3
1 Tɨkarikɨ, ne'itaritsie ne'ukaitɨ
'uki neminaki'erie nekaniutiwauni,
matsi nepɨka'itaxei.
2 Ne 'anukukeme nekaneyeikani kiekaritsie,
huye mayehapanetsie meta waɨkawa mɨrewatuiyatsie,
'uki neminaki'erie nekuwaunetɨ.
Ne'iwaunetɨ nepɨka'itaxeiyawe.
3 Mekaneniukaxexeyani
kiekaritsie tehɨwemete.
Mɨpaɨ netiwara'iwawiya:
«¿'Uki neminaki'erie hawaikɨ xekatehexeiya?»
4 Mɨya netiwaru'iwawiyakake nekanikaxeiya
'uki neminaki'erie.
Nekanitapa, neka'itatuayatɨ,
nemaama kie nekaneiwitɨkɨni,
kiita paitɨ hakewa nemaama mɨnetsiwatiniwexɨtsie.
'Uki mɨnaki'eriwa
5 Ne mɨpaɨ nepɨtixewawirie, 'ukarawetsixi Kerutsareme kiekatari,
maxatsi 'ɨimarixi yeuta memu'uwakɨ,
'uka neminaki'erie xepɨkahehɨtɨaka xepɨkahei'uximatɨaka
tsepa kepaukake manutanierixɨ.
Hairiekamieme Kwikari
Yunaitɨ mɨkwikarɨwa
6 ¿Titatihɨkɨ makumawetsie mɨretineika
kɨtsi 'amuweni hepaɨ tiyuxexeiyatɨ,
mixaxi meta 'ɨkwa witsimu'ɨa tsata,
meta waɨkawa witsimu'ɨatɨka nɨtɨ?
7 Neuxei,
Tsarumuni kaxetaya kaniyɨaneni.
Haika tewiyari kuyaxi me'eweiyatɨ mana pamie,
'ixaheritsixi kuyaxiyaritsie memanayexeiyarie kwinimieme yeme memɨteheuyutakwiwawe.
8 Yunaitɨ 'ixipara mekanakawɨtɨatɨkani,
meta mekateniuti'ɨkitɨarieni memeuyutakwiwawenikɨ,
yunaitɨ yu'ixipara yuhɨiyametsie mekanikawɨtɨatɨkani
tɨkarikɨ mɨkweriwa'anekɨ.
9 Tsarumuni yukaxeta kaniutawewieni
kɨye 'aixɨa mɨ'anenekɨ Riwanu mieme.
10 Matiwetɨka Pɨratakɨ kaniutiwewieni,
hurukɨta mitseiriyatɨka.
'Ɨpariyarita kaniutawipa taɨraɨyemekɨ,
taɨtana mekaniwaku'utɨani me'inaki'erietɨ
'ukari Kerutsareme kiekatari.
11 Xekeniwayekɨni 'ukarawetsixi Tsiyunitari.
Ti'aitame Tsarumuni xekenexeiyani.
Yumu'utsie kanenamaka Kuruna maamaya menamaniri
kepauka mutineɨkixɨtsie mieme
kepauka 'iyarieya muyutemawiekai.