,
meta yutserieta miemekɨ kwimɨneniukwenike.
'Uki mɨnaki'eriwa
7 Ne mɨpaɨ nepɨtixewawirie, 'ukarawetsixi Kerutsareme kiekatari,
maxatsi 'ɨimarixi yeuta memu'uwakɨ,
'uka neminaki'erie xepɨkahehɨtɨaka xepɨkahei'uximatɨaka
tsepa kepaukake yukɨmana manutanierixɨ.
Hutariekamieme Kwikari
'Uka mɨnaki'eriwa
8 'Uki neminaki'erie hiwarieya.
Neuxei, 'ena kanamieni,
'utsunarɨmetɨ hɨritetsie,
'anutitsukwakatɨ hɨri 'amɨnenetsie.
9 'Uki neminaki'erie maxa hepaɨ katiniyuxexeiyani,
maxa temaikɨ hepaɨ kani'aneni.
Paratsɨ xekeneuxeiya, takiiwarie warita kaniutiweni,
'awienierenetɨ maxawariyarietɨkata,
yɨkɨ'ɨwiyatɨ mayexaxawata.
10 'Uki neminaki'erie mɨpaɨ kanetiniutahɨawe:
«Kenanukukexi 'uka nemɨmatsinaki'erie,
hikɨmɨ kenewaye'a, 'uka witsipemɨti'ɨimari.
11 Neuxei, kananuyeyaniri xexerixa,
hamatɨanata kaniutanɨni wiyeri.
12 Yeuta 'ari tuturi kanitineikani,
kwikari tukariyari kanaye'aniri.
'Ariri naitsarie kwiepa kani'eniɨriɨkɨni
kukuruxi memeɨyɨyɨxawi wakwikari.
13 'Ariri piní matɨari mieme takariyari kanixuaweni,
'Ari kaxie xututɨ witsikaniukɨ'ɨareni.
Kenanukukexi, 'uka nemɨmatsinaki'erie,
nehetsɨa kenaye'a, 'uka witsipemɨti'ɨimari».
'Uki mɨnaki'eriwa
14 Nekukuru pemeutuxa, 'ai mukatataritsie
pemuyu'awieta,
meta hɨri 'amɨtiumariwetsie paitɨ,
kenanieri nepɨmatsixeiya,
keneutaniu nepumatsi'enieni,
'aniuki 'aixɨa kanimayaka
meta witsipekatini'axexeiyani.
'Uki meta 'uka memuyunaki'erie
15 Kauxaitsi xekeniwarutiwiya,
mɨkɨ kauxaitsi tɨɨrixi
takaxie memɨtsewixima,
takaxie haraweriyari xuturiyari.
'Uka mɨnaki'eriwa
16 'Uki neminaki'erie nehetsiemieme kanihɨkɨtɨni, neta hetsiena mieme,
mɨkɨ yumuxatsima kaniwarutihɨweni tuturi texuxuritsata.
17 Tau ka'akayuniwekaku 'akuxi
meta 'etɨri ka'akumaweriwekaku 'akuxi,
nehetsɨa kani'axeni, 'uki neminaki'erie.
Maxa hepaɨ katiniunanautsani,
maxa temaikɨ hepaɨ, hɨritsie paitɨ.